2016ല്‍ പ്രദര്‍ശനത്തിനെത്തിയ ആനന്ദം എന്ന ചിത്രത്തിലൂടെയാണ് അനാര്‍ക്കലി മരിക്കാര്‍ ചലച്ചിത്രരംഗത്തേക്ക് കടന്നുവരുന്നത്. ഗണേഷ് രാജ് സംവിധാനം ചെയ്ത ചിത്രത്തില്‍ ദര്‍ശന എന്ന കഥാപാത്രത്തെയാണ് അനാര്‍ക്കലി അവതരിപ്പിച്ചത്.

ആനന്ദത്തിന് ശേഷം പൃഥ്വിരാജിന്റെ വിമാനത്തിലും ഉടന്‍ പുറത്തിറങ്ങാനിരിക്കുന്ന ആസിഫ് അലി ചിത്രം മന്ദാരത്തിലും അനാര്‍ക്കലി പ്രത്യക്ഷപ്പെടുന്നുണ്ട്. വളരെ കുറച്ച് ചിത്രങ്ങളിലേ അഭിനയിച്ചിട്ടുള്ളുവെങ്കിലും ഗ്ലമാർ വേഷങ്ങളോട് തനിക്കെതിർപ്പില്ലെന്നാണ് നടി അനാർക്കലി മരിക്കാർ പറയുന്നത്. അനാർക്കലിയുമായി നടത്തിയ ഒരു അഭിമുഖത്തിലായിരുന്നു നടിയുടെ തുറന്നു പറച്ചിൽ.

എന്തും തുറന്നു പറയുന്ന പ്രകൃതക്കാരിയാണ് അനാർക്കലി. വരുംവരായ്കകൾ ആലോചിക്കാതെ എല്ലാത്തിനെയും കുറിച്ച് തുറന്ന് സംസാരിക്കും. സിനിമ വന്നാൽ വന്നു ഇല്ലെങ്കിൽ ഇല്ല എന്ന് മലയാളത്തിലെ ഒരു യുവനായിക ക്യാമറയ്ക്ക് മുന്നിൽ പറയണമെങ്കിൽ അവരുടെ ധൈര്യം ഉൗഹിക്കാവുന്നതേയുള്ളൂ.

"ഗ്ലാമറസ് കഥാപാത്രങ്ങൾ ചെയ്യുന്നതിൽ എനിക്ക് പ്രശ്നമൊന്നുമില്ല. ഞാൻ എന്നെ തന്നെ മൂടിപ്പുതച്ചിരിക്കുന്ന ആളൊന്നുമല്ല. എന്റെ വസ്ത്രധാരണവും അങ്ങനെയൊക്കെ തന്നെയാണ്. ഗ്ലാമറസ് വേഷം വന്നാൽ ഞാൻ വണ്ണം കുറയ്ക്കാൻ നോക്കും. കാരണം എന്റെ ഇപ്പോഴത്തെ ശരീരം വച്ചിട്ട് ഗ്ലാമറസായാൽ അതു വൃത്തികേടാവും. അല്ലാതെ ഗ്ലാമറസ് വേഷങ്ങളോട് എതിർപ്പൊന്നുമില്ല. ചുംബന രംഗങ്ങളോടും എനിക്ക് എതിർപ്പൊന്നുമില്ല. എന്റെ മാതാപിതാക്കൾക്ക് എതിർപ്പുണ്ടോ എന്നറിയില്ല. പക്ഷേ എനിക്കൊരു പ്രശ്നവുമില്ല" - അനാർക്കലി പറയുന്നു.

സിനിമയിൽ സ്ത്രീകൾ കുറേ രീതിയിലൊക്കെ നോക്കിയാൽ സുരക്ഷിതരല്ല. പക്ഷേ ഇപ്പോഴത്തെ തലമുറയ്ക്ക് അത്രയും പ്രശ്നങ്ങളുണ്ടെന്ന് തോന്നുന്നില്ല. വ്യക്തിപരമായി പറഞ്ഞാൽ‌ എനിക്ക് അത്രയും മോശം അനുഭവങ്ങൾ ഉണ്ടായിട്ടില്ല. ചെറിയ ചെറിയ പ്രശ്നങ്ങളുണ്ടായിട്ടുണ്ട്. അത് ഞാൻ തന്നെ കൈകാര്യം ചെയ്തിട്ടുമുണ്ട്.

നമുക്ക് ചുറ്റുമുള്ളവർക്ക് അധികം സ്വതന്ത്ര്യം കൊടുക്കാതെ എങ്ങനെ നിർത്തുന്നു എന്നതിലൊക്കെ കാര്യമുണ്ട്. എല്ലാ മേഖലകളിലും സ്ത്രീക്ക് അവരുടേതായ പ്രശ്നങ്ങളുണ്ട്. സിനിമയിൽ ചിലപ്പോൾ കുറച്ച് കൂടുതൽ കാണും. അതിനെയൊക്കെ മറികടന്നേ പറ്റൂ. നാം അതിനെ എങ്ങനെ നേരിടുന്നു എന്നതിലാണ് കാര്യമെന്നും അനാർക്കലി പങ്കുവയ്ക്കുന്നു.