മഴ വില്ലനായി; മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ലൂസിഫര്‍ ഇടുക്കിയില്‍ നിന്ന് തിരുവനന്തപുരത്തെത്തി
മോഹന്‍ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ലൂസിഫര്‍ തിരുവനന്തപുരത്തേക്ക് ഷിഫ്റ്റ് ചെയ്തു. ഇടുക്കിയിലെ വണ്ടിപ്പെരിയാറിലും പരിസരത്തുമായിരുന്നു ചിത്രീകരണം നടന്നിരുന്നത്. എന്നാല്‍ മഴ ശക്തമായതോടെ ക്രൂ തിരുവനന്തപുരത്തേക്ക് വരുകയായിരുന്നു. ഇടുക്കിയിലെ ശക്തമായ മഴ കാരണം ഒരു ദിവസം മുഴുവന്‍ ഷൂട്ടിംഗ് മുടങ്ങിയതിനെ തുടര്‍ന്നാണ് ലൊക്കേഷന്‍ മാറ്റാന്‍ തീരുമാനിച്ചത്. സംസ്ഥാനത്തിന്റെ പല ഭാഗങ്ങളിലും ശക്തമായ മഴ പെയ്യുന്നുണ്ടെങ്കിലും തിരുവനന്തപുരത്ത് താരതമ്യേന കുറവാണ്. തുടര്‍ന്നാണ് ഇവിടേക്ക് വന്നത്. തിരുവനന്തപുരം നഗരത്തില്‍ കിഴക്കേകോട്ടയ്ക്ക് അടുത്ത് കുതിരമാളികയിലാണ് ചിത്രീകരണം പുരോഗമിക്കുന്നത്.
കുതിരമാളികയില്‍ ചിത്രീകരണം ആരംഭിച്ചിട്ട് രണ്ട് ദിവസമായെങ്കിലും മോഹന്‍ലാല്‍ പങ്കെടുക്കുന്നില്ല. പരസ്യത്തിന്റെ ഷൂട്ടിംഗിനായി അദ്ദേഹം കൊച്ചിയിലാണ്. പതിനാറാം തീയതിയേ മോഹന്‍ലാല്‍ എത്തൂ. നിരവധി മോഹന്‍ലാല്‍ സിനിമകളും സീരിയലുകളും കുതിരമാളികയിയല്‍ ഷൂട്ട് ചെയ്തിട്ടുണ്ട്. മോഹന്‍ലാല്‍ ഷാജി കൈലാസ് ടീമിന്റെ താണ്ഡവം റാഫി മെക്കാര്‍ട്ടിന്റെ ഹലോ, വില്ലന്‍ തുടങ്ങി ധാരാളം സിനിമകള്‍ ഇവിടെയാണ് ചിത്രീകരിച്ചത്. പൃഥ്വിരാജ് നായകനായ തേജാഭായിയുടെ പ്രധാന ലൊക്കേഷനും കുതിരമാളിക തന്നെ. ലൊക്കേഷന്‍ തിരുവനന്തപുരത്തേക്ക് മാറിയതോടെ പൃഥ്വിരാജിനും തിരക്കഥാകൃത്ത് മുരളി ഗോപിക്കും സ്വന്തം വീട്ടില്‍ താമസിക്കാം. മോഹന്‍ലാലിന് തിരുവനന്തപുരത്ത് വീടും ഫഌറ്റും ഉണ്ടെങ്കിലും കുറേ നാളായി അദ്ദേഹം നഗരത്തിലെത്തിയാല്‍ താജിലാണ് തങ്ങുന്നത്.
മോഹന്‍ലാലിന് പുറമേ മഞ്ജുവാര്യര്‍, വിവേക് ഒബ്‌റോയ്, ടൊവിനോ, ഇന്ദ്രജിത്ത്. സാനിയ, മംമ്ത, കലാഭവന്‍ ഷാജോണ്‍, സായ്കുമാര്‍, ബൈജു, ബാബുരാജ്, സംവിധായകന്‍ ഫാസില്‍ എന്നിവരാണ് മറ്റ് പ്രധാനതാരങ്ങള്‍. ഒരു പാട് പൃഥ്വിരാജ് സിനിമകളുടെ ക്യാമറാമാനായിരുന്ന സുജിത് വാസുദേവാണ് ലൂസിഫറിന്റെ ഛായാഗ്രഹണം നിര്‍വഹിക്കുന്നത്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മിക്കുന്നത്. അടുത്ത വര്‍ഷം ആദ്യം റിലീസ് ചെയ്യാനാണ് അണിയറപ്രവര്‍ത്തകര്‍ ആലോചിക്കുന്നത്.
https://www.facebook.com/Malayalivartha
