മലയാളസിനിമയിലെ തിന്‍മകള്‍ക്കെതിരെ പടവാളുയര്‍ത്തുന്ന പാര്‍വതിയും അതിന് പിന്തുണ നല്‍കുന്ന പൃഥ്വിരാജും തങ്ങളുടെ പുതിയ സിനിമയായ മൈസ്റ്റോറിയുടെ പ്രമോഷനുമായി യാതരു തരത്തിലും സഹകരിക്കാത്തതിന് കാരണം ഇതാണ്
മലയാളസിനിമയിലെ തിന്‍മകള്‍ക്കെതിരെ പടവാളുയര്‍ത്തുന്ന പാര്‍വതിയും അതിന് പിന്തുണ നല്‍കുന്ന പൃഥ്വിരാജും തങ്ങളുടെ പുതിയ സിനിമയായ മൈസ്റ്റോറിയുടെ പ്രമോഷനുമായി യാതരു തരത്തിലും സഹകരിച്ചില്ലെന്ന് സംവിധായിക റോഷ്‌നി ദിനകര്‍ പ്രതികരിച്ചു. വിദേശത്തായ പാര്‍വതി സിനിമയിറങ്ങി ഒരാഴ്ച കഴിഞ്ഞാണ് ഓണ്‍ലൈന്‍ പ്രമോഷനുമായി സഹകരിക്കാമെന്ന് സമ്മതിച്ചത്. തന്റെ എട്ട് നിലയില്‍ പൊട്ടിയ സിനിമകള്‍ വരെ ഗംഭീരമാണെന്ന് ചാനലുകളിലൂടെയും ഓണ്‍ലൈനിലൂടെയും തള്ളിയിരുന്ന പൃഥ്വിരാജ് കേരളത്തിലുണ്ടായിരുന്നിട്ടും മൈസ്റ്റോറിയുടെ പ്രമോഷന് വേണ്ടി ഒന്നും ചെയ്തില്ല. എന്താണെന്ന് മലയാളി വാര്‍ത്ത അന്വേഷിച്ചപ്പോള്‍ കിട്ടിയ വിവരങ്ങള്‍ ഇതാണ്...
ജൂലൈ ആറിനാണ് മൈസ്‌റ്റോറി റിലീസായത്, ഒന്‍പതിന് ശേഷം ആ സിനിമയെ പൃഥ്വിരാജ് ഓണ്‍ലൈനിലൂടെ പ്രമോട്ട് ചെയ്തിട്ടില്ല. അതേസമയം അതിന് മുമ്പും ഇപ്പോഴും അദ്ദേഹത്തിന്റെ കൂടെ എന്ന സിനിമയെ ഇപ്പോഴും പ്രമോട്ട് ചെയ്യുന്നു. മാത്രമല്ല സംവിധാനം ചെയ്യാന്‍ പോകുന്ന ലൂസിഫര്‍ എന്ന സിനിമയുടെ പോസ്റ്റര്‍ ഉള്‍പ്പടെ ഫെയിസ്ബുക്കിലൂടെ പുറത്തിറക്കുകയും ചെയ്തു. കൂടെയുടെ റിലീസിനോട് അനുബന്ധിച്ച് പൃഥ്വിരാജ് ഫാന്‍സ് അസോസിയേഷന്റെ നല്ല സഹകരണവും ഉണ്ടായിരുന്നു. പക്ഷെ, പാര്‍വതിയെ സ്‌ക്രീനില്‍ കാണിക്കുമ്പോള്‍ കൂ വിളികള്‍ ഉണ്ടായിരുന്നു. എന്നാല്‍ മൈസ്റ്റോറിയുടെ റിലീസുമായി ബന്ധപ്പെട്ട് ഫാന്‍സുകാരുടെ വലിയ സഹകരണം ഉണ്ടായില്ല. പൃഥ്വിരാജിന് സിനിമയോടുള്ള താല്‍പര്യക്കുറവാണ് ഇതിന് പിന്നിലെന്ന് അറിയുന്നു.
18 കോടി മുടക്കി സംവിധായിക റോഷ്‌നി ദിനകറും ഭര്‍ത്താവും നിര്‍മിച്ച മൈസ്‌റ്റോറി അടുത്ത് കാലത്ത് ഇറങ്ങിയ പൃഥ്വിരാജ് സിനിമകളില്‍ ഏറ്റവും വലിയ പരാജയമാകാനാണ് സാധ്യത. രണ്ട് സിനിമകളും ഒരേ സമയം റിലീസ് ചെയ്യരുതെന്ന് പൃഥ്വിരാജ് അണിയറപ്രവര്‍ത്തകരോട് പറഞ്ഞിരുന്നു. മൈസ്റ്റോറിയുടെ ചിത്രീകരണം പോര്‍ച്ചുഗലില്‍ ആയിരുന്നു. ചിത്രീകരണം തുടങ്ങിയ ശേഷം പൃഥ്വിരാജ് സംവിധായികയുടെ ജോലിയില്‍ ഇടപെട്ട് തുടങ്ങി. പലപ്പോഴും ഷോട്ടുകള്‍ വരെ പൃഥ്വിരാജ് പറയാന്‍ തുടങ്ങിയപ്പോള്‍ സംവിധായികയുടെ ഭര്‍ത്താവും നിര്‍മാതാവുമായ ദിനകര്‍ ഇടപെട്ടു. റോഷ്‌നിയെ മാറ്റിനിര്‍ത്താം താങ്കള്‍ തന്നെ സംവിധാനം ചെയ്‌തോളൂ എന്ന് പറഞ്ഞു. അവിടെ മുതല്‍ സംവിധായികയും നായകനും തമ്മില്‍ അകല്‍ച്ച തുടങ്ങി. ഈ സന്ദര്‍ഭത്തില്‍ പാര്‍വതി പൃഥ്വിരാജിനൊപ്പമാണ് നിന്നതെന്ന് സിനിമയുടെ ക്രൂവിലുള്ള ചിലര്‍ പറഞ്ഞു.
സംവിധായികയും പൃഥ്വിരാജും തമ്മിലുള്ള അഭിപ്രായഭിന്നത ചിത്രീകരണത്തെ ബാധിച്ചു. പറഞ്ഞ സമയത്ത് ചിത്രീകരണം പൂര്‍ത്തിയാക്കാനായില്ല. പോര്‍ച്ചുഗലില്‍ നിന്ന് കേരളത്തിലെത്തിയ പൃഥ്വിരാജ് മറ്റ് സിനിമകളില്‍ അഭിനയിച്ചു. മൈസ്റ്റോറിയുടെ ബാക്കിഭാഗം ചിത്രീകരിക്കാന്‍ പൃഥ്വിരാജ് സഹകരിച്ചില്ല. ഒടുവില്‍ ഫിലിംചേമ്പറിന് പരാതി നല്‍കിയ ശേഷമാണ് പൃഥ്വിരാജ് അഭിനയിച്ചത്. പക്ഷെ, ലൊക്കേഷനില്‍ സംവിധായികയും നായകനും പരസ്പ്പരം കണ്ടാല്‍ സംസാരിക്കാറില്ലായിരുന്നു. ക്യാമറാമാനാണ് ഇരുവരുടെയും ഇടയില്‍ പാലമായി നിന്ന് സിനിമ പൂര്‍ത്തിയാക്കാന്‍ റിസ്‌ക്ക് എടുത്തതെന്ന് ക്രൂവിലുണ്ടായിരുന്നവരില്‍ ചിലര്‍ മലയാളിവാര്‍ത്തയോട് പറഞ്ഞു. പൃഥ്വിരാജ് പുതിയ സംവിധായകര്‍ക്ക് ഡേറ്റ് നല്‍കുകയും അവരുടെ ജോലിയില്‍ ഇടപെടുകയും ചെയ്യുന്നത് ആദ്യമായല്ലെന്ന് ഇന്‍ഡസ്ട്രിയില്‍ മുമ്പും വിമര്‍ശനങ്ങള്‍ ഉണ്ടായിട്ടുണ്ട്.
https://www.facebook.com/Malayalivartha
