പിഎസ്എസി ഉദ്യോഗാര്‍ത്ഥികള്‍ വലഞ്ഞു; വൊക്കേഷനല്‍ ഇന്‍സ്ട്രക്ടര്‍ ഇന്‍ ഡൊമസ്റ്റിക് നഴ്‌സിങ് പരീക്ഷക്ക് 'അമേരിക്കന്‍ നഴ്‌സിങ് പരീക്ഷ നിരവാരത്തില്‍
വൊക്കേഷനല്‍ ഇന്‍സ്ട്രക്ടര്‍ ഇന്‍ ഡൊമസ്റ്റിക് നഴ്‌സിങ് പരീക്ഷക്ക് 'അമേരിക്കന്‍ നഴ്‌സിങ് പരീക്ഷ' നിലവാരത്തില്‍ ചോദ്യങ്ങള്‍ ചോദിച്ച് പി.എസ്.സി ഉദ്യോഗാര്‍ഥികളെ വട്ടംകറക്കി. ബുധനാഴ്ച വാഹനപണിമുടക്ക് ദിവസം രാവിലെ 7.30ന് നടന്ന പരീക്ഷക്ക് ഏറെ ബുദ്ധിമുട്ടിയെത്തിയവര്‍ക്കാണ് പി.എസ്.സി വക ഇരുട്ടടി. തസ്തികക്ക് ആവശ്യമായ ചോദ്യങ്ങള്‍ ഒഴിവാക്കി ഉയര്‍ന്ന നിലവാരത്തില്‍ ചോദിച്ച് ബുദ്ധിമുട്ടിച്ചത് സംബന്ധിച്ച് ഉദ്യോഗാര്‍ഥികള്‍ പി.എസ്.സി ചെയര്‍മാന് പരാതി നല്‍കി.
ഡൊമസ്റ്റിക് നഴ്‌സിങ് പഠിപ്പിക്കുന്ന വൊക്കേഷനല്‍ ഹയര്‍ സെക്കന്‍ഡറി സ്‌കൂളുകളിലേക്ക് ഇന്‍സ്ട്രക്ടര്‍ തസ്തികയിലേക്ക് സംസ്ഥാനതലത്തില്‍ നിയമനം നടത്താനായിരുന്നു പരീക്ഷ. ജനറല്‍ നഴ്‌സിങ്ങായിരുന്നു അടിസ്ഥാന യോഗ്യത. ജനറല്‍ നഴ്‌സിങ്ങിനും താഴെയുള്ള വി.എച്ച്.എസ്.ഇ ഡൊമസ്റ്റിക് നഴ്‌സിങ് നിലവാരത്തിലുള്ള ചോദ്യങ്ങളായിരുന്നു ഉണ്ടാകേണ്ടിയിരുന്നത്.
പരമാവധി ജനറല്‍ നഴ്‌സിങ് നിലവാരവും. എന്നാല്‍, നഴ്‌സിങ് വിഷയങ്ങളില്‍ നിന്നുവന്ന എല്ലാ ചോദ്യങ്ങളും എം.എസ്‌സി നഴ്‌സിങ്ങിനെക്കാള്‍ ഉയര്‍ന്ന നിലവാരത്തിലായിരുന്നുവെന്ന് ഉദ്യോഗാര്‍ഥികള്‍ പരാതിപ്പെടുന്നു. നഴ്‌സിങ്ങില്‍ എം.എസ്‌സിയും എം.ഫിലും കഴിഞ്ഞവരും പരീക്ഷ എഴുതിയിരുന്നു.
അവര്‍ക്കുപോലും മിനിമം കട്ട് ഓഫ് മാര്‍ക്ക് നേടാന്‍ പറ്റാത്ത തലത്തിലായിരുന്നു ചോദ്യങ്ങള്‍. അമേരിക്കയില്‍ നഴ്‌സിങ് ജോലിക്ക് ആവശ്യമായ 'എന്‍ക്ലെക്‌സ് ആര്‍.എന്‍' പരീക്ഷ രീതിയിലും നിലവാരത്തിലുമായിരുന്നു എല്ലാ ചോദ്യങ്ങളും. ഇത്തരം ചോദ്യങ്ങള്‍ ജനറല്‍ നഴ്‌സിങ് അടിസ്ഥാന യോഗ്യതയായ പി.എസ്.സി പരീക്ഷകള്‍ക്ക് ചോദിക്കാന്‍ പാടില്ലാത്തതായിരുന്നുവെന്ന് ഉദ്യോഗാര്‍ഥികള്‍ പറയുന്നു.
പ്രധാന വിഷയങ്ങള്‍ക്ക് പുറമെ പൊതുവിജ്ഞാനം, സമകാലിക വിഷയങ്ങള്‍, കേരള നവോത്ഥാനം എന്നിവ അടിസ്ഥാനമാക്കിയും ചോദ്യങ്ങളുണ്ടായിരുന്നു. ഇവയില്‍ സമകാലികം എന്ന വിഷയത്തിലെ ചോദ്യങ്ങള്‍ അഞ്ചും ആറും വര്‍ഷം മുമ്പുള്ള സമകാലികമെന്നും പൊതുവിജ്ഞാനങ്ങളില്‍ പിശകുണ്ടായിരുന്നുവെന്നും അവര്‍ വ്യക്തമാക്കി.
2017 ഏപ്രിലിലെ സ്റ്റാഫ് നഴ്‌സ് പരീക്ഷകളിലും ഇത്തരം പരാതികള്‍ പി.എസ്.സിക്കെതിരെ ഉയര്‍ന്നിരുന്നു. ഈ പരീക്ഷയില്‍ പല തെറ്റായ ഉത്തരങ്ങളും അന്തിമ ഉത്തരസൂചികയില്‍ ഇടംപിടിച്ചിരുന്നു. അന്തിമ ഉത്തരസൂചികയില്‍ തെറ്റെന്ന് ബോധ്യമായാലും അവ തിരുത്താറില്ലെന്നും ആക്ഷേപമുണ്ട്. തെറ്റായ ഉത്തരങ്ങള്‍ നല്‍കുന്നതും അതിനെതിരായ അപ്പീല്‍ പരിഗണിക്കാതിരിക്കുന്നതും പതിവായിട്ടുണ്ട്.
അതേസമയം, വൊക്കേഷനല്‍ ഇന്‍സ്ട്രക്ടര്‍ ഇന്‍ ഡൊമസ്റ്റിക് നഴ്‌സിങ് പരീക്ഷ സംബന്ധിച്ച് പരാതികള്‍ ലഭിച്ചിട്ടില്ലെന്നും കിട്ടിയാല്‍ പരിശോധിക്കുമെന്നും പി.എസ്.സി പരീക്ഷ കണ്‍ട്രോളര്‍ അറിയിച്ചു.
https://www.facebook.com/Malayalivartha
