ഒമർ ലുലു സംവിധാനം ചെയ്യുന്ന ‘ഒരു അഡാർ ലവ്വിലെ’ ഫ്രീക്ക് പെണ്ണെ എന്ന ഗാനത്തിന് ഡിസ്‌ലൈക്കുകളുടെ പ്രളയം. നാലു ലക്ഷത്തോളം പേർ ഇതിനോടകം കണ്ട പാട്ടിന് രണ്ടു ലക്ഷത്തി അയ്യായിരം പേരും ഡിസ്‌ലൈക് ആണ് നൽകിയിരിക്കുന്നത്. നവമാധ്യമങ്ങളിലും പാട്ടിനെ വ്യാപകമായി ട്രോളുന്നുണ്ട്.

അതേസമയം ഫ്രീക്ക് പെണ്ണേ.. ഗാനം യുട്യൂബ് ട്രെന്‍ഡിംഗ് ലിസ്റ്റില്‍ ഒന്നാമത്. റിലീസ് ചെയ്ത് പത്ത് മണിക്കൂറിനുള്ളില്‍ ഒരു മില്യണ്‍ കാഴ്ചക്കാരും, 201 കെ ഡിസ്‌ലൈക്കുമായാണ് ഗാനം ട്രെന്‍ഡിംഗ് ലിസ്റ്റില്‍ ഇടം നേടിയത്. പാട്ടിനെ കേന്ദ്രീകരിച്ച്‌ നിരവധി ട്രോളുകളും ഇതിനോടകം പുറത്തിറങ്ങിയിട്ടുണ്ട്.

അതേസമയം പാട്ട് വൈറലാക്കിയതിന് നന്ദിയറിച്ച്‌ ഒമര്‍ ലുലു രംഗത്തെത്തി. പത്ത് മണിക്കൂറിനുള്ളില്‍ ഒരു മില്യണ്‍ വ്യൂസും ,201 കെ ഡിസ്ലൈക്കും എന്ന ആ അപൂര്‍വ്വ റെക്കോര്‍ഡ് ഇനി ഞങ്ങള്‍ സ്വന്തം. മനസ്സറിഞ്ഞു പ്രോത്സാഹിപ്പിച്ച എല്ലാ പ്രേക്ഷകര്‍ക്കും ഹൃദയം നിറഞ്ഞ നന്ദി, ഒമര്‍ലുലു ഫെയ്‌സ്ബുക്കില്‍ കുറിച്ചു.

സത്യ ജിത്തിന്റെ വരികള്‍ക്ക് സംഗീതം പകര്‍ന്നിരിക്കുന്നത് ഷാന്‍ റഹ്മാനാണ്. സത്യജിത്, നീതു നടുവത്തേറ്റ് എന്നിവര്‍ ചേര്‍ന്നാണ് ഗാനം ആലപിച്ചിരിക്കുന്നത്.ഹാപ്പി വെഡ്ഡിംഗ്സ്, ചങ്ക്സ് എന്നീ ചിത്രങ്ങള്‍ക്ക് ശേഷം ഒമര്‍ ലുലു സംവിധാനം ചെയ്യുന്ന ചിത്രമാണ് അഡാര്‍ ലവ്. ഒരു കൂട്ടം പുതുമുഖങ്ങളാണ് ചിത്രത്തില്‍ അണിനിരക്കുന്നത്.

ഔസേപ്പച്ചന്‍ മൂവി ഹൗസിന്റെ ബാനറില്‍ ഔസേപ്പച്ചന്‍ വാളക്കുളിയാണ് അഡാര്‍ ലവിന്റെ നിര്‍മ്മാണം. നര്‍മ്മത്തിനും പ്രണയത്തിനും പ്രാധാന്യം നല്‍കി ഒരുക്കുന്ന ചിത്രം പ്ലസ്ടു വിദ്യാര്‍ത്ഥികളുടെ കഥയാണ് പറയുന്നത്. പ്രിയയുടെ കണ്ണിറുക്കലിലൂടെ സൂപ്പര്‍ഹിറ്റായി മാറിയ മാണിക്യ മലരായ എന്ന ഗാനം ഒരേ സമയം വൻ ഹിറ്റും, വിവാദവും ആയിരുന്നു.