റിലീസിംഗിന് മുമ്പ് ഏറെ ചര്‍ച്ചയായ പുതുമുഖതാര ചിത്രമാണ് ഒരു അഡാര്‍ ലവ്. എന്നാല്‍ ചിത്രീകരണം പൂര്‍ത്തിയാകാത്തതോടെ നിര്‍മാതാവ് സംവിധായകന്‍ ഒമര്‍ലുലുവുമായി തര്‍ക്കമുണ്ടായി. പിന്നീട് സിനിമയെ കുറിച്ച് യാതൊരു വിവരവും ഉണ്ടായിരുന്നില്ല. തിരക്കഥ എഴുതിയിരിക്കുന്നത് സംവിധായകന്‍ തന്നെയാണ്. അതില്‍ ചില പ്രശ്‌നങ്ങളുണ്ടെന്ന് ഒമറിന് തോന്നി. അതുകൊണ്ടാണ് ചിത്രീകരണം വൈകിയത്. ഷൂട്ടിംഗ് പൂര്‍ത്തിയാകും മുമ്പ് ഏറെ പബഌസിറ്റി കിട്ടിയതിനാല്‍ തിരക്കഥ പൊളിച്ചെഴുതുകയാണെന്നാണ് അറിയുന്നത്. ഇത് നിര്‍മാതാവിനെ ചൊടിപ്പിച്ചു. 

നിര്‍മാതാവുമായി തര്‍ക്കം ഉണ്ടായിരുന്നെന്ന് സംവിധായകന്‍ വ്യക്തമാക്കി. അതൊക്കെ പരിഹരിച്ച് വരുകയാണ്. ടീസര്‍ ഇറങ്ങിയപ്പോഴെ വിജയാഘോഷം നടത്തിയ ചിത്രമാണ് അഡാര്‍ ലവ്. അതിനാല്‍ പ്രേക്ഷകര്‍ക്ക് ഏറെ പ്രതീക്ഷയുണ്ടാകും. അതിനനുസരിച്ചുള്ള മാറ്റങ്ങള്‍ വരുത്താനാണ് സമയം എടുക്കുന്നതെന്ന് ഒമര്‍ ലുലു പറഞ്ഞു. ഓണം കഴിഞ്ഞ് റിലീസ് മുമ്പ് പ്ലാന്‍ ചെയ്തിരുന്നെങ്കിലും പ്രളയം കാരണം അത് നീട്ടി. നവംബറില്‍ ചിത്രം തിയേറ്ററില്‍ എത്തുമെന്ന് സംവിധായകന്‍ ഉറപ്പ് നല്‍കി. 

ചിത്രത്തിന്റെ ടീസര്‍ രാജ്യം മുഴുവന്‍ വൈറലായിരുന്നു. അതിന് പിന്നാലെ പുറത്തിറക്കിയ മാണിക്യമലരായ പൂവി എന്ന പാട്ടും ഹിറ്റായി. അതേ തുടര്‍ന്നുണ്ടായ വിവാദങ്ങളും ചിത്രത്തിന് ഏറെ പ്രചാരം നല്‍കി. അത് മുതലെടുത്ത് ചിത്രം റിലീസ് ചെയ്തിരുന്നെങ്കില്‍ വലിയ ഹിറ്റാകുമായിരുന്നെന്നാണ് നിര്‍മാതാവ് വിലയിരുത്തിയത്. അതിന് കഴിയാത്തതിനെ തുടര്‍ന്നാണ് നിര്‍മാതാവ് സംവിധായകനുമായി തര്‍ക്കം ഉണ്ടാക്കിയത്. ഏറെ പ്രചരണം ലഭിച്ച സിനിമ അതിന് അനുസരിച്ച് ഉയരണമെന്നാണ് സംവിധായകന്റെ ആഗ്രഹം. അതിന് സമയം എടുക്കും.