ന്യൂസിലന്റിനെതിരെ ഇന്ത്യക്ക് ആറു റണ്‍സ് തോല്‍വി
ഡല്‍ഹി കാട്‌ലയില്‍ നടന്ന ന്യൂസിലന്റിനെതിരെയുള്ള രണ്ടാം ഏകദിനത്തില്‍ ഇന്ത്യക്ക് ആറു റണ്‍സ് തോല്‍വി. ന്യൂസിലന്റിന്റെ 243 റണ്‍സ് എന്ന വിജയലക്ഷ്യം മറിക്കടക്കാന്‍ സാധിക്കാതെ ഇന്ത്യന്‍ ബാറ്റിങ് നിര തകരുകയായിരുന്നു. 49.3 ഓവറില്‍ 236 റണ്‍സിന് എല്ലാവരും പുറത്തായി. ഒമ്പതാം വിക്കറ്റില്‍ ഓള്‍റൗണ്ടര്‍ ഹാര്‍ദിക് പാണ്ഡ്യയും ഉമേഷ് യാദവും ന്യൂസിലന്റ് ബോളിങിന് മുന്നില്‍ പിടിച്ച് നിന്നെങ്കിലും ജയത്തിലേക്കെത്താനായില്ല. ക്യാപ്റ്റന്‍ എം.എസ്.ധോണിയും അജിങ്ക്യാ രഹാനെയും മാത്രമാണ് ഇന്ത്യന്‍ നിരയില്‍ സാമാന്യം ഭേദപ്പെട്ട പ്രകടനം നടത്തിയത്.
നേരത്തെ ടോസ് നേടി ബോളിങ് തിരഞ്ഞെടുത്ത ഇന്ത്യ ന്യുസിലന്‍ഡിനെ 242 ന് ഒതുക്കിയെങ്കിലും ന്യുസിലന്‍ഡ് ബോളിങ് നിരക്ക് മുന്നില്‍ ഇന്ത്യന്‍ ബാറ്റിങും പതറി. സെഞ്ച്വറി നേടിയ ക്യാപ്റ്റന്‍ കെയ്ന്‍ വില്ല്യംസണിനും 46 റണ്‍സെടുത്ത ടോം ലാഥനുമാണ് ന്യുസിലന്‍ഡ് ബാറ്റിങ്ങില്‍ തിളങ്ങിയത്.
ഒന്നാം ഏകദിനത്തില്‍ തകര്‍പ്പന്‍ ജയം സ്വന്തമാക്കിയ ഇന്ത്യ അതേ ടീമിനെ നിലനിര്‍ത്തിയപ്പോള്‍ മൂന്ന് മാറ്റങ്ങളുമായാണ് കിവീസ് ഇറങ്ങിയത്. ബ്രെയ്‌സ്വെല്‍, നീഷാം, സോധി എന്നിവര്‍ക്ക് പകരം ട്രെന്റ് ബൗള്‍ട്ട്, ഹെന്റി, ഡെവിസിച്ച് എന്നിവരാണ് കളിക്കാനിറങ്ങിയത്. ധര്‍മശാലയില്‍ നടന്ന ഒന്നാം ഏകദിനത്തില്‍ ഇന്ത്യ ആറു വിക്കറ്റിന് ജയിച്ചിരുന്നു.
https://www.facebook.com/Malayalivartha
