ടെസ്റ്റ് ക്രിക്കറ്റ് കളിക്കാരുടെ മാച്ച് ഫീ ഇരട്ടിയാക്കി ബി.സി.സി.ഐ
ഇന്ത്യന്‍ ക്രിക്കറ്റ് കളിക്കാരുടെ ടെസ്റ്റ് മാച്ച് ഫീ ബിസിസിഐ ഇരട്ടിയാക്കി ഉയര്‍ത്തി. ഏഴു ലക്ഷത്തില്‍ നിന്ന് 15 ലക്ഷമാക്കിയാണ് ഉയര്‍ത്തിയത്. പുതുതലമുറക്കിടയില്‍ ടെസ്റ്റ് മത്സരങ്ങള്‍ കൂടുതല്‍ ജനകീയമാക്കുന്നതിന്റെ ഭാഗമായാണ് തീരുമാനം. റിസര്‍വ് താരങ്ങളുടെ പ്രതിഫലത്തിലും വര്‍ധന വരുത്തി. ഏഴു ലക്ഷം രൂപയാണ് പുതുക്കിയ പ്രതിഫല തുക.
ടെസ്റ്റ് മത്സരങ്ങള്‍ക്ക് കൂടുതല്‍ പരിഗണന ലഭിക്കേണ്ടതിനാലാണ് പ്രതിഫലത്തുക ഉയര്‍ത്താന്‍ തീരുമാനിച്ചതെന്ന് ബിസിസിഐ പ്രസിഡന്റ് അനുരാഗ് താക്കൂര്‍ പറഞ്ഞു. ഇന്നത്തെ തലമുറയുടെ ഇടയില്‍ ടെസ്റ്റ് മത്സരങ്ങള്‍ കൂടുതല്‍ ജനകീയമാക്കുന്നതിനെ കുറിച്ച് ചര്‍ച്ച നടത്തി. കളിക്കാര്‍ക്ക് ടെസ്റ്റ് മത്സരങ്ങളില്‍ താല്‍പര്യം നിലനിര്‍ത്താന്‍ മികച്ച പ്രതിഫലം നല്‍കണം. പുതിയ കളിക്കാര്‍ ട്വന്റി-20 ക്രിക്കറ്റ് ലീഗുകളില്‍ ആകൃഷ്ടരാകുന്നത് നോക്കി മാറി നില്‍ക്കാനാവില്ലെന്നും താക്കൂര്‍ പറഞ്ഞു.
മുംബൈയില്‍ ചേര്‍ന്ന ബിസിസിഐ പ്രത്യേക യോഗമാണ് തീരുമാനമെടുത്തത്. എന്നാല്‍ ലോധ കമ്മിറ്റി നിര്‍ദേശങ്ങള്‍ നടപ്പാക്കുന്നതുമായി ബന്ധപ്പെട്ട കാര്യങ്ങളെക്കുറിച്ച് ബിസിസിഐ പ്രതികരിച്ചില്ല.
https://www.facebook.com/Malayalivartha
