പ്രശസ്ത ഫാഷന്‍ ഡിസൈനര്‍ രോഹിത് ബാല്‍ (63) അന്തരിച്ചു. ഡല്‍ഹിയിലെ ആശ്ലോക് ആശുപത്രിയില്‍ വച്ച് ഹൃദയാഘാതത്തെ തുടര്‍ന്നായിരുന്നു അന്ത്യമുണ്ടായത്. ബുധനാഴ്ചയാണ് രോഹിത് ബാലിനെ ആശുപത്രിയില്‍ പ്രവേശിപ്പിച്ചത്.

1986ലാണ് രോഹിത് ബാല്‍ ഫാഷന്‍ ലോകത്തേയ്ക്ക് ചുവടുവയ്ക്കുന്നത്. ചുരുങ്ങിയ സമയം കൊണ്ടുതന്നെ ഫാഷന്‍ മേഖലയില്‍ രോഹിത് തന്റേതായ വ്യക്തിമുദ്ര പതിപ്പിച്ചു.അദ്ദേഹത്തിന്റെ ഡിസൈനുകളില്‍ പലപ്പോഴും പ്രകൃതിയുടെ സാന്നിധ്യം നിറഞ്ഞു നിന്നിരുന്നു.

താമരയുടേയും മയിലിന്റേയും രൂപങ്ങള്‍ ഉപയോഗിച്ചുള്ള ഡിസൈനുകളിലാണ് അദ്ദേഹം അറിയപ്പെട്ടിരുന്നത്. രോഹിത് ബാലിന്റെ ഡിസൈനുകള്‍ ഇന്ത്യയുടെ സംസ്‌കാരത്തോടും ചരിത്രത്തോടും ചേര്‍ന്ന് നിന്നിരുന്നു. 2006ല്‍ ഇന്ത്യന്‍ ഫാഷന്‍ അവാര്‍ഡ്സില്‍ 'ഡിസൈനര്‍ ഓഫ് ദ ഇയര്‍' പുരസ്‌കാരവും രോഹിത് നേടിയിരുന്നു. ഇന്ത്യന്‍ ലക്ഷ്വറി ഫാഷനെ അന്താരാഷ്ട്രതലത്തിലേക്ക് ഉയര്‍ത്തിക്കൊണ്ടുവന്നതില്‍ രോഹിത് ബാല്‍ വലിയ പങ്കുവഹിച്ചു.


അതേസമയം കരീന കപൂര്‍, സോനം കപൂര്‍, അനന്യ പാണ്ഡെ, സല്‍മാന്‍ ഖാന്‍, സിദ്ധാര്‍ത്ഥ് മല്‍ഹോത്ര, കജോള്‍ ഉള്‍പ്പെടെയുള്ള സെലിബ്രിറ്റികള്‍ക്കൊപ്പം അദ്ദേഹം പ്രവര്‍ത്തിച്ചിട്ടുണ്ട്. താരങ്ങളടക്കം നിരവധി പേരാണ് രോഹിത് ബാലിന് അനുശോചനം രേഖപ്പെടുത്തിയത്.