ബൗളര്‍മാര്‍ മികവു കാട്ടിയ മത്സരത്തില്‍ ഓസ്‌ട്രേലിയക്കെതിരെ ഇന്ത്യയ്‌ക്ക്‌ 73 റണ്‍സിന്റെ ഉജ്ജ്വല വിജയം. ഇന്ത്യ ഉയര്‍ത്തിയ 160 റണ്‍സ്‌ വിജയലക്ഷ്യം പിന്തുടര്‍ന്ന ഓസീസിന്‌ 16.2 ഓവറില്‍ 86 റണ്‍സ്‌ എടുക്കാനെ കഴിഞ്ഞുളളൂ. ടോസ്‌ നേടിയ ഓസ്‌ട്രേലിയ ഇന്ത്യയെ ബാറ്റിംങ്ങിനയയ്‌ക്കുകയായിരുന്നു. ഒരു ഘട്ടത്തില്‍ 66/4 എന്ന നിലയിലായിരുന്ന ഇന്ത്യയെ യുവരാജ്‌ സിംഗ്‌(60) ന്റെയും ക്യാപ്‌റ്റന്‍ എം.എസ്‌.ധോണി (24) യുടെയും കൂട്ടുകെട്ടാണ്‌ സ്‌കോര്‍ 159 ലെത്തിയത്‌. 43 പന്തില്‍ നാല്‌ സിക്‌സറുകളും 5 ഫോറും അടങ്ങുന്നതായിരുന്നു യുവരാജിന്റെ ഇന്നിംഗ്‌സ്‌. ഇന്ത്യയ്‌ക്ക്‌ 7 വിക്കറ്റുകളാണ്‌ നഷ്‌ടമായത്‌.