ഇന്ത്യ-ഓസ്‌ട്രേലിയ മൂന്നാം ടെസ്റ്റിന്റെ മൂന്നാംദിനത്തില്‍ ഇന്ത്യ പൊരുതുന്നു. ഓസീസിന്റെ ഒന്നാം ഇന്നിംഗ്‌സ് സ്‌കോറായ 451 റണ്‍സിനെതിരെ ഇന്ന് കളിയവസാനിക്കുമ്പോള്‍ ആറ് വിക്കറ്റ് നഷ്ടത്തില്‍ 360 റണ്‍സ് എടുത്തിട്ടുണ്ട്. ചേതേശ്വര്‍ പൂജാരയുടെ സെഞ്ചുറിയാണ് ഇന്ത്യയെ പൊരുതാന്‍ സഹായിച്ചത്. 130 റണ്‍സ് നേടി പൂജാര ഇപ്പോഴും ക്രീസില്‍ തുടരുന്നുണ്ട്.

ഓപ്പണര്‍മാരായ ലോകേഷ് രാഹുലും മുരളി വിജയ്‌യും അര്‍ദ്ധസെഞ്ചുറികള്‍ നേടിയതൊഴിച്ചാല്‍ മറ്റുള്ളവരുടെ പ്രകടനം മോശപ്പെട്ടതായിരുന്നു. ക്യാപ്റ്റന്‍ വിരാട് കോഹ്‌ലി വീണ്ടും നിരാശപ്പെടുത്തി വെറും ആറ് റണ്‍സിന് പുറത്തായി. മലയാളിയായ കരുണ്‍ നായര്‍ 23 റണ്‍സെടുത്ത് പുറത്തായി. ഇന്ത്യ ഇപ്പോഴും 91 റണ്‍സിന് പിന്നിലാണ്.

ഓസ്‌ട്രേലിയയ്ക്ക് വേണ്ടി ബൗളര്‍മാരായ പാറ്റ് കമ്മിന്‍സ് നാലും ഹാസെല്‍വുഡ്,ഓ കീഫ് എന്നിവര്‍ ഓരോ വിക്കറ്റും നേടി.