ഇംഗ്ലീഷ് പ്രീമിയര് ലീഗ് ഫുട്ബാളില് തകര്പ്പന് ജയത്തോടെ പ്രതീക്ഷ കാത്ത് ആഴ്സനല്...
ഇംഗ്ലീഷ് പ്രീമിയര് ലീഗ് ഫുട്ബാളില് തകര്പ്പന് ജയത്തോടെ പ്രതീക്ഷ കാത്ത് ആഴ്സനല്. എമിറേറ്റ്സ് സ്റ്റേഡിയമെന്ന സ്വന്തം തട്ടകത്തില് കരുത്തരായ ചെല്സിയെ മറുപടിയില്ലാത്ത അഞ്ചുഗോളുകളുടെ നാണക്കേടില് മുക്കിയാണ് പീരങ്കിപ്പട പോയന്റ് ടേബിളില് വീണ്ടും ഒന്നാമതെത്തിയത്.
ലിയാന്ഡ്രോ ട്രൊസാര്ഡ് തുടക്കം കുറിച്ച ഗോള്വേട്ടക്കുശേഷം കെയ് ഹാവെര്ട്സും ബെന് വൈറ്റും നേടിയ ഇരട്ടഗോളുകള് ആഴ്സനലിനെ ഫൈവ്സ്റ്റാര് ജയത്തിലേക്ക് നയിക്കുകയായിരുന്നു. കഴിഞ്ഞ ദിവസങ്ങളില് പ്രീമിയര് ലീഗില് ആസ്റ്റണ് വില്ലയോടും ചാമ്പ്യന്സ് ലീഗില് ബയേണ് മ്യൂണിക്കിനോടും തോറ്റ നിരാശയില്നിന്ന് കരകയറാന് ആഴ്സനലിണെ തുണക്കുന്നതായിരുന്നു ചെല്സിക്കെതിരായ പ്രകടനം.
34 മത്സരങ്ങളില് 77 പോയന്റുമായി ആഴ്സനല് ഒന്നാമതു നില്ക്കുമ്പോള് ഒരു മത്സരം കുറച്ചുകളിച്ച ലിവര്പൂള് 74 പോയന്റുമായി രണ്ടാമതുണ്ട്. നിലവിലെ ചാമ്പ്യന്മാരായ മാഞ്ചസ്റ്റര് സിറ്റി 73 പോയന്റുമായി മൂന്നാം സ്ഥാനത്താണെങ്കിലും അവര് 32 മത്സരം മാത്രമേ കളിച്ചിട്ടുള്ളൂ. 66 പോയന്റുള്ള ആസ്റ്റണ് വില്ല നാലാമതും 60 പോയന്റുമായി ടോട്ടന്ഹാം അഞ്ചാമതുമാണ്. ശനിയാഴ്ച വെംബ്ലിയില് എഫ്.എ കപ്പ് സെമിഫൈനലില് തോറ്റതിനു പിന്നാലെയാണ് ചെല്സിക്ക് കനത്ത പ്രഹരമേറ്റത്.
"
https://www.facebook.com/Malayalivartha
