ഇഷാന്ത്‌ ശര്‍മയുടെ തീപ്പൊരി ബൗളിംഗിന്‌ മുന്നില്‍ ഇംഗ്ലണ്ട്‌ തകര്‍ന്നു. ഒരു ഘട്ടത്തില്‍ പരാജയ ഭീതി നേരിട്ട ഇന്ത്യയ്‌ക്ക്‌ ഇംഗ്ലണ്‌ടിനെതിരേ ലോര്‍ഡ്‌സില്‍ തകര്‍പ്പന്‍ ജയം. 28 വര്‍ഷത്തിന്‌ ശേഷമാണ്‌ ഇന്ത്യ ക്രിക്കറ്റിന്റെ മക്കയായ ലോര്‍ഡ്‌സില്‍ ഒരു ടെസ്റ്റ്‌ ജയിക്കുന്നത്‌.
95 റണ്‍സിനാണ്‌ ഇന്ത്യ ജയിച്ചത്‌. രണ്ടാം ഇന്നിംഗ്‌സില്‍ 319 റണ്‍സ്‌ വിജയലക്ഷ്യം പിന്തുടര്‍ന്ന ഇംഗ്ലണ്ട്‌ അഞ്ചാം ദിനം 223 റണ്‍സിന്‌ പുറത്തായി. ജയത്തോടെ അഞ്ച്‌ മത്സരങ്ങളുടെ പരമ്പരയില്‍ ഇന്ത്യ 1-0ന്‌ മുന്നിലെത്തി.
105/4 എന്ന നിലയിലാണ്‌ ഇംഗ്ലണ്ട്‌ അഞ്ചാം ദിനം തുടങ്ങിയത്‌. ജോ റൂട്ട്‌-മൊയിന്‍ അലി സഖ്യം നന്നായി കളിച്ചെങ്കിലും ഉച്ചഭണത്തിന്‌ മുന്‍പുള്ള അവസാന ഓവറില്‍ അലിയെ വീഴ്‌ത്തി ഇഷാന്ത്‌ ഇന്ത്യയ്‌ക്ക്‌ ബ്രേക്ക്‌ നല്‌കി. ഉച്ചഭക്ഷണം കഴിഞ്ഞെത്തിയ ഇഷാന്ത്‌ ശര്‍മ, മാറ്റ്‌ പ്രയര്‍ (23), ജോ റൂട്ട്‌ (66), ബെന്‍ സ്റ്റോക്ക്‌സ്‌ (0), സ്റ്റുവര്‍ട്ട്‌ ബ്രോഡ്‌ (8) എന്നിവരെ തുടരെ പുറത്താക്കി. 74 റണ്‍സ്‌ വഴങ്ങി ഏഴ്‌ വിക്കറ്റ്‌ നേടിയ ഇഷാന്തിന്റെ ഏറ്റവും മികച്ച ബൗളിംഗ്‌ പ്രകടനമാണ്‌ ലോര്‍ഡ്‌സില്‍ പിറന്നത്‌. പതിനൊന്നാമനായി ക്രീസിലെത്തിയ ജെയിംസ്‌ ആന്‍ഡേഴ്‌സണ്‍ (2) റണ്‍ഔട്ടായതോടെയാണ്‌ ഇന്ത്യയുടെ വിജയം പൂര്‍ത്തിയായത്‌.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha