ഇംഗ്ലണ്ടിനെതിരായ ഏകദിന, ട്വന്റി-20 പരമ്പരയ്ക്കുള്ള ഇന്ത്യന്‍ ടീമിനെ പ്രഖ്യാപിച്ചു. എം.എസ്.ധോണി രാജിവച്ച ഒഴിവില്‍ വിരാട് കോഹ്‌ലിയെ ഇരു ടീമിന്റെയും ക്യാപ്റ്റനായി തെരഞ്ഞെടുത്തു. രഞ്ജിയിലെ തകര്‍പ്പന്‍ പ്രകടനത്തിന്റെ അടിസ്ഥാനത്തില്‍ യുവരാജ് സിംഗ് ദീര്‍ഘകാലത്തിന് ശേഷം ഏകദിന, ട്വന്റി-20 ടീമില്‍ തിരിച്ചെത്തി. ഇംഗ്ലണ്ടിനെതിരായ പരിശീലന മത്സരത്തിനുള്ള ഇന്ത്യ എ ടീമില്‍ മലയാളി താരം സഞ്ജു സാംസണെയും ഉള്‍പ്പെടുത്തി.

2013 ഡിസംബറില്‍ ദക്ഷിണാഫ്രിക്കയ്‌ക്കെതിരേ സെഞ്ചൂറിയനിലാണ് യുവരാജ് ഒടുവില്‍ ഇന്ത്യയ്ക്ക് വേണ്ടി ഏകദിന കുപ്പായമണിഞ്ഞത്. എന്നാല്‍ ട്വന്റി-20 യില്‍ പിന്നീട് നീലക്കുപ്പായത്തില്‍ യുവരാജ് കളിച്ചെങ്കിലും ഏകദിന ടീമില്‍ സ്ഥാനം ലഭിച്ചിരുന്നില്ല.

മൂന്ന് ഏകദിനവും മൂന്ന് ട്വന്റി-20യും അടങ്ങുന്നതാണ് ഇംഗ്ലണ്ടിനെതിരായ പരമ്പര. ജനുവരി 15-ന് പൂനെയിലാണ് ഏകദിന പരമ്പര തുടങ്ങുന്നത്. ഇതാണ് ഏകദിന ടീം: കെ.എല്‍.രാഹുല്‍, ശിഖര്‍ ധവാന്‍, വിരാട് കോഹ്‌ലി (ക്യാപ്റ്റന്‍), എം.എസ്.ധോണി, മനീഷ് പാണ്ഡെ, കേദാര്‍ ജാദവ്, യുവരാജ് സിംഗ്, അജിങ്ക്യ രഹാനെ, ഹര്‍ദിക് പാണ്ഡ്യ, ആര്‍.അശ്വിന്‍, രവീന്ദ്ര ജഡേജ, അമിത് മിശ്ര, ജസ്പ്രീത് ബുംറ, ഭുവനേശ്വര്‍ കുമാര്‍, ഉമേഷ് യാദവ്.