അവസാന പരമ്പരയിലെ ആദ്യ ടെസ്റ്റില്‍ മാസ്റ്റര്‍ ബ്ലാസ്റ്റര്‍ സച്ചിന്‍ ടെണ്ടുല്‍ക്കര്‍ പുറത്തായി. കൊല്‍ക്കത്ത ടെസ്റ്റില്‍ 10 റണ്‍സ്‌ മാത്രമാണ്‌ സച്ചിന്‌ നേടാന്‍ സാധിച്ചത്‌. ഷില്ലിംഗ്‌ഫോര്‍ഡ്‌ സച്ചിനെ വിക്കറ്റിനു മുന്നില്‍ കുടുക്കുകയായിരുന്നു. കൊല്‍ക്കത്തയില്‍ വെസ്റ്റിന്‍ഡീസിനെതിരേ നടക്കുന്ന ആദ്യ ടെസ്റ്റിന്റെ രണ്ടാം ദിനം ഇന്ത്യയ്‌ക്ക്‌ നാല്‌ വിക്കറ്റ്‌ നഷ്‌ടമായി. ഒടുവില്‍ വിവരം ലഭിക്കുമ്പോള്‍ ഇന്ത്യ 83/4 എന്ന നിലയിലാണ്‌.

ഷില്ലിംഗ്‌ഫോര്‍ഡിനെ രണ്ടു തവണ സച്ചിന്‍ ബൗണ്ടറി കടത്തിയിരുന്നു.എന്നാല്‍ ഇന്നിംഗ്‌സ്‌ അധികം നീണ്ടില്ല. ശിഖര്‍ ധവാന്‍ (23), മുരളി വിജയ്‌ (26), ചേതേശ്വര്‍ പൂജാര (17) എന്നിവരുടെ വിക്കറ്റുകളും ഇന്ത്യയ്‌ക്ക്‌ നഷ്‌ടമായി. വിരാട്‌ കോഹ്‌ലിയും രോഹിത്‌ ശര്‍മ്മയുമാണ്‌ ക്രീസില്‍. ആറ്‌ വിക്കറ്റ്‌ ശേഷിക്കേ 152 റണ്‍സ്‌ പിന്നിലാണ്‌ ഇന്ത്യ. വിന്‍ഡീസ്‌ ആദ്യ ഇന്നിംഗ്‌സില്‍ 234 റണ്‍സ്‌ നേടിയിരുന്നു.

ചേതേശ്വര്‍ പൂജാര 17 റണ്‍സെടുത്ത്‌ പുറത്തായതിനു പിന്നാലെയാണ്‌ സച്ചിന്‍ ക്രീസില്‍ എത്തിയത്‌. വന്‍ കരഘോഷത്തോടെയാണ്‌ സച്ചിനെ ആരാധകര്‍ ക്രിസിലേക്ക്‌ വരവേറ്റത്‌. സച്ചിന്റെ കരിയറിലെ 199ാം ടെസ്‌റ്റ്‌ മത്സരമാണ്‌ ഈഡനില്‍ നടന്നത്‌.