80 കോടി രൂപയില്‍ നിര്‍മ്മിച്ച 'ധോണി' ചിത്രം റിലീസിനു മുന്‍പെ വാരിക്കൂട്ടിയത് 60 കോടി
ക്രിക്കറ്റിലെ കോടീശ്വരന്‍ സിനിമയിലും കോടികള്‍ വാരുന്നു. ഇന്ത്യന്‍ ക്രിക്കറ്റ് ടീമിന്റെ കൂള്‍ ക്യാപ്ടനായ മഹേന്ദ്ര സിങ് ധോണിയുടെ ജീവിതം സിനിമയാകുമ്പോള്‍ റിലീസിനു മുന്‍പെ കോടികള്‍ സ്വന്തമാക്കിയിരിക്കുകയാണ്. എംഎസ് ധോണി: ദി അണ്‍ടോള്‍ഡ് സ്‌റ്റോറി എന്ന ചിത്രം 80 കോടി മുതല്‍മുടക്കിലാണ് നിര്‍മ്മിച്ചത്. ഇതില്‍ 60 കോടി റിലീസിന് മുമ്പേ ചിത്രം സ്വന്തമാക്കി. 45 കോടി സാറ്റ്‌ലൈറ്റ് റൈറ്റ്‌സ് വകയില്‍. 15 കോടി ചിത്രവുമായി സഹകരിച്ച ബ്രാന്‍ഡുകള്‍ വഴിയും.
നീരജ് പാണ്ഡെ സംവിധാനം ചെയ്യുന്ന ചിത്രത്തില്‍ സുശാന്ത് സിങ് രജ്പുത്താണ് നായകന്‍. ധോണിയുടെ ക്രിക്കറ്റ് കരിയറിലെ ഇതുവരെ ആരും അറിയാത്ത ചില ഏടുകളും ചിത്രത്തില്‍ ഉണ്ടാകുമെന്ന് കരുതുന്നു. ഫോക്‌സ് സ്റ്റാര്‍ സ്റ്റുഡിയോസും ഇന്‍സ്പയേഡ് എന്റര്‍ടെയ്ന്‍മെന്റും ചേര്‍ന്നാണ് ചിത്രം നിര്‍മ്മിക്കുന്നത്. ഋതി സ്‌പോര്‍ട്‌സിന്റെ ഉപകമ്പനിയാണ് ഇന്‍സ്‌പെയേഡ് എന്റര്‍ടെയ്ന്‍മെന്റ്. ധോണിയുടെ കഥയ്ക്കുള്ള പകര്‍പ്പവകാശം ഋതി സ്‌പോര്‍ട്ട്‌സിനാണ്. ചിത്രം ഈ മാസം 30ന് തീയറ്ററുകളിലെത്തും.
https://www.facebook.com/Malayalivartha
