കൊച്ചി: മലയാളികൾ എന്നും കവിതകളെ നെഞ്ചിലേറ്റിയിട്ടുണ്ട്.... രാഷ്ട്രീയമോ, സാമൂഹികമോ, സാമ്പത്തികമോ വിഷയം ഏതുമായിക്കോട്ടെ, കവിതകൾ മലയാളിയുടെ കൈമുതലാണ്, കൂടപ്പിറപ്പാണ്. പെട്ടന്ന് മനസ്സിൽ വരുന്ന കവിതകൾ ഓർക്കുക.... ഒരു ജനതയെ മുഴുവൻ ചിന്തിപ്പിച്ച മുരുകൻ കാട്ടാക്കടയുടെ വരികളും അവയ്ക്ക് ജനപ്രിയതയുടെ കണ്ണട വച്ചു കൊടുത്ത കിടിലൻ സംഗീതവും നമ്മുടെ ചുണ്ടുകളിലെത്തും.

കവിതകളെ അളവറ്റു സ്നേഹിക്കുന്ന പ്രശസ്ത സിനിമാ സംഗീത സംവിധായകൻ ബി ആർ ബിജുറാം ആണ് കണ്ണട, ബാഗ്ദാദ്, കർഷകന്റെ ആത്മഹത്യാക്കുറിപ്പ് തുടങ്ങിയ ഒട്ടുമിക്ക സൂപ്പർ ഹിറ്റുകൾക്കും ഈണം പകർന്നത്.

വിപ്ലവവീര്യം തുടിക്കുന്ന ഹൃദയങ്ങളിൽ ഇൻക്വിലാബ് പോലെ പടർന്നു കയറിയ "അവനവനു വേണ്ടിയല്ലാതെ അപരന്നു ചുടുരക്തമൂറ്റി കുലം വിട്ടുപോയവൻ രക്തസാക്ഷി" എന്ന മുരുകന്റെ കവിതയും സിംഹേന്ദ്രമധ്യമം എന്ന കർണ്ണാട്ടിക് രാഗത്തിൽ ബിജു സംഗീതം ചെയ്തതാണെന്ന് അധികമാർക്കും അറിയില്ല.

കവിതകളുടെ മാത്രമല്ല മനോരമ കുട്ടികൾക്കായി പുറത്തിറക്കിയ മഞ്ചാടി, പൂപ്പി, കാത്തു, മായാവി, ലുട്ടാപ്പി തുടങ്ങിയ അനിമേഷൻ സി ഡി കളിലെ പാട്ടുകളുടെയും പശ്ചാത്തല സംഗീതം ബിജുറാമിന്റേതാണ്.

പ്രശസ്ത നടൻ സലിംകുമാർ സംവിധാനം ചെയ്ത 'കറുത്ത ജൂതൻ' ആയിരുന്നു ബിജുവിന്റെ ആദ്യ സിനിമ. രണ്ടായിരം വർഷങ്ങൾക്ക് മുൻപുള്ള ഒരു പശ്ചാത്തലത്തിന് വേണ്ട, എന്നാൽ ഇന്നത്തെ തലമുറയ്ക്ക് ഇഷ്ടപ്പെടുകയും ചെയ്യുന്ന സംഗീതം ആയിരുന്നു കറുത്ത ജൂതനിലെ അണിയറക്കാർക്ക് ആവശ്യം. ബിജു ആ വെല്ലുവിളി ഏറ്റെടുത്തു, ആ കാലഘട്ടത്തെക്കുറിച്ചും അന്നത്തെ സംഗീതത്തെക്കുറിച്ചും പഠിച്ചു, ഒട്ടനവധി അഭിനന്ദനങ്ങൾ നേടിക്കൊടുത്ത "ജൂതർ തൻ താവഴി" എന്ന ഗാനം പിറവിയെടുത്തത് അങ്ങിനെയാണ്.

'കറുത്ത ജൂതൻ' നൽകിയതിനേക്കാൾ വലിയ വെല്ലുവിളികളും അനുഭവങ്ങളുമാണ് 'ഐക്കരക്കോണത്തെ ഭിഷഗ്വരന്മാർ' സമ്മാനിച്ചതെന്ന് ബിജു സാക്ഷ്യപ്പെടുത്തുന്നു. "എട്ടു പാട്ടുകളാണ് സിനിമയിൽ. വരികൾ എല്ലാം നേരത്തെ തയ്യാറായിരുന്നു. ഗ്രാമത്തിന്റെ ശാലീനതയും പുതിയ തലമുറയുടെ ഇഷ്ടങ്ങളും സംഗീതത്തിൽ സമ്മേളിക്കണമായിരുന്നു." ഈ വെല്ലുവിളികൾ എല്ലാം മികച്ച രീതിയിൽ ഏറ്റെടുത്തു പൂർത്തീകരിക്കാൻ കഴിഞ്ഞുവെന്ന് ബിജു പറയുന്നു.

സോഹൻ റോയ് ആണ് 'ഐക്കരക്കോണത്തെ ഭിഷഗ്വരന്മാർ'ക്കുവേണ്ടി വരികൾ എഴുതിയിരിക്കുന്നത്. സുദീപ് കുമാർ, വിനീത് ശ്രീനിവാസൻ, രാജലക്ഷ്മി, അജയ് വാര്യർ തുടങ്ങിയ പ്രശസ്ത ഗായകരോടൊപ്പം ഇൻഡിവുഡ് ടാലന്റ് ഹണ്ടിലൂടെ തിരഞ്ഞെടുക്കപ്പെട്ട അഖിൽ മേനോൻ, ബിച്ചു വേണു, ശരണ്യ തുടങ്ങിയ നവാഗതരും സിനിമയിൽ പാടിയിട്ടുണ്ട്.

ബിജു മജീദ് സംവിധാനം ചെയ്തിരിക്കുന്ന സിനിമ ഏരീസ് ടെലികാസ്റ്റിംഗ് പ്രൈവറ്റ് ലിമിറ്റഡിന്റെ ബാനറിൽ അഭിനി സോഹൻ നിർമ്മിച്ചിരിക്കുന്നു. കഥ, തിരക്കഥ,സംഭാഷണം: കെ. ഷിബു രാജ്. സെപ്റ്റംബർ 21ന് കേരത്തിലെ നൂറോളം പ്രമുഖ തിയറ്ററുകളിൽ ചിത്രം പ്രദർശനത്തിനെത്തും.