താരപുത്രി എന്ന ടൈറ്റിൽ മുതൽ ഇന്ത്യൻ സിനിമയിൽ തന്റേതായ ഇടം കണ്ടെത്തിയ നായികയാണ് ശ്രുതി ഹാസൻ. കമൽഹാസന്റെയും ബോളിവുഡ് നായിക സരികയുടെയും മകൾ എന്നതിലുപരി അഭിനേത്രി, ഗായിക, സംഗീത സംവിധായിക എന്നീ നിലകളിൽ ഇതിനകം തന്നെ പേരെടുത്തിട്ടുണ്ട്. അച്ഛനെപ്പോലെ ശ്രുതി ഹാസനും ഒരു ഓൾറൗണ്ടറാണ്. ബാലതാരമായാണ് ശ്രുതി ഹാസൻ അഭിനയിച്ചു തുടങ്ങിയത്. കമൽഹാസൻ തന്നെ നായകനായ ഹേ റാം ആയിരുന്നു ആ ചിത്രം. പിന്നീട് ശ്രുതി സിനിമകളിൽ അഭിനയിച്ചിരുന്നില്ല.

വർഷങ്ങൾക്ക് ശേഷം 2009ൽ ലക്ക് എന്ന ഹിന്ദി ചിത്രത്തിലൂടെ ശ്രുതി ഹാസൻ നായികയായി തിരിച്ചെത്തി. ഹിന്ദി സിനിമകളിൽ അഭിനയിച്ചതിന് ശേഷം ശ്രുതിക്ക് തെലുങ്ക് സിനിമകളിൽ അവസരം ലഭിച്ചു. 'ഏഴാം അറിവ്' എന്ന ചിത്രത്തിലൂടെയാണ് ശ്രുതി ഹാസൻ തമിഴിൽ നായികയായി അരങ്ങേറ്റം കുറിച്ചത്. സൂര്യയായിരുന്നു ചിത്രത്തിലെ നായകൻ.

ചിത്രം വൻ വിജയമായിരുന്നു. അതിന് ശേഷം ശ്രുതി ഹാസന് നിരവധി സിനിമകളിൽ അവസരം ലഭിച്ചു. സോഷ്യൽ മീഡിയയിലും സജീവമായ താരം തന്റെ ഒട്ടുമിക്ക വിശേഷങ്ങളും പങ്കുവയ്ക്കാറുണ്ട്. ഇപ്പോഴിതാ താരം പങ്കുവെച്ച സോഷ്യൽ മീഡിയ പോസ്റ്റ് വൈറലാകുകയാണ്. നീരുവച്ച മുഖവും തടിച്ച ചുണ്ടുകളും വീർത്ത കണ്ണുകളുമായി ഇരിക്കുന്ന സെൽഫി ചിത്രങ്ങളാണ് ശ്രുതി ഹാസൻ സമൂഹമാധ്യമങ്ങളിൽ പങ്കുവച്ചത്. താൻ കടന്നു പോകുന്ന ചില അവസ്ഥകളുടെ സൂചനയാണ് ഈ ചിത്രങ്ങളെന്നും ശ്രുതി ഹാസൻ പറയുന്നു.

ചിത്രങ്ങൾ പങ്കുവെച്ചുകൊണ്ട് ശ്രുതി ഹാസൻ എഴുതി, ' മികച്ച സെൽഫികളുടേയും പോസ്റ്റുകളുടേയും ലോകത്ത്... ഫൈനൽ കട്ടിൽ എത്താത്തവ ഇതാ.. ബാഡ് ഹെയർ ഡെ, പനി, സൈനസ് മൂലം മുഖം വീർത്ത ദിവസം, ആർത്തവ വിരാമ ദിവസം... ഇവയും നിങ്ങൾ ആസ്വദിക്കുമെന്ന് പ്രതീക്ഷിക്കുന്നു.’’ശ്രുതി ഹാസൻ കുറിച്ചു. ഫോട്ടോ പ്രത്യക്ഷപ്പെട്ടതിന് പിന്നാലെ ആരാധകരിൽ ചിലർ ശ്രുതിയുടെ ആരോഗ്യനിലയിൽ ആശങ്ക പ്രകടിപ്പിച്ചിരുന്നു. എന്നാൽ പേടിക്കേണ്ടതായി ഒന്നുമില്ലെന്നും കാര്യങ്ങൾ പഴയതുപോലെയായെന്നും ശ്രുതി ഒരു ആരാധികയുടെ കമന്റിന് മറുപടിയായി പറഞ്ഞു. കമലഹാസന്റെ രണ്ട് പെൺമക്കളിൽ മൂത്തവളാണ് ശ്രുതി ഹാസൻ. രണ്ടാമത്തെ മകൾ അക്ഷര ഹാസനും അഭിനയത്തിൽ സജീവമാണ്. അതേസമയം സലാറാണ് ശ്രുതി ഹാസന്റെ റിലിസീന് തയ്യാറെടുക്കുന്ന ഏറ്റവും പുതിയ സിനിമ.

ബാഹുബലി താരം പ്രഭാസിന്റെ ബി​ഗ് ബജറ്റ് സിനിമയാണ് സലാർ. പ്രശാന്ത് നീൽ സംവിധാനം ചെയ്യുന്ന സിനിമയിൽ‌ മലയാളത്തിന്റെ സ്വന്തം പൃഥ്വിരാജും ഒരു പ്രധാന വേഷം ചെയ്യുന്നുണ്ട്. കൂടാതെ ഒരു ഹോളിവുഡ് സിനിമയും ശ്രുതിയുടേതായി അണിയറയിൽ ഒരുങ്ങുന്നുണ്ട്. ശ്രുതി ഹാസൻ്റെ ആദ്യ ഹോളിവുഡ് ചിത്രം ദി ഐയാണ്.

ഡാഫിൻ ഷമോൻ സംവിധാനം ചെയ്യുന്ന സൈക്കോളജിക്കൽ ത്രില്ലർ ചിത്രമാണിത്. ദി ലാസ്റ്റ് കിഗ്ഡം എന്ന സീരിയിലൂടെ ശ്രദ്ധ നേടിയ മാർക്ക് റൗളിയാണ് ശ്രുതിയ്ക്കൊപ്പം പ്രധാന കഥാപാത്രത്തെ ചിത്രത്തിൽ അവതരിപ്പിക്കുന്നത്. ഭർത്താവ് മരിച്ച ഒരു യുവതി അദ്ദേഹത്തിൻ്റെ ചിതാഭസ്മം ഗ്രീക്ക് ഐലൻ്റിൽ ഒഴുക്കുന്നതിന് എത്തുന്നത് കേന്ദ്രീകരിച്ചാണ് സിനിമയുടെ കഥാ പശ്ചാത്തലം.