വനിതാ സംഘടനയായ ഡബ്ല്യൂ.സി.സിയിലെ ഒരാളും കഴിഞ്ഞ ജനറല്‍ ബോഡി യോഗത്തില്‍ മത്സരിക്കണമെന്ന് അറിയിച്ചിരുന്നില്ലെന്ന അമ്മ പ്രസിഡന്റ് മോഹന്‍ലാലിന്റെ വാദം തള്ളി നടി പത്മപ്രിയ. ജനറല്‍ ബോഡി യോഗത്തില്‍ മത്സരിക്കാനുള്ള താത്പര്യം പാര്‍വതി അറിയിച്ചിരുന്നെന്നും എന്നാല്‍ സെക്രട്ടറി ഇടപെട്ട് പാര്‍വതിയെ പിന്തിരിപ്പിക്കുകയായിരുന്നുവെന്നും പത്മപ്രിയ പറഞ്ഞു. അമ്മയില്‍ ജനാധിപത്യം ഇല്ലെന്നും ഭാഹവാഹികളെ മുന്‍കൂട്ടി നിശ്ചയിച്ചതിന് ശേഷമാണ് ജനറല്‍ ബോഡി ചേരുന്നതെന്നും ഒരു സ്വകാര്യ ചാനലിനോട് പത്മപ്രിയ പറഞ്ഞു.

അമ്മയുടെ പരിപാടിക്കിടെ അവതരിപ്പിച്ച ഒരു സ്‌കിറ്റ് തമാശയായി കാണണമെന്ന് പറഞ്ഞ മോഹന്‍ലാലിന്റെ നിലപാടിനോട് യോജിക്കാനാവില്ലെന്നും സ്ത്രീകളെ അപമാനിക്കുന്നതാണെന്ന് വിമര്‍ശനത്തില്‍ ഉറച്ച്‌ നില്‍ക്കുന്നുവെന്നും പത്മപ്രിയ വ്യക്തമാക്കി. റിമ കല്ലിങ്കല്‍, ഗീതു മോഹന്‍ദാസ്, രമ്യ നമ്ബീശന്‍, ഭാവന എന്നിവ‌ര്‍ രാജിക്കത്ത് നല്‍കിയിട്ടുണ്ടെന്നും എന്നാല്‍ രാജിക്കത്ത് കിട്ടിയിട്ടില്ലെന്ന് മോഹന്‍ലാല്‍ പറയുന്നത് എന്ത് കൊണ്ടാണെന്ന് അറിയില്ലെന്നും പത്മപ്രിയ പറഞ്ഞു. അമ്മയുമായി ബന്ധപ്പെട്ട് നിലനില്‍ക്കുന്ന പ്രശ്‌നങ്ങളില്‍ വിശദീകരണത്തിന് കൊച്ചിയില്‍ വിളിച്ചു ചേര്‍ത്ത വാര്‍ത്താ സമ്മേളനത്തിലാണ് മോഹന്‍ലാല്‍ ഇക്കാര്യങ്ങള്‍ വ്യക്തമാക്കിയത്.