ഡോളറിനെതിരെ രൂപയുടെ മൂല്യത്തില്‍ വര്‍ധന. വ്യാപാരത്തിന്റെ തുടക്കത്തില്‍ 26 പൈസയുടെ മുന്നേറ്റമാണ് രൂപയില്‍ കാണപ്പെട്ടത്. 94.96ലേക്കാണ് രൂപ ഉയര്‍ന്നത്. ഇന്ത്യന്‍ സമ്പദ് വ്യവസ്ഥ ശക്തമാണെന്ന കണക്കുകളാണ് രൂപയെ സ്വാധീനിച്ചിട്ടുള്ളത്. തിങ്കളാഴ്ച 21 പൈസയുടെ നേട്ടമാണ് രൂപയ്ക്ക് ഉണ്ടായത്.

ഇന്ത്യന്‍ സമ്പദ് വ്യവസ്ഥയുമായി ബന്ധപ്പെട്ട ജിഡിപി കണക്കുകളാണ് രൂപയ്ക്ക് കരുത്തായത്. ഏപ്രില്‍- ജൂണ്‍ പാദത്തില്‍ രാജ്യം 7.8 ശതമാനം വളര്‍ച്ചയാണ് രേഖപ്പെടുത്തിയ്ട്ടുള്ളത്. അമേരിക്ക- ഇറാന്‍ സംഘര്‍ഷത്തെ തുടര്‍ന്ന് ആഗോള വിപണി അനിശ്ചിതത്വത്തില്‍ തുടരുമ്പോഴും ഇന്ത്യ മികച്ച വളര്‍ച്ച രേഖപ്പെടുത്തിയത് ഇന്ത്യന്‍ സമ്പദ് വ്യവസ്ഥ ശക്തമാണ് എന്നതിന്റെ തെളിവാണെന്നാണ് സാമ്പത്തിക വിദഗ്ധരുടെ വിലയിരുത്തൽ.

അതേസമയം ഇന്ത്യന്‍ സമ്പദ് വ്യവസ്ഥ ശക്തമാണെന്ന ജിഡിപി കണക്കുകള്‍ ഓഹരി വിപണിയില്‍ പ്രതിഫലിച്ചില്ല. വ്യാപാരത്തിന്റെ തുടക്കത്തില്‍ ഓഹരി വിപണി നഷ്ടത്തിലാണ്.

സെന്‍സെക്‌സ് 121 പോയിന്റാണ് താഴ്ന്നത്. ബജാജ് ഫിന്‍സെര്‍വ്, ഇന്റര്‍ഗ്ലോബ് ഏവിയേഷന്‍, ടൈറ്റന്‍, എസ്ബിഐ, ബജാജ് ഫിനാന്‍സ്, ആക്‌സിസ് ബാങ്ക് എന്നിവയാണ് പ്രധാനമായി നഷ്ടം നേരിട്ടത്.