മേനക മലയാളസിനിമയില്‍ നായികയായി നിറഞ്ഞുനില്‍ക്കുന്ന കാലത്ത് മേനകയ്ക്കൊപ്പം അച്ഛനോ അമ്മയോ ആണ് ലൊക്കേഷനില്‍ വന്നുകൊണ്ടിരുന്നത്. ഇപ്പോള്‍ മകള്‍ കീര്‍ത്തി തെന്നിന്ത്യയില്‍ അറിയപ്പെടുന്ന നടിയായി മാറി മേനക പക്ഷെ കീർത്തിക്കൊപ്പം സെറ്റിൽ പൊകാറൊന്നുമില്ല . മാത്രമല്ല ഇപ്പോള്‍ അമ്മമാര്‍ മക്കള്‍ക്കൊപ്പം ലോക്കേഷനുകളില്‍ പോകുന്നത് ബോറ് പരിപാടിയാണെന്നാണ് മേനകയുടെ പക്ഷം. അതിന് മേനകയ്ക്ക് തന്‍റേതായ അഭിപ്രായവുമുണ്ട്.

‘കീര്‍ത്തിയോടൊപ്പം ലൊക്കേഷനിലൊന്നും ഞാന്‍ പോകാറില്ല. ഭൈരവയുടെ സെറ്റിലും രജനിമുരുകന്‍റെ സെറ്റിലും റമോയുടെ സെറ്റിലും ഒരു തവണ വീതം പോയിട്ടുണ്ട്. അത്രമാത്രം.ഞാനും രേവതിയുമൊക്കെ കീര്‍ത്തിക്കൊപ്പം സിനിമാസെറ്റില്‍ നില്‍ക്കുന്നത് മോള്‍ക്കും ഇഷ്ടമല്ല. സിനിമക്കാര്‍ക്കും അത് ബുദ്ധിമുട്ടുണ്ടാക്കും. പിന്നെ, അതൊരു ബോറടിപ്പിക്കുന്ന പരിപാടിയുമാണ്.പലരും എന്നെ കാണുമ്പോള്‍ ചോദിക്കാറുണ്ട്. മോളുടെ കൂടെ പോകുന്നില്ലേ… മോള്‍ടെ കൂടെ പോകുന്നില്ലേയെന്ന്… ഞാന്‍ ചോദിക്കട്ടെ, ടീച്ചറായി ജോലി ചെയ്യുന്ന ഒരു മകള്‍ക്കൊപ്പം അമ്മയും സ്ക്കൂളില്‍ പോയിരിക്കുമോ?ഐ.ടി മേഖലയില്‍ എത്രയോ പെണ്‍കുട്ടികള്‍ ജോലി ചെയ്യുന്നു? അവരുടെയെല്ലാം കൂടെ അമ്മമാരും ജോലി സ്ഥലത്തേയ്ക്ക് പോകുകയാണോ ചെയ്യുന്നത്? പണ്ടൊക്കെ ഷൂട്ടിംഗ് സെറ്റുകളില്‍ ഡ്രസ്സ് മാറ്റാന്‍ പോലും സൗകര്യമില്ലായിരുന്നു. അത്തരം സാഹചര്യങ്ങളില്‍ അമ്മമാര്‍ കൂടെയുണ്ടെങ്കില്‍ നല്ലതുതന്നെ. ഇന്നിപ്പോള്‍ കാരവനുണ്ട്, എല്ലാ സൗകര്യങ്ങളുമുണ്ട്.
പുതിയ സിനിമകളുടെ കഥ കേള്‍ക്കുന്നതും ക്യാരക്ടര്‍ അറിയുന്നതും സിനിമ തീരുമാനിക്കുന്നതും ഒക്കെ ഇപ്പോള്‍ മോള്‍ തന്നെയാണ്. ഒടുവിലാണ് ഞാനും സുരേഷ്ചേട്ടനുമൊക്കെ പുതിയ പ്രോജക്ടിനെക്കുറിച്ചറിയുന്നത്. എല്ലാം ഓക്കെയാണെന്നും ഞാനിത് അക്സപ്റ്റ് ചെയ്യുകയാണെന്നും മോള്‍ പറയും. അവളുടെ മാനേജര്‍ ഒരു ജഗദീഷാണ്. ഡേറ്റ്സും മറ്റ് കാര്യങ്ങളുമെല്ലാം നോക്കുന്നത്.’ മേനക പറഞ്ഞു.ഒരു പ്രമുഖ മാസികയ്ക്ക് നൽകിയ അഭിമുഖത്തിലാണ് മേനക ഈ കാര്യം പറഞ്ഞത് .