ശബരിമല വിവാദങ്ങള്‍ കൊഴുക്കുമ്പോള്‍ നടന്‍ മമ്മൂട്ടി പതിനെട്ടാംപടിയില്‍. ശബരിമല പതിനെട്ടാംപടിയില്‍ അല്ലെന്ന് മാത്രം. ശങ്കര്‍രാമകൃഷ്ണന്‍ നവാഗതരെ കേന്ദ്രകഥാപാത്രങ്ങളാക്കി അണിയിച്ചൊരുക്കുന്ന പതിനെട്ടാംപടി എന്ന ചിത്രത്തിലാണ് മമ്മൂട്ടി പ്രധാന വേഷം ചെയ്യുന്നത്. ആഗസ്റ്റ് സിനിമാസിന്റെ ബാനറില്‍ ഷാജിനടേശനാണ് ചിത്രം നിര്‍മിക്കുന്നത്. ഷാജി നടേശന്‍ ആദ്യം നിര്‍മിച്ച ഉറുമിയുടെ തിരക്കഥ എഴുതിയത് ശങ്കര്‍ രാമകൃഷ്ണനാണ്. അന്ന് മുതല്‍ തുടങ്ങിയ ബന്ധമാണ് പതിനെട്ടാംപടിയില്‍ എത്തിച്ചത്. തിരുവനന്തപുരത്തും പരിസരങ്ങളിലും പതിനെട്ടാംപടിയുടെ ഭൂരിഭാഗവും ചിത്രീകരിച്ച് കഴിഞ്ഞു. മമ്മൂട്ടിയുടെ സീനുകള്‍ കൊച്ചിയില്‍ ചിത്രീകരിക്കും. 

മമ്മൂട്ടി ഓഗസ്റ്റ് സിനിമാസിന്റെ ബാനറില്‍ അഭിനയിക്കുന്ന മൂന്നാമത്തെ ചിത്രമാണ് പതിനെട്ടാംപടി. ആദ്യ സിനിമയായ കടല്‍ കടന്നൊരു മാത്തുക്കുട്ടി വലിയ പരാജയമായിരുന്നു. രണ്ടാമത്തെ ചിത്രമായ ദ ഗ്രേറ്റ് ഫാദര്‍ സാമ്പത്തിക വിജയം നേടി. അടുത്തതായി കുഞ്ഞാലി മരയ്ക്കാര്‍ എന്ന സിനിമ മമ്മൂട്ടിയെ നായകനാക്കി പ്രഖ്യാപിക്കാനിരിക്കെയാണ്. സന്തോഷ് ശിവനാണ് സംവിധാനം ചെയ്യുന്നത്. ശങ്കര്‍ രാമകൃഷ്ണനാണ് തിരക്കഥ എഴുതുന്നത്. മോഹന്‍ലാലിനെ നായകനാക്കി പ്രിയദര്‍ശന്‍ ഒരുക്കുന്ന കുഞ്ഞാലി മരയ്ക്കാറുമായി ഇതിന് ബന്ധമില്ലെന്ന് സന്തോഷ് ശിവന്‍ വ്യക്തമാക്കിയിട്ടുണ്ട്. 

പതിനെട്ടാംപടിയില്‍ ചെറുതാണെങ്കിലും ശക്തമായ കഥാപാത്രമാണ് മമ്മൂട്ടിയുടേത്. മമ്മൂട്ടി ആ കഥാപാത്രത്തെ അവതരിപ്പിച്ചാലുള്ള ഇംപാക്ട് വലുതാണെന്ന് അണിയറപ്രവര്‍ത്തകര്‍ക്ക് അറിയാം. അതിനാലാണ് മമ്മൂട്ടിയുടെ സമയത്തിനും സൗകര്യത്തിനും അനുസരിച്ച് ചിത്രീകരണം പ്ലാന്‍ ചെയ്തിരിക്കുന്നത്. മമ്മൂട്ടി ചെറുതെങ്കിലും പ്രധാനപ്പെട്ട വേഷത്തില്‍ എത്തുന്നത് പ്രേക്ഷകരെ ആവേശം കൊള്ളിക്കും തിയേറ്ററുകളില്‍ തിരയിളക്കം സൃഷ്ടിക്കാനും അതുവഴി കളക്ഷന്‍ മികച്ചതാകാനും സഹായിക്കും. മാത്രമല്ല മമ്മൂട്ടിയുടെ സാനിധ്യമുള്ള സിനിമയുടെ സാറ്റലൈറ്റ് അവകാശത്തിനും ഡിമാന്റുണ്ടായിരിക്കും. 

മമ്മൂട്ടി ശബരിമലയില്‍ പോയിട്ടുണ്ടോ എന്നറിയില്ല. പട്ടാളം എന്ന സിനിമയിലെ പമ്പാഗണപതി എന്ന ഗാനത്തിലെ ചില രംഗങ്ങള്‍ ചിത്രീകരിച്ചത് ശബരിമലയിലായിരുന്നു. മാസപൂജസമയത്തായിരുന്നു ചിത്രീകരണം. എന്നാല്‍ മമ്മൂട്ടി ശബരിമല കയറുന്നതിന്റെ വ്യക്തമായ സീനുകളൊന്നും ആ പാട്ടിലില്ല. ശബരിമലയില്‍ മമ്മൂട്ടി ഉള്ളതായി കാണിക്കുന്നത് ക്‌ളോസ് ഷോട്ടുകളാണ്. പാലക്കാട്ടെ ഒരു ക്ഷേത്രത്തില്‍ വെച്ചാണ് മമ്മൂട്ടി ഇരുമുടി കെട്ടുന്ന സീനുകള്‍ എടുത്തത്. പമ്പയില്‍ കുളിച്ച് മുങ്ങുന്നതായി കാണിക്കുന്നത് മറ്റെവിടെയോ ആണെന്ന് വ്യക്തമാണ്. അന്തരിച്ച നടി സുകുമാരിയാണ് മമ്മൂട്ടിക്കൊപ്പം ആ ഗാനരംഗത്തുള്ളത്.