അമ്മ എക്സിക്യൂട്ടീവ് യോഗം ഇന്ന് കൊച്ചിയിൽ ചേരും. വൈകിട്ട് നാലിനാണ് യോഗം. നടിയെ ആക്രമിച്ച കേസിൽ പ്രതിയായ ദിലീപിനെതിരെ നടപടിയെടുക്കണമെന്നാവശ്യപ്പെട്ട് ഡബ്ല്യുസിസി അംഗങ്ങളായ നടിമാർ നൽകിയ കത്ത് ഇന്നത്തെ എക്സിക്യൂട്ടീവ് യോഗം ചർച്ച ചെയ്യുമെന്നാണ് വിവരം. നടിമാരായ പാര്‍വ്വതി, രേവതി, പത്മപ്രിയ എന്നിവര്‍ ദിലീപിനെതിരെ നടപടിയെടുക്കണമെന്നാവശ്യപ്പെട്ടു നല്‍കിയ കത്തിന്റെ പുറത്താകും ചര്‍ച്ച നടക്കുക. കത്തു നല്‍കി 3 മാസം പിന്നിടുന്ന സാഹചര്യത്തില്‍ ഉടന്‍ നടപടിവേണമെന്ന് നടിമാര്‍ ആവശ്യപ്പെട്ടിരുന്നു.

ദിലീപിനെ അമ്മയില്‍ നിന്ന് പുറത്താക്കിയ നടപടി മരവിപ്പിച്ചതില്‍ പ്രതിഷേധിച്ച്‌ ആക്രമണത്തിനിരയായ നടിയുള്‍പ്പെടെ നാലു നടിമാര്‍ സംഘടനയില്‍ നിന്നു രാജിവെച്ചിരുന്നു. ആഗസ്റ്റ് 7-ാം തിയതി ഇതു സംബന്ധിച്ച്‌ നടിമാരുമായി ചര്‍ച്ച നടത്തിയിരുന്നെങ്കിലും നടപടികളൊന്നുമുണ്ടായില്ല.

ഇതോടെയാണ് ഇന്നത്തെ ചര്‍ച്ചയിലും ദിലീപ് വിഷയം ഉയര്‍ത്താന്‍ നടിമാര്‍ ഒരുങ്ങുന്നത്. പ്രളയദുരിതത്തില്‍പ്പെട്ട കേരളത്തിന്റെ പുനര്‍നിര്‍മാണത്തിന് ഫണ്ട് കണ്ടെത്താനായി സ്‌റ്റേജ് ഷോ നടത്തുന്നതും ഇന്ന് ചര്‍ച്ചയാകും.