ജനിച്ച് അഞ്ചാം ദിനം സിനിമയില്‍ നായികയായി എത്തി. നായികയുടെ നൂലുകെട്ട് ഗംഭീരമാക്കിയിരിക്കുകയാണ് സഹപ്രവര്‍ത്തകര്‍. മാജിക് ഫ്രെയിംസ് ബാനറില്‍ നിര്‍മിക്കുന്ന സിനിമകളുടെ എക്‌സിക്യൂട്ടീവ് പ്രൊഡ്യൂസറായ അഖില്‍ യശോധരന്റെ മകള്‍ രുദ്രയ്ക്കാണ് ഈ അപൂര്‍വ ഭാഗ്യം വന്നു ചേര്‍ന്നത്. 'ഗരുഡനു' ശേഷം അരുണ്‍ വര്‍മ സംവിധാനം ചെയ്യുന്ന ചിത്രത്തിലെ ടൈറ്റില്‍ കഥാപാത്രമായ ബേബി ഗേള്‍ ആകുന്നത് രുദ്രയാണ്.

മാജിക്ക് ഫെയിംസിന്റെ ബാനറില്‍ ലിസ്റ്റിന്‍ സ്റ്റീഫന്‍ നിര്‍മിക്കുന്ന ചിത്രത്തിന് ബോബി സഞ്ജയ് തിരക്കഥ എഴുതുന്നു. നിവിന്‍ പോളി, ലിജോമോള്‍ എന്നിവര്‍ പ്രധാന വേഷങ്ങളിലെത്തുന്ന ഈ ചിത്രത്തില്‍ ഒരു പിടി ശ്രദ്ധേയരായ അഭിനേതാക്കളുടെ സാന്നിധ്യവുമുണ്ട്.

തിരുവനന്തപുരത്താണ് ചിത്രീകരണം ആരംഭിച്ചത്. ചിത്രീകരണം നടന്നു വരുന്നതിനിടയിലാണ് കുഞ്ഞിന്റെ നൂലുകെട്ടിന്റെ ദിവസമെത്തുന്നത്. നായികയുടെ നൂലുകെട്ട് ഗംഭീരമാക്കണമെന്ന് നിര്‍ദ്ദേശിച്ചത് നിവിന്‍ പോളിയാണ്. കവടിയാര്‍ ലയണ്‍സ് ക്ലബ്ബിലായിരുന്നു ഈ ചടങ്ങ് സംഘടിപ്പിച്ചത്. എഴുതി വച്ചിരുന്ന രുദ്ര എന്ന പേര് ആദ്യം ചൊല്ലി വിളിച്ചത് സംവിധായകന്‍ അരുണ്‍ വര്‍മ, ലിജോമോള്‍, സംഗീത് പ്രതാപ്,അഭിമന്യു തിലകന്‍ എന്നിവര്‍ ചേര്‍ന്നായിരുന്നു. ഈ ചിത്രത്തിന്റെ പ്രൊജക്റ്റ് ഹെഡ്ഡും എക്‌സിക്യുട്ടീവ് പ്രൊഡ്യൂസറുമാണ് അഖില്‍ യശോധരന്‍. നിവിന്‍ പോളിയും അണിയറപ്രവര്‍ത്ത കരും ഒത്തുചേര്‍ന്നതോടെ അവിസ്മരണീയമായ ചടങ്ങായി മാറി ഈ നൂലുകെട്ട്.