ഒരുകാലത്ത് മിനിസ്ക്രീൻ ബിഗ് സ്ക്രീൻ പ്രേക്ഷകരുടെ പ്രിയപ്പെട്ട താരമായി മാറിയിരുന്ന ശരണ്യ ശശി സിനിമയിലും സീരിയലിലും ഒരുപോലെ തന്നെ തിളങ്ങി നിന്നിരുന്നു. ഈ കാലത്താണ് നടി പെട്ടെന്ന് ഇൻഡസ്ട്രിയിൽ നിന്നും അപ്രത്യക്ഷയായത്. എന്നാൽ അപ്രതീക്ഷിതമായ ഒരു അവസ്ഥയിലാണ് പിന്നെ പ്രേക്ഷകർ നടിയെ കാണുന്നത്. അങ്ങനെ നീണ്ട ത്യാഗങ്ങൾക്ക് ശേഷം ബ്രെയിൻ ട്യൂമറിനോട് പൊരുതി ജയിച്ച നടി ശരണ്യ ഇനി 'സ്‌നേഹ സീമയിൽ'. അങ്ങനെ ലോകമെമ്പാടുമുള്ള നിരവധി മലയാളികളുടെ സഹായത്തോടെ ഒരുങ്ങിയ സ്നേഹ സീമ എന്ന് പേരിട്ടിരിക്കുന്ന വീടിന്റെ ഗൃഹപ്രവേശനമാണ് ഇന്ന്. തിരുവനന്തപുരം ചെമ്പഴന്തിയിലെ 1450 സ്‌ക്വയർ ഫീറ്റിലെ വീടാണ് ഇനിമുതൽ ശരണ്യയ്ക്ക് കൂടായി മാറിയിരിക്കുന്നത്.

അതേസമയം വർഷങ്ങൾ നീണ്ട ക്യാൻസർ പോരാട്ടത്തിൽ ഒരുപാട് പേർ ശരണ്യയ്ക്ക് താങ്ങായി രംഗത്ത് എത്തിയിരുന്നു. അതിൽ എടുത്ത് പറയേണ്ടത് നടി സീമ ജി. നായരുടെ പേര് തന്നെയാണ്. കൂട്ടുകാരിയോ സഹോദരിയോ ഒക്കെയായി സീമ ശരണ്യയ്‌ക്കൊപ്പം ചേർന്നുനിൽക്കുക മാത്രമല്ല ചേർത്തുനിര്ത്തുകയായിരുന്നു. എന്നാലിതാ ഒരു മാധ്യമത്തിന് നൽകിയ അഭിമുഖത്തിൽ തന്റെ പുതിയ വിശേഷങ്ങൾ പങ്കുവയ്ക്കുകയാണ് ശരണ്യയും സീമയും. രോഗത്തിന്റെ തുടക്കത്തിൽ നാളെ മരിക്കുമെന്ന ചിന്ത ഉണ്ടായിരുന്നതായി നടി പറയുകയാണ്. എന്നാൽ വർഷങ്ങളോളം നീണ്ട ശസ്ത്രക്രിയകൾക്കൊടുവിൽ ഫീനിക്സ് പക്ഷിയെപ്പോലെ താൻ ഉയർത്തേഴുന്നേറ്റുവെന്നും നടി കൂട്ടിച്ചേർത്തു.

അതോടൊപ്പം തന്നെ അഭിനയ ജീവിതത്തിലേക്ക് മടങ്ങിയെത്തണമെന്നാണ് ആഗ്രഹമെന്നും താരം വ്യക്തമാക്കി. ശരണ്യ തന്റ സുഹൃത്തോ കുടുംബസുഹൃത്തോ ആയിരുന്നില്ലെന്നും, 2012ൽ ആദ്യ സർജറിയുടെ സമയത്താണ് കൂടെ നിന്നു തുടങ്ങിയതെന്നും സീമ ജി നായർ പറയുകയാണ്. ഇങ്ങനെ ശരണ്യയ്‌ക്കൊപ്പം കുറച്ച് കൂടുതൽ നാൾ നിൽക്കണം എന്ന് ദൈവം പറഞ്ഞതപോലെയാണ് ഇപ്പോൾ തോന്നുന്നത് സീമ ജി നായർ പറയുകയുണ്ടായി.