പ്രശസ്ത ബോളിവുഡ് സംവിധായകനും, ബാലതാരമായിരുന്ന ബേബി ഗുഡുവിന്റെ പിതാവുമായ എം.എം. ബെയ്ഗിനെ (70) മുംബൈയിലെ വസതിയിൽ മരിച്ച നിലയിൽ കണ്ടെത്തി. അസുഖബാധിതനായിരുന്ന അദ്ദേഹത്തെ വീടിനുള്ളിൽ മരിച്ച നിലയിൽ കണ്ടെത്തുകയായിരുന്നുവെന്ന് പിആർഒ ഹനീഫ് സാവേരി അറിയിക്കുകയായിരുന്നു.

നാലഞ്ച് ദിവസമായി അദ്ദേഹത്തെ വീടിന് പുറത്തേക്ക് കണ്ടിരുന്നില്ല. വീടിനുള്ളിൽ നിന്ന് ദുർഗന്ധം വമിച്ചതിനെത്തുടർന്ന് അയൽവാസികൾ പോലീസിൽ വിവരമറിയിച്ചു. തുടർന്ന് പോലീസ് വാതിൽ തുറന്ന് നടത്തിയ പരിശോധനയിലാണ് മൃതദേഹം കണ്ടെത്തിയതെന്ന് പിടിഐ റിപ്പോർട്ടിൽ പറയുന്നു. പോസ്റ്റ്‌മോർട്ടം നടപടികൾക്കായി മൃതദേഹം കൂപ്പർ ആശുപത്രിയിലേക്ക് മാറ്റി.

ജെ. ഓം പ്രകാശ്, വിമൽ കുമാർ, രാകേഷ് റോഷൻ എന്നിവരുടെ സഹായിയായാണ് ബെയ്ഗ് തന്റെ ചലച്ചിത്ര ജീവിതം ആരംഭിച്ചത്. ഷിൽപ ഷിരോദ്കർ നായികയായ ചോട്ടി ബഹു (1994) ആണ് അദ്ദേഹം സ്വതന്ത്രമായി സംവിധാനം ചെയ്ത ശ്രദ്ധേയമായ ചിത്രം. നസീറുദ്ദീൻ ഷാ നായകനായ മാസൂം ഗവാഹ് (1990) എന്ന ചിത്രവും അദ്ദേഹം സംവിധാനം ചെയ്തെങ്കിലും റിലീസായില്ല.

ബോളിവുഡ് താരം ഹൃത്വിക് റോഷനുമായി അടുത്ത ബന്ധം പുലർത്തിയിരുന്ന വ്യക്തിയായിരുന്നു ബെയ്ഗ്. ഹൃത്വിക്കിന്റെ അരങ്ങേറ്റ ചിത്രമായ കഹോ നാ പ്യാർ ഹേയ്ക്ക് മുൻപുതന്നെ താരത്തെ സംഭാഷണ ശൈലിയിലും ശബ്ദ നിയന്ത്രണത്തിലും പരിശീലിപ്പിച്ചിരുന്നത് ബെയ്ഗ് ആയിരുന്നു.