കേരളത്തെ പുനര്‍നിര്‍മിക്കാനുള്ള പ്രവര്‍ത്തനങ്ങള്‍ക്ക് പണം സമാഹരിക്കാന്‍ താരങ്ങളെ അണിനിരത്തി സ്‌റ്റേജ് ഷോ സംഘടിപ്പിക്കാന്‍ അമ്മ
പ്രളയത്തില്‍ തകര്‍ന്ന കേരളത്തെ പുനര്‍നിര്‍മിക്കാനുള്ള പ്രവര്‍ത്തനങ്ങള്‍ക്ക് ധനം സമാഹരിക്കാന്‍ അഭിനേതാക്കളുടെ സംഘടന. താരങ്ങളെ അണിനിരത്തി സ്‌റ്റേജ് ഷോ സംഘടിപ്പിച്ച് പണം സമാഹരിക്കുകയാണ് ലക്ഷ്യം. ഇതുസംബന്ധിച്ച് സര്‍ക്കാറുമായി ഉടന്‍ ചര്‍ച്ച നടത്തുമെന്ന് 'അമ്മ' ജനറല്‍ സെക്രട്ടറി ഇടവേള ബാബുവാണ് അറിയിച്ചത്
ദുരിതബാധിതരെ സഹായിക്കാനുള്ള ആദ്യഘട്ടമെന്ന നിലയില്‍ 'അമ്മ'യുടെ വിഹിതമായി പത്തുലക്ഷം രൂപ പ്രസിഡന്റ് മോഹന്‍ലാല്‍ മുഖ്യമന്ത്രിയുടെ ദുരിതാശ്വാസ നിധിയിലേക്ക് നല്‍കിയിരുന്നു. മമ്മൂട്ടി, മോഹന്‍ലാല്‍, ദുല്‍ഖര്‍ സല്‍മാന്‍ തുടങ്ങിയവര്‍ സ്വന്തംനിലക്കും സംഭാവനകള്‍ നല്‍കി. എന്നാല്‍, ദുരിതാശ്വാസ പ്രവര്‍ത്തനങ്ങള്‍ക്ക് കാര്യമായ സഹായം നല്‍കുകയെന്ന ലക്ഷ്യത്തോടെയാണ് 'അമ്മ' എല്ലാ താരങ്ങളുടെയും പങ്കാളിത്തത്തോടെ സ്‌റ്റേജ് ഷോ സംഘടിപ്പിക്കാന്‍ ആലോചിക്കുന്നത്. സൂനാമി ദുരന്തം വിതച്ച ഘട്ടത്തില്‍ സമാനരീതിയില്‍ ധനസമാഹരണം നടത്തിയിരുന്നു.
കേരളത്തിനുപകരം ഏതെങ്കിലും വിദേശരാജ്യത്താകും സ്‌റ്റേജ് ഷോ സംഘടിപ്പിക്കുക. മലയാളികള്‍ കൂടുതലുള്ളതും പരമാവധി തുക സമാഹരിക്കാന്‍ കഴിയുന്നതുമായ രാജ്യങ്ങളാണ് പരിഗണനയിലുള്ളത്. നിലവിലെ സാഹചര്യത്തില്‍ കേരളത്തില്‍ ഷോ സംഘടിപ്പിച്ചാല്‍ കാര്യമായ വരുമാനം ലഭിക്കില്ലെന്നാണ് വിലയിരുത്തല്‍. വേദി, തീയതി തുടങ്ങിയ കാര്യങ്ങളില്‍ സര്‍ക്കാറുമായുള്ള ചര്‍ച്ചക്ക് ശേഷമാകും അന്തിമതീരുമാനം.
കേരളത്തിന് പിന്തുണയുമായി തമിഴ് സിനിമ ലോകവും നേരത്തേ രംഗത്തെത്തിയുരുന്നു. കമല്‍ഹാസന്‍, കാര്‍ത്തി, സൂര്യ തുടങ്ങിയ അഭിനേതാക്കളും തമിഴ് നടികര്‍ സംഘവും നേരത്തേ മുഖ്യമന്ത്രിയുടെ ദുരിതാശ്വാസ നിധിയിലേക്ക് സംഭാവന നല്‍കിയിരുന്നു. ദുരിതബാധിതര്‍ക്ക് പരമാവധി സഹായം എത്തിക്കാന്‍ തമിഴിലെയും മലയാളത്തിലെയും പ്രമുഖ താരങ്ങള്‍ പ്രേക്ഷകരോടും ആഹ്വാനം ചെയ്തിട്ടുണ്ട്.
https://www.facebook.com/Malayalivartha
