ധോണിയുടെ അപ്രതീക്ഷിത രാജിക്ക് പിന്നില്‍ കൊഹ്‌ലിയുടെ മികച്ച പ്രകടനങ്ങള്‍
കളമറിഞ്ഞ് കളിക്കുന്ന കളിക്കാരന്‍...തന്ത്രങ്ങളുടെ രാജകുമാരന്‍ ക്യാപ്റ്റന്‍ കൂളിനെ വിശേഷിപ്പിക്കാന്‍ വാക്കുകളില്ല എന്നാല്‍ സ്വരം നന്നായിരിക്കുമ്പോള്‍ പാട്ടു നിര്‍ത്തുക എന്ന ശൈലിയില്‍ സ്വയം ക്യാപ്റ്റന്‍സി വെച്ചൊഴിഞ്ഞ് ധോണി അവിടെയും വ്യത്യസ്തനായി. തനിക്ക് താഴെ വളരുന്ന കോഹ്ലിക്ക് ധോണി വഴിമാറുന്നു അതും ടീമിനെ ചരിത്രത്തില്‍ അടയാളപ്പെടുത്തിയശേഷം. കൊഹ്‌ലിയുടെ കീഴിലെ മികച്ച ജയങ്ങളാണ് ധോണിയുടെ രാജി നേരത്തെയാക്കിയത്. ഇതോടെ ഇന്ത്യന്‍ ടീമിന്റെ പൂര്‍ണ നിയന്ത്രണം കൊഹ്‌ലിക്കാകും. കഴിഞ്ഞ വര്‍ഷം ഇന്ത്യയില്‍ നടന്ന ലോക ട്വന്റി 20യിലെ തോല്‍വിക്കുശേഷം വിരമിക്കുമോയെന്ന് ചോദിച്ച ഓസീസ് മാധ്യമപ്രവര്‍ത്തകനെ ധോണി കൈകാര്യം ചെയ്ത രീതി ആരാധകര്‍ മറന്നിട്ടുണ്ടാകില്ല. ടെസ്റ്റ് റാങ്കിംഗിലെ ഒന്നാം സ്ഥാനത്തേക്ക് ഇന്ത്യയെ മടക്കിക്കൊണ്ടുപോയ കൊഹ്‌ലിയെ കാത്തിരിക്കുന്ന ആദ്യ പ്രധാന വെല്ലുവിളി ജൂണില്‍ ഇംഗ്ലണ്ട് ആതിഥേയരാകുന്ന ചാമ്പ്യന്‍സ് ട്രോഫിയാകും.
ടീമിലുള്ളിടത്തോളം ക്യാപ്റ്റനാകാമെന്ന ആത്മവിശ്വാസം ഉണ്ടായിരുന്ന ധോണിക്ക് കൊഹ്‌ലിപ്പട ടെസ്റ്റില്‍ നടത്തിയ മുന്നേറ്റം സമ്മര്‍ദ്ദമേകി. ഫിനിഷര്‍ എന്ന നിലയില്‍ പ്രതാപ കാലം പിന്നിടുകയും ചെയ്തതോടെ ഓരോ പരാജയത്തിന് ശേഷവും കുത്തുവാക്കുകള്‍ കേള്‍ക്കേണ്ട നിലയിലായി ഇന്ത്യയുടെ ക്യാപ്റ്റന്‍ കൂള്‍. ശാരീരികക്ഷമതയ്ക്കും മികവിനും പ്രാധാന്യം നല്‍കുന്ന പുതിയ സെലക്ഷന്‍ കമ്മിറ്റിയുടെ തീരുമാനത്തിന് കാത്ത് നില്‍ക്കാതെ സ്വയം തെരഞ്ഞെടുത്ത സമയത്ത് ക്യാപ്റ്റന്‍ പദവിയൊഴിയുകയാണ് ധോണി.
ഇംഗ്ലണ്ടിനെതിരായ പരമ്പരക്കുള്ള ടീം തെരഞ്ഞെടുപ്പിനായി ചേരുമ്പോള്‍ കൊഹ്‌ലിയല്ലാതെ മറ്റൊരു പേരും ക്യാപ്റ്റന്‍ പദവിയിലേക്ക് സെലക്ടമാര്‍ക്ക് മുന്നിലുണ്ടാകില്ല. പവാറിന്റെ പ്രതാപകാലത്ത് സച്ചിന്‍ നിര്‍ദേശിച്ചതിനാല്‍ ക്യാപ്റ്റന്‍ പദവി ഏറ്റെടുത്ത ധോണി കൊഹ്‌ലിക്കായി വഴിമാറുമ്പോള്‍ ഇന്ത്യന്‍ ക്രിക്കറ്റില്‍ തലമുറമാറ്റവും പൂര്‍ണമാകും.
ധോണിക്ക് പകരം എന്നും ധോണിമാത്രം.താര രാജാക്കന്മാര്‍ കളമൊഴിഞ്ഞ, നാഥനില്ലാ കളരിയായി മാറിയ ഇന്ത്യന്‍ ടീമിനെ തന്റെ തോളിലേറ്റി ലോക ക്രിക്കറ്റിന്റെ നെറുകയിലെത്തിച്ച താരമാണ് എംഎസ് ധോണി. 2007 ല്‍ ആരും പ്രതീക്ഷയര്‍പ്പിക്കാത്ത, പരിചയ സമ്പന്നരല്ലാത്ത ഒരു താരനിരയുമായി ദക്ഷിണാഫ്രിക്കയിലേക്ക് ട്വന്റി20 ലോകകപ്പിലേക്ക് ധോണി യാത്ര തിരിക്കുമ്പോള്‍ ഒന്നാം റൗണ്ടില്‍ കവിഞ്ഞൊന്നും ആരും പ്രതീക്ഷിച്ചിരുന്നില്ല. എന്നാല്‍ ചരിത്രം ഒരിക്കല്‍ കൂടി ഇന്ത്യന്‍ ക്രിക്കറ്റിനെ ഞെട്ടിച്ചു 1983ല്‍ കപിലിന്റെ ചെകുത്താന്മാര്‍ ലോര്‍ഡ്‌സില്‍ ലോകത്തെ ഞെട്ടിച്ചത് പോലെ ചിര വൈരികളായ പാകിസ്താനെ ഫൈനലില്‍ തകര്‍ത്ത് ഇന്ത്യ കുട്ടി ക്രിക്കറ്റിന്റെ നെറുകയിലേക്ക്. പിന്നീട് സംഭവിച്ചതെല്ലാം ചരിത്രമാണ്
മഹേന്ദ്ര സിംഗ് ധോണി ഏകദിന, ട്വന്റി20 ക്യാപ്റ്റന്‍ സ്ഥാനം ഒഴിഞ്ഞു. ഇന്ത്യക്ക് വേണ്ടി ലോകകപ്പ് വിജയമുള്‍പ്പെടെ മികച്ച വിജയങ്ങള്‍ നേടിക്കൊടുത്ത ക്യാപ്റ്റനാണ് വിട പറയുന്നത്. ലോകം കണ്ട ഗ്രേറ്ര് ഫിനിഷറുടെ മികച്ച പ്രകടനങ്ങള്‍....
https://www.facebook.com/Malayalivartha
