യൂറോപ്പിൽ വമ്പന്മാർക്കെല്ലാം ജയം. ഇംഗ്ലീഷ് പ്രീമിയർ ലീഗിൽ മാഞ്ചസ്റ്റർ സിറ്റി വെസ്റ്റ് ഹാമിനെ ഒന്നിനെതിരെ രണ്ടു ഗോളുകൾക്ക് തോൽപ്പിച്ചു. രണ്ടു ഗോളും നേടിയത് സിറ്റിയുടെ പ്രതിരോധ താരങ്ങൾ. മുപ്പതാം മിനിറ്റിൽ റൂബൻ ഡയസും അറുപത്തിയെട്ടാം മിനിറ്റിൽ ജോൺ സ്റ്റോൺസുമാണ് സിറ്റിയ്ക്ക് വേണ്ടി ഗോളുകൾ നേടിയത്.

നേരത്തെ ഒരു ഗോൾ ലീഡ് നേടിയ സിറ്റിയെ ആദ്യപകുതി അവസാനിക്കുന്നതിന് തൊട്ട് മുൻപ് വെസ്റ്റ് ഹാമിന്റെ മുന്നേറ്റ നിര താരം മിഖായേൽ അന്റോണിയോ ഒരു ഗോൾ മടക്കി സമനിലയിൽ കൊണ്ട് വന്നു. എന്നാൽ ജോൺ സ്റ്റോൺസിന്റെ ഗോളിൽ സിറ്റി ജയിച്ച് കേറുകയായിരുന്നു.

രണ്ടാം സ്ഥാനത്തുള്ള മാഞ്ചസ്റ്റർ യൂണൈറ്റഡിനെക്കാൾ ഒരു കളി കൂടുതൽ കളിച്ച സിറ്റിക്ക് പതിമൂന്ന് പോയിന്റ് ലീഡുണ്ട് ഇപ്പോൾ. മറ്റു മത്സരങ്ങളിൽ വെസ്റ്റ് ബ്രോംവിച്ച് ഏകപക്ഷീയമായ ഒരു ഗോളിന് ബ്രൈറ്റനെയും ആസ്റ്റൺ വില്ല ഒരു ഗോളിന് ലീഡ്‌സ് യൂണൈറ്റഡിനെയും തോൽപ്പിച്ചു. ന്യൂ കാസിൽ-വോൾവ്‌സ് മത്സരം ഓരോ ഗോൾ വീതം നേടി സമനിലയിൽ പിരിഞ്ഞു.

ജർമ്മൻ ബുന്ദസ് ലീഗയിൽ റെക്കോർഡ് ചാമ്പ്യന്മാരായ ബയേൺ മ്യൂണിക്കിന് തകർപ്പൻ ജയം. എഫ്.സി കോളനെ ഒന്നിനെതിരെ അഞ്ചു ഗോളുകൾക്കാണ് അവർ തകർത്ത് വിട്ടത്. ബയേണിന്റെ ഗോൾ മെഷീൻ റോബർട്ട് ലെവൻഡോസ്‌കിയും സെർജ് നാബ്രിയും ഇരട്ട ഗോൾ നേടിയപ്പോൾ എറിക്ക് മാക്സിം ചൂപ്പോ മോട്ടിങ് തന്റെ ആദ്യ ലീഗ് ഗോൾ ബയേണിന് വേണ്ടി നേടി.

ബുന്ദസ് ലീഗയിലെ മറ്റു മത്സരങ്ങളിൽ രണ്ടാം സ്ഥാനത്തുള്ള ആർ.ബി ലെയ്‌പ്‌സിഗ് രണ്ടിനെതിരെ മൂന്ന് ഗോളുകൾക്ക് ബൊറൂസ്സിയ മോൺഷെൻ ഗ്ലാഡ്ബാക്കിനെ തോൽപ്പിച്ചു. ബൊറൂസ്സിയ ഡോർട്ട്മുണ്ട് എതിരില്ലാത്ത മൂന്ന് ഗോളുകൾക്ക് അർമീനിയ ബീഫിൽഡിനെയും വോൾഫ്‌സ്ബർഗ് ഹെർത്ത ബെർലിനെയും തോൽപ്പിച്ചു. രണ്ടു പോയിന്റ് ലീഡോടെ ബയേൺ മ്യൂണിക്കാണ് ലീഗിൽ ഒന്നാം സ്ഥാനത്ത്.

സ്‌പാനിഷ്‌ ലാലിഗയിൽ മെസ്സിയുടെ ബാഴ്‌സലോണ എതിരില്ലാത്ത രണ്ടു ഗോളുകൾക്ക് സെവിയ്യയെ തോൽപ്പിച്ചു. ബാഴ്‌സയ്ക്ക് വേണ്ടി ഉസ്മാൻ ഡെംബലെ 29-ആം മിനിട്ടിലും ലയണൽ മെസ്സി 85-ആം മിനിട്ടിലും ഗോൾ നേടി. റയൽ മാഡ്രിഡിനെക്കാൾ ഒരു മത്സരം കൂടുതൽ കളിച്ച ബാർസ 53 പോയിന്റോടെ ലീഗിൽ രണ്ടാം സ്ഥാനത്താണ്.

ഇറ്റാലിയൻ സീരി എയിൽ ക്രിസ്റ്റിയാനോ റൊണാൾഡോയുടെ യുവന്റസിനെ വെറോണ സമനിലയിൽ പൂട്ടി. 49-ആം മിനിറ്റിൽ ഗോളടിച്ച് ലീഡ് നേടിയ റൊണാൾഡോയുടെ സംഘത്തെ 77-ആം മിനിറ്റിൽ വെറോണയുടെ വിങ്ങർ ബരാക്കാണ് ഗോളടിച്ച് സമനിലയിൽ തളച്ചത്. ലീഗിൽ മൂന്നാം സ്ഥാനത്താണ് യുവന്റസ്.