വിവാദങ്ങളിൽ നിന്നും കുതറിമാറിയ മോഹൻലാലിന്റെ ബിഗ് ബജറ്റ് ചിത്രമായ ഒടിയൻ ഒക്ടോബർ 11 ന് റിലീസ് ചെയ്യാനിരിക്കെ മോഹൻലാൽ അതിഥി താരമായി അഭിനയിച്ച കായംകുളം കൊച്ചുണ്ണി, ഡ്രാമ തുടങ്ങിയ ചിത്രങ്ങൾ സെപ്റ്റംബറിൽ റിലീസ് ചെയ്യും. ഒടിയനൊപ്പം മൂന്നു ചിത്രങ്ങളും ഒക്ടോബറിൽ റിലീസ് ചെയ്യാനുള്ള തീരുമാനം പിൻവലിച്ചേക്കും.

മൂന്ന് മോഹൻലാൽ ചിത്രങ്ങൾ ഒരുമിച്ച് ഇറങ്ങിയാൽ അത് ബിസിനസിനെ ബാധിക്കുമെന്നാണ് കണക്കുകൂട്ടൽ. കൊച്ചുണ്ണിയിൽ നിവിൻ പോളിയാണ് നായകനെങ്കിലും മോഹൻലാൽ അതിഥിതാരമായതിനാൽ അതിനെയും മോഹൻലാൽ സിനിമയെന്ന് വിശേഷിപ്പിക്കേണ്ടി വരും. രഞ്ജിത്തിന്റെ ഡ്രാമ ഒരു ക്ലാസ് ചിത്രമായിരിക്കും.

നീരാളിയുടെ ബോക്സ് ഓഫീസ് തകർച്ചയിൽ നിന്നും മോഹൻലാൽ ഒരുപാട് കാര്യങ്ങൾ പഠിച്ചു. അതിന്റെ അടിസ്ഥാനത്തിലാണ് അമ്മയുമായി ബന്ധപ്പെട്ട തന്റെ മുൻ നിലപാടുകൾ അദ്ദേഹം തിരുത്തിയത്. ആരോപണ വിധേയനായ സഹായിക്കുന്നു എന്നു പേരുള്ള ഇടവേള ബാബുവിനെ പോലുള്ള താരങ്ങളുമായുള്ള സൗഹൃദത്തിൽ അദ്ദേഹം ചെറിയൊരു അകൽച്ച സൂക്ഷിച്ചു. പകരം ഇതുവരെ ലൈം ലൈറ്റിൽ ഇല്ലാതിരുന്ന ജഗദീഷിനെ പോലുള്ള താരങ്ങളുമായി സൗഹൃദം സ്ഥാപിച്ചു. അവരെ പത്രസമ്മേളനങ്ങളിൽ ഒപ്പമിരുത്താൻ ശ്രമിച്ചു.

പ്രളയം മോഹൻലാലിനെ വളരെയേറെ സഹായിച്ചു. അദ്ദേഹം മുഖ്യമന്ത്രിയെ കണ്ട് തന്റെ സംഭാവന കൈമാറിയത് വലിയ വാർത്തയായി. മുഖ്യമന്ത്രിയും സർക്കാരുമായുള്ള ബന്ധം പുനർനിർമ്മിച്ചു. എല്ലാവരോടും വിനയാന്വിതമായി പെരുമാറി തന്റെ നിഷ്പക്ഷത അദ്ദേഹം വെളിപ്പെടുത്തി. കേരളം സ്ത്രീകളെ ബലാൽസംഗം ചെയ്യാൻ ക്വട്ടേഷൻ കൊടുക്കുന്നവരെ അംഗീകരിക്കില്ലെന്ന വാസ്തവം ലാൽ തിരിച്ചറിഞ്ഞു.

എറണാകുളം പ്രസ് ക്ലബിൽ ആരോപണ വിധേയനായ നടനെ പരോക്ഷമായി അനുകൂലിച്ച് നടത്തിയ പത്രസമ്മേളനം തനിക്ക് വിനയായെന്ന് അദ്ദേഹം തിരിച്ചറിഞ്ഞു. അതു തന്നെയാണ് മോഹൻലാലിന്റെ വിജയം. നഷ്ടപ്പെട്ട ഇമേജ് ഏതാനും ദിവസങ്ങൾ കൊണ്ട് അദ്ദേഹം തിരിച്ചുപിടിച്ചു. ഇതാണ് ബുദ്ധി. സ്വയം രക്തസാക്ഷിയാകാൻ താൻ തയ്യാറല്ലെന്ന ബുദ്ധി.

മോഹൻലാൽ കൂടുതൽ ജനപ്രീതിയാർജിച്ച് കഴിഞ്ഞു. വരാൻ പോകുന്നത് ചിത്രങ്ങൾ കൂടുതൽ വലിയ വിജയമാകുമെന്ന് അദ്ദേഹം തിരിച്ചറിഞ്ഞിരിക്കുന്നു. തിരുവനന്തപുരത്ത് ചിത്രീകരണം പുരോഗമിക്കുന്ന ലൂസിഫറിന്റെ ലൊക്കേഷനിൽ ലാലിന്റെ ഊർജം കണ്ടറിയാൻ കഴിയും. വളരെ നാളുകൾക്ക് ശേഷമാണ് അദ്ദേഹം മന:സമാധാനം അനുഭവിക്കുന്നതെന്ന് വ്യക്തം.