മലയാളത്തിലെ ഏറ്റവും ചെലവേറിയ ചിത്രങ്ങളിലൊന്നായ ഒടിയന്‍ റിലീസാകാന്‍ ഇനി മൂന്ന് മാസം കാത്തിരിക്കണം. ഒക്ടോബര്‍ 11ന് രാവിലെ ഏഴ് മണി ഒന്‍പത് മിറ്റിനാണ് റിലീസംഗ് സമയം. എന്തിനാണ് ഈ സമയം തെരഞ്ഞെടുത്തതെന്ന് വഴിയേ പറയാം. ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂര്‍ നിര്‍മിക്കുന്ന ഒടിയന്റെ ചിത്രീകരണം തുടങ്ങിയിട്ട് ഒരു വര്‍ഷത്തിലേറെയായി. കഴിഞ്ഞ വര്‍ഷം ജൂലൈ രണ്ടിനാണ് ഒടിയന്റെ ആദ്യ പോസ്റ്റര്‍ ഇറങ്ങിയത്. ജൂലൈ അഞ്ചിന് പൂജ നടന്നു. അന്ന് മുതല്‍ ഒടിയനെ എന്ന് ബിഗ് സ്‌ക്രീനില്‍ കാണാനാവും എന്ന ഒട്ടേറെ ചോദ്യങ്ങള്‍ക്കും സംശയങ്ങള്‍ക്കുമുള്ള അവസാനമാണ് ഒക്ടോബര്‍ 11. 

ഒരു കുടുംബമായിരുന്ന് ആന്റണി പെരുമ്പാവൂരിന്റെ നേതൃത്വത്തില്‍ പ്രൊഡക്ഷന്‍ ബോയ് വരെയുള്ള ഓരോരുത്തരും ഒരുവര്‍ഷത്തോളം കണ്ടസ്വപ്‌നങ്ങള്‍ സാക്ഷാത്കരിക്കുന്ന ദിവസം കൂടിയാണ്ഒക്ടോബര്‍ 11. പ്രേക്ഷകര്‍ ഓരോരുത്തരും നല്‍കിയ പ്രചോദനവും ധൈര്യവും തന്നെയാണ് ഈ ദിവസം വരെ എത്തിച്ചതെന്ന് സംവിധായകന്‍ ശ്രീകുമാര്‍ പറഞ്ഞു. കാത്തിരുന്നതിനും കൂടെ നിന്നതിനും നന്ദി. ഒടിവിദ്യകളും മായക്കാഴ്ചകളും അണിയറയില്‍ ഒരുങ്ങിക്കഴിഞ്ഞു. ശേഷം ഭാഗം, സ്‌ക്രീനില്‍!- എന്നാണ് സംവിധായകന്‍ പറയുന്നത്.

മലയാളത്തിലെ പ്രമുഖ താരങ്ങളും നിരവധി ജൂനിയര്‍ ആര്‍ടിസ്റ്റുകളും സിനിമയില്‍ അണിനിരക്കുന്നു. മഞ്ജുവാര്യരാണ് നായിക. പ്രകാശ് രാജ്, സിദ്ധിഖ് തുടങ്ങിയ വലിയ താരനിരയും ചിത്രത്തിലുണ്ട്. മോഹന്‍ലാല്‍ പല ഗെറ്റപ്പുകളിലാണ് പ്രത്യക്ഷപ്പെടുന്നത്. പീറ്റര്‍ഹെയ്‌നാണ് ആക്ഷന്‍ ഡയറക്ടര്‍. പാലക്കാട്ടെ ഗ്രാമങ്ങളില്‍ പണ്ട് ഉണ്ടായിരുന്ന ഓടിയന്‍മാരുടെ കഥയാണ് മാണിക്യനിലൂടെ അവതരിപ്പിക്കുന്നത്. പാലക്കാടിന്റെ വിദൂര ഗ്രാമങ്ങളിലും ഹരിദ്വാറിലും മറ്റുമായിരുന്നു ചിത്രീകരണം. മോഹന്‍ലാലിന്റെ ശരീരപ്രകൃതി മാറുന്നതിനായി പല ഷെഡ്യൂഷുകളായാണ് ഒടിയന്‍ പൂര്‍ത്തീകരിച്ചത്.

100 കോടി ക്ലബിലെത്തുക എന്നതാണ് ഒടിയന്‍ ടീമിന്റെ ലക്ഷ്യം. അതിനായി വിഷ്വല്‍ എഫക്‌സിന്റെ മാജിക്ക് തന്നെ സിനിമയിലുണ്ടാവും. അതിന്റെ ജോലികള്‍ പുരോഗമിക്കുകയാണ്. 2016 ഒക്ടോബര്‍ ഏഴിനാണ് പുലിമുരുകന്‍ പ്രദര്‍ശനത്തിനെത്തിയത്. 25 കോടി ബജറ്റുണ്ടായിരുന്ന ചിത്രം 152 കോടി കളക്ട് ചെയ്തു. അതുകൊണ്ട് ഒടിയനും മറ്റൊരു ഒക്ടോബറില്‍ പ്രേക്ഷകരെ തേടിയെത്തും. എന്നാല്‍ തിയതിയും സമയം മാറും. ജ്യോത്സ്യന്റെ നിര്‍ദ്ദേശപ്രകാരമാണ് അണിയറപ്രവര്‍ത്തകര്‍ രാവിലെ ഏഴ് മണി ഒമ്പത് മിനിറ്റ് എന്ന സമയം തെരഞ്ഞെടുത്തത്.