വിമര്ശനങ്ങള്ക്കിടയിലും ലോകമാകെ റെക്കോര്ഡിട്ട് ഒടിയന്: ആദ്യദിന കളക്ഷന് പുറത്ത്
മലയാളത്തിലെ ബ്രഹ്മാണ്ഡചിത്രം എന്ന വിശേഷണത്തോടെ കഴിഞ്ഞ ഒന്നരവര്ഷമായി മലയാളികള് കാത്തിരുന്ന ചിത്രമാണ് ഒടിയന്. കാത്തിരിപ്പിന് വിരാമമിട്ട് ഡിസംബര് 14ന് ഒടിയന് തീയറ്ററുകളിലെത്തി. സമ്മിശ്ര പ്രതികരണമാണ് ചിത്രത്തിന് ലഭിക്കുന്നതെങ്കിലും ആദ്യദിനം ഒടിയന് നേടിയിരിക്കുന്നത് മലയാളത്തിലെ എക്കാലത്തെയും വലിയ ബോക്സോഫീസ് കളക്ഷനാണ്. ഇന്ത്യയില് നിന്നുമാത്രം 16.48 കോടി രൂപയാണ് ഒടിയന് സ്വന്തമാക്കിയത്. വിദേശ രാജ്യങ്ങളിലുള്പ്പെടെ 3500 തീയറ്ററുകളിലായിരുന്നു റിലീസ്. കേരളത്തിലെ കളക്ഷന് പുറത്തു വിട്ടിട്ടില്ല.
ലോകമൊട്ടാകെ ആദ്യദിനം നേടിയത് 32.14 കോടി. കണക്കുകള് സത്യമാണെങ്കില് മലയാള സിനിമയെ സംബന്ധിച്ചടത്തോളം സ്വപ്നം കാണാന് പോലും സാധിക്കാത്ത ബോക്സ്ഓഫീസ് റെക്കോര്ഡ് ആണ് ഒടിയന് സ്വന്തമാക്കിയിരിക്കുന്നത്.
4.78 കോടിയാണ് ജിസിസി കലക്ഷന്. ജിസിസി ഒഴികെയുളള മറ്റുവിദേശ രാജ്യങ്ങളില് നിന്നും 11.98 കോടി. 684 പ്രദര്ശനങ്ങളാണ് ആദ്യദിനം ജിസിസി രാജ്യങ്ങളില് ഉണ്ടായിരുന്നത്. വിദേശരാജ്യങ്ങളില് നിന്നും റിലീസ് ചെയ്ത ദിവസം തന്നെ ഇത്രയും തുക കലക്ഷന് നേടുന്ന ആദ്യ സൗത്ത് ഇന്ത്യന് സിനിമ എന്ന റെക്കോര്ഡും 'ഒടിയന്' സ്വന്തമാക്കിയിട്ടുണ്ട്.
യു.എ.ഇയിലടക്കം 37 വിദേശ രാജ്യങ്ങളില് റിലീസ് ചെയ്ത ചിത്രം ലോകമാര്ക്കറ്റിനു തുറന്നുകൊടുക്കുകയായിരുന്നു. ഹര്ത്താല് ദിനത്തില് റിലീസ് ചെയ്ത ഒടിയന് വമ്പന് സ്വീകരണമായിരുന്നു കേരളത്തില് ലഭിച്ചിത്. ലോകമൊട്ടാകെ 12,000 പ്രദര്ശനം. കേരളത്തില് മാത്രം 406 ഫാന്സ് ഷോകള്. പുലര്ച്ചെ നാലരമണിക്ക് കവിത തിയറ്ററില് ആദ്യ ഷോ തുടങ്ങി. സംസ്ഥാനത്തുടനീളം ലേഡിസ് ഫാന്സ് ഷോയും സംഘടിപ്പിക്കുകയുണ്ടായി. ഹര്ത്താല് ആയതിനാല് മള്ട്ടിപ്ലക്സുകളില് മിക്കതിലും വൈകിട്ട് 6 മണി മുതലായിരുന്നു ഷോ തുടങ്ങിയത്. മറ്റു തിയറ്ററുകളിലെ പ്രദര്ശനം മുടക്കമില്ലാതെ നടന്നു. റിലീസ് ചെയ്ത കേന്ദ്രങ്ങളിലെല്ലാം നിറഞ്ഞ സദസ്സുകളിലാണ് ഒടിയന് ഓടിയത്. കുടുംബ പ്രേക്ഷകരും ആരാധകരും ഒരുപോലെയാണ് തിയറ്ററുകളില് ഒഴുകി.
വി.എ. ശ്രീകുമാര് മേനോന്റെ സംവിധാനത്തില് ഒരുങ്ങിയ ചിത്രത്തിന് ദേശീയ പുരസ്കാരജേതാവായ ഹരികൃഷ്ണനായിരുന്നു തിരക്കഥ എഴുതിയത്. മോഹന്ലാല്-മഞ്ജു വാരിയര് ജോഡികളുടെ അഭിനയപ്രകടനം തന്നെയാണ് ഒടിയന്റെ ആകര്ഷണം. ആശിര്വാദ് സിനിമാസ് 45 കോടിയോളം മുതല്മുടക്കില് നിര്മിച്ച ചിത്രത്തിന്റെ പ്രൊമോഷനായും വന് തുകയാണ് ചെലവിട്ടത്. പ്രി-റിലീസ് ബിസിനസ്സില് ചിത്രം നൂറുകോടി സ്വന്തമാക്കിയതായി ശ്രീകുമാര് മേനോന് വെളിപ്പെടുത്തിയിരുന്നു.
https://www.facebook.com/Malayalivartha