ബോളിവുഡ് താരദമ്പതികളായ കത്രീന കൈഫിനും വിക്കി കൗശലിനും നേരെ സമൂഹമാധ്യമം വഴി അജ്ഞാതന്റെ വധഭീഷണി. ഇൻസ്റ്റഗ്രാമിലൂടെയാണ് ഇരുവർക്കും നേരെ ഭീഷണി മുഴക്കിയിരിക്കുന്നതെന്ന് മുംബൈ പോലീസ് അറിയിച്ചു. ഭീഷണിപ്പെടുത്താൻ ഉപയോക്താവ് വ്യാജ അക്കൗണ്ട് ഉപയോഗിച്ചിരിക്കുന്നത്. സംഭവത്തിൽ അന്വേഷണം തുടങ്ങിയിരിക്കുകയാണ്. കേസ് രജിസ്റ്റർ ചെയ്തിട്ടുണ്ടെന്നും അന്വേഷണം ആരംഭിച്ചതായും മുംബൈ സാന്താക്രൂസ് പോലീസ് അറിയിച്ചു.

താരങ്ങൾക്ക് നേരെ ഇൻസ്റ്റാഗ്രാമിൽ ഭീഷണിയുണ്ടെന്നും വധഭീഷണി മുഴക്കിയ അജ്ഞാതൻ കത്രീന കൈഫിനെ പിന്തുടരുകയും ഭീഷണിപ്പെടുത്തുകയും ചെയ്യുന്നതായി മുംബൈ പോലീസ് പറഞ്ഞു. പ്രതിക്കെതിരെ ഐടി ആക്ട് പ്രകാരമാണ് മുംബൈ പൊലീസ് കേസെടുത്തിരിക്കുന്നത്. പരാതിയുടെ അടിസ്ഥാനത്തിൽ സാന്താക്രൂസ് പോലീസ് അജ്ഞാതർക്കെതിരെ ഇന്ത്യൻ ശിക്ഷാനിയമം 506-II (ക്രിമിനൽ ഭീഷണിപ്പെടുത്തൽ), 354-ഡി (പിന്തുടരൽ) എന്നിവ പ്രകാരം എഫ്‌ഐആർ രജിസ്റ്റർ ചെയ്തിട്ടുണ്ട്.

അടുത്തിടെ വധഭീഷണി നേരിടുന്ന താരങ്ങളുടെ ഒരു നീണ്ട നിരയിലേക്ക് ഇപ്പോൾ കത്രീന കൈഫും വിക്കി കൗശലും കൂടി എത്തിയിരിക്കുകയണ്. കഴിഞ്ഞ ജൂൺ 2022ൽ ബോളിവുഡ് താരമായ സൽമാൻഖാനും അദ്ദേഹത്തിന്റെ അച്ഛനും ഒരു കത്ത് മുഖേന വധഭീഷണി ലഭിക്കുകയുണ്ടായി. മെയ് മാസത്തിൽ വെടിയേറ്റ് മരിച്ച പഞ്ചാബി ഗായകൻ സിദ്ധു മൂസ്വാലയുടെ വിധി അച്ഛനും മകനും നേരിടേണ്ടി വരുമെന്ന് അതിൽ എഴുതിച്ചേർത്തിരുന്നു .

കത്തിന് പിന്നാലെ ബജ്‌രംഗി ഭായ്ജാൻ സിനിമാപ്രവർത്തകർ താരത്തിന്റെ സുരക്ഷ വർധിപ്പിച്ചിട്ടുണ്ട്. തന്റെ സുരക്ഷയ്ക്കായി തോക്ക് ലൈസൻസിന് അപേക്ഷിച്ചതായും റിപ്പോർട്ടുണ്ട്. അതേപോലെ ഈ മാസം ആദ്യം, ബിഗ് ബോസ് താരമായ ഉർഫി ജാവേദ് തനിക്ക്ഇൻസ്റാഗ്രാമിലൂടെ വധഭീഷണി ലഭിച്ചിട്ടുണ്ടെന്നും പോലീസിൽ പരാതിപ്പെടാൻ പോകുന്നു എന്ന് പോസ്റ്റ് ചെയ്തിരുന്നു.

വിക്കി കൗശലും കത്രീന കൈഫും അടുത്തിടെയാണ് മാലദ്വീപ് യാത്ര കഴിഞ്ഞ് തിരിച്ചെത്തിയത്. കത്രീനയുടെ മുപ്പത്തിയൊമ്പതാം പിറന്നാൾ ആഘോഷിക്കാനാണ് തന്റെ ഭർത്താവും നടനുമായ വിക്കിക്കൊപ്പമുള്ള മാലദ്വീപ് യാത്ര. ഡിസംബർ 9 ന് രാജസ്ഥാനിലെ സവായ് മധോപൂരിലെ ആഡംബരപൂർണമായ സിക്‌സ് സെൻസസ് ഫോർട്ട് ബർവാരയിൽ വെച്ചാണ് കത്രീന കൈഫും വിക്കി കൗശലും വിവാഹിതരായത്. ടൈഗർ 3 ആണ് കത്രീന കൈഫിന്റെ അടുത്ത സിനിമ. ടൈഗർ 3 കൂടാതെ, വിജയ് സേതുപതിയുടെ മെറി ക്രിസ്മസ്, ആലിയ ഭട്ട്, പ്രിയങ്ക ചോപ്ര എന്നിവരുമൊത്തുള്ള ജീ ലെ സരാ എന്നിവയാണ്.