ഇന്ത്യ-ദക്ഷിണാഫ്രിക്ക ടെസ്റ്റ്‌ പരമ്പര ദക്ഷിണാഫ്രിക്കയ്‌ക്ക്‌. എക്കാലത്തേയും മികച്ച ഓള്‍റൗണ്ടര്‍മാരില്‍ ഒരാളായ ജാക്ക്‌ കാലിസിന്‌ നല്ലൊരു വിടവാങ്ങല്‍ കൂടിയാണി്‌ ടീം ദക്ഷിണാഫ്രിക്ക നല്‍കിയത്‌. രണ്ടാമത്തേതും അവസാനത്തേതുമായ ടെസ്റ്റില്‍ പത്ത്‌ വിക്കറ്റിന്‌ വിജയിച്ച ആതിഥേയര്‍ 1-0 ന്‌ പരമ്പര സ്വന്തമാക്കുകയായിരുന്നു.

ഒന്നാം ടെസ്റ്റില്‍ സമനിലയായിരുന്നു ഫലം. ഇന്ത്യയുടെ ഒന്നാം ഇന്നിങ്‌സ്‌ സ്‌കോറായ 334 റണ്‍സിന്‌ മറുപടിയായി 500 റണ്‍സ്‌ ദക്ഷിണാഫ്രിക്ക നേടി. വന്‍ ലീഡ്‌ വഴങ്ങി രണ്ടാം ഇന്നിംഗ്‌സ്‌ ആരംഭിച്ച ഇന്ത്യ 223 റണ്‍സിനു പുറത്തായി. 58 റണ്‍സ്‌ ലക്ഷ്യം തേടിയിറങ്ങിയ ദക്ഷിണാഫ്രിക്കയുടെ വിജയം ഓപ്പണര്‍മാരായ ഗ്രെയിം സ്‌മിത്തും (27) അല്‍വിരോ പീറ്റേഴ്‌സണും (31) ചേര്‍ന്നു പൂര്‍ത്തിയാക്കി.

നേരത്തേ 157 പന്തില്‍ 96 റണ്‍സോടെ പൊരുതിയ അജിങ്ക്യ രഹാനെയുടെ പോരാട്ട മികവാണ്‌ ഇന്ത്യയെ ഇന്നിംഗ്‌സ്‌ തോല്‍വിയെന്ന നാണക്കേടില്‍നിന്നു രക്ഷിച്ചത്‌. എന്നാല്‍ അര്‍ഹിച്ച സെഞ്ചുറിക്കു നാലു റണ്‍സ്‌ അകലെ രഹാനെയുടെ വിക്കറ്റ്‌ സ്വന്തമാക്കി ഫിലാന്‍ഡര്‍ ഇന്ത്യന്‍ ഇന്നിംഗ്‌സ്‌ അവസാനിപ്പിക്കുകയായിരുന്നു. ദക്ഷിണാഫ്രിക്കയ്‌ക്കായി ഡെയ്‌ല്‍ സ്‌റ്റെയ്‌നും ഫിലാന്‍ഡറും മൂന്ന്‌ വിക്കറ്റ്‌ വീതവും റോബിന്‍ പീറ്റേഴ്‌സണ്‍ നാല്‌ വിക്കറ്റും നേടി. മത്സരത്തിലാകെ ഒമ്പതു വിക്കറ്റ്‌ വീഴ്‌ത്തിയ സ്‌റ്റെയ്‌നാണ്‌ മാന്‍ ഓഫ്‌ ദ മാച്ച്‌. എബി ഡിവില്യേഴ്‌സാണ്‌ മാന്‍ ഓഫ്‌ ദ സീരീസ്‌.