മഞ്ജുവാര്യരും മോഹന്ലാലും പൃഥ്വിരാജും ഒരു മാസക്കാലം തലസ്ഥാനത്ത്
മഞ്ജുവാര്യരും മോഹന്ലാലും പൃഥ്വിരാജും ഒരു മാസക്കാലം തലസ്ഥാനത്ത്. മോഹന്ലാലിനെ നായകനാക്കി പൃഥ്വിരാജ് സംവിധാനം ചെയ്യുന്ന ലൂസിഫറില് അഭിനയിക്കുന്നതിനാണ് താരങ്ങള് തിരുവനന്തപുരം നഗരത്തിലെത്തിയത്. കിഴക്കേകോട്ടയിലെ പ്രശസ്തമായ കുതിരമാളികയിലും പരിസത്തുമാണ് ചിത്രീകരണം പുരോഗമിക്കുന്നത്. ആശീര്വാദ് സിനിമാസിന്റെ ബാനറില് ആന്റണി പെരുമ്പാവൂര് നിര്മിക്കുന്ന ചിത്രത്തിന് മുരളിഗോപിയാണ് തിരക്കഥ എഴുതുന്നത്. പരസ്യചിത്രത്തിന്റെ തിരക്ക് കഴിഞ്ഞ് ചൊവ്വാഴ്ചയാണ് മോഹന്ലാല് തിരുവനന്തപുരത്തെ ലൊക്കേഷനില് ജോയിന് ചെയ്തത്. ഇടുക്കിയിലെ വണ്ടിപെരിയാറില് രണ്ടാഴ്ചയോളം ഷൂട്ടിംഗ് ഉണ്ടായിരുന്നു.
തിങ്കളാഴ്ച രാവിലെ മുതല് തലസ്ഥാനത്തെ ചിത്രീകരണം തുടങ്ങി. രാത്രി മഞ്ജുവാര്യരും പൃഥ്വിരാജും ഇന്ദ്രന്സിനെ ആദരിക്കാന് കഴക്കൂട്ടം പൗരാവലി കനകക്കുന്നില് സംഘടിപ്പിച്ച ചടങ്ങില് പങ്കെടുത്തിരുന്നു. വില്ലനില് അഭിനയിക്കുന്നതിനാണ് മോഹന്ലാലും മഞ്ജുവാര്യരും ഇതിന് മുമ്പ് തലസ്ഥാനത്തെത്തിയത്. അന്ന് ചിത്രാഞ്ജലി സ്റ്റുഡിയോയിലായിരുന്നു ചിത്രീകരണം. പൃഥ്വിരാജിന്റെ 9 എന്ന സിനിമയുടെ ചിലഭാഗങ്ങള് രണ്ട് മാസം മുമ്പ് തലസ്ഥാനത്ത് ചിത്രീകരിച്ചിരുന്നു. തിരുവനന്തപുരത്തുകാരാണെങ്കിലും മോഹന്ലാലും പൃഥ്വിരാജും കുറേ വര്ഷമായി കൊച്ചിയിലാണ് താമസം. ഇരുവര്ക്കും തലസ്ഥാനത്ത് വീടുകളുണ്ട്.
അഭിനയത്തിന്റെ രണ്ടാംവരവില് മഞ്ജുവാര്യര് തലസ്ഥാനത്തെ സ്ഥിരം സാനിധ്യമാണ്. താരത്തിന്റെ സൂപ്പര്ഹിറ്റ് ചിത്രമായ ഉദാഹരണം സുജാത ഈ നഗരത്തിന്റെ പശ്ചാത്തലത്തിലാണ് എടുത്തത്. തലസ്ഥാനത്തെ മിക്കപരിപാടികളിലും താരത്തിന്റെ സജീവസാനിധ്യമുണ്ടാകും. ഏറ്റവും അവസാനമായി സാക്ഷരതാ മിഷന്റെ ഗുഡ്വില് അംബാസിഡറായി മഞ്ജു ചുമതലയേറ്റിരിക്കുകയാണ്. അതിന്റെ ചടങ്ങും തലസ്ഥാനത്ത് നടന്നു. തീരദേശത്തെ ഓഖി ദുരിതബാധിത മേഖല സന്ദര്ശിച്ച്, സ്ത്രീകളെയും കുട്ടികളെയും മഞ്ജുവാര്യര് ആശ്വസിപ്പിച്ചിരുന്നു. അവര്ക്ക് വേണ്ട സഹായം സര്ക്കാര് ഫണ്ടിലേക്ക് നല്കിയിരുന്നു.
https://www.facebook.com/Malayalivartha