രണ്ടാം ടെസ്റ്റില്‍ ഓസ്‌ട്രേലിയയെ 75 റണ്‍സിന് തകര്‍ത്ത് ഇന്ത്യ ടെസ്റ്റ് പരന്പരയില്‍ ഒപ്പമെത്തി. 188 റണ്‍സ് വിജയലക്ഷ്യം പിന്തുടര്‍ന്ന ഓസീസ് 112 റണ്‍സിന് ഓള്‍ഔട്ടായി. ആറ് വിക്കറ്റ് വീഴ്ത്തിയ ആര്‍.അശ്വിന്റെ മാരകസ്‌പെല്ലാണ് ഓസീസിനെ തൂത്തെറിഞ്ഞത്. ഉമേഷ് യാദവിന് രണ്ടു വിക്കറ്റ് ലഭിച്ചു.ബൗളര്‍മാര്‍ കളം നിറഞ്ഞ മത്സരത്തില്‍ രണ്ടാം ഇന്നിംഗ്‌സിലെ ഇന്ത്യയുടെ അവിശ്വസ്‌നീയമായ തിരിച്ചുവരവാണ് ടെസ്റ്റില്‍ വിജയം ഒരുക്കിയത്. 101/4 എന്ന നിലയില്‍ നിന്നുമാണ് ഓസീസ് 112ന് പുറത്തായ്. 28 റണ്‍സ് നേടിയ നായകന്‍ സ്റ്റീവ് സ്മിത്താണ് സന്ദര്‍ശകരുടെ ടോപ്പ് സ്‌കോറര്‍. പീറ്റര്‍ ഹാന്‍ഡ്‌സ്‌കോം 24 റണ്‍സ് നേടി. ആറ് ബാറ്റ്‌സ്മാന്‍മാര്‍ രണ്ടക്കം കാണാതെ പുറത്തായി.

നേരത്തെ ഇന്ത്യയുടെ രണ്ടാം ഇന്നിംഗ്‌സ് 274 റണ്‍സില്‍ അവസാനിച്ചിരുന്നു. ചേതേശ്വര്‍ പൂജാര (92), അജിങ്ക്യ രഹാനെ (52), കെ.എല്‍.രാഹുല്‍ (51) എന്നിവരുടെ അര്‍ധ സെഞ്ചുറികളാണ് ഇന്ത്യയ്ക്ക് തുണയായത്. ആറ് വിക്കറ്റ് വീഴ്ത്തിയ ജോഷ് ഹേസില്‍വുഡാണ് കൂറ്റന്‍ ലീഡ് നേടുന്നതില്‍ നിന്നും ഇന്ത്യയെ തടഞ്ഞുനിര്‍ത്തിയത്.

213/4 എന്ന ഭേദപ്പെട്ട നിലയില്‍ നാലാം ദിനം തുടങ്ങിയ ഇന്ത്യയ്ക്ക് രഹാനെയുടെ വിക്കറ്റ് നഷ്ടപ്പെട്ടതോടെ കഷ്ടകാലം തുടങ്ങി. 52 റണ്‍സ് നേടിയ രഹാനയെ സ്റ്റാര്‍ക്ക് വിക്കറ്റിന് മുന്നില്‍ കുടുക്കി. അടുത്ത പന്തില്‍ കരുണ്‍ നായരെ പൂജ്യത്തിന് പുറത്താക്കിയ സ്റ്റാര്‍ക്ക് ഓസീസിന് ഡബിള്‍ ബ്രേക്ക് ത്രൂ സമ്മാനിക്കുകയായിരുന്നു. പൂജാര കൂടി വീണതോടെ പിന്നീടെല്ലാം ചടങ്ങു മാത്രമായി. അശ്വിന്‍ (4), ഉമേഷ് യാദവ് (1) എന്നിവര്‍ കാര്യമായ ചെറുത്തുനില്‍പ്പ് നടത്തിയില്ല. സാഹഇഷാന്ത് ശര്‍മ സഖ്യം അവസാന വിക്കറ്റില്‍ 18 റണ്‍സ് കൂട്ടിച്ചേര്‍ത്തു.

87 റണ്‍സിന്റെ ഒന്നാം ഇന്നിംഗ്‌സ് ലീഡ് വഴങ്ങി ബാറ്റിംഗിനിറങ്ങിയ ഇന്ത്യയ്ക്ക് അഞ്ചാം വിക്കറ്റിലെ മികച്ച കൂട്ടുകെട്ടാണ് മാന്യമായ സ്‌കോര്‍ സമ്മാനിച്ചത്. പൂജാരരഹാനെ സഖ്യം 118 റണ്‍സ് കൂട്ടിച്ചേര്‍ത്തത് നിര്‍ണായകമായി. സ്‌കോര്‍: ഇന്ത്യ ഒന്നാം ഇന്നിംഗ്‌സ് 189, രണ്ടാം ഇന്നിംഗ്‌സ് 274. ഓസ്‌ട്രേലിയ ഒന്നാം ഇന്നിംഗ്‌സ് 276, രണ്ടാം ഇന്നിംഗ്‌സ് 112.