എന്നും എപ്പോഴും പ്രിയ നടിയാണ് സ്‌നേഹ. തമിഴില്‍ നിരവധി കഥാപാത്രങ്ങള്‍ ചെയ്തു. ശിവകാര്‍ത്തികേയന്‍ നായകനായ വേലെക്കാരന്‍ ആണ് സ്‌നേഹയുടെ ഏറ്റവും പുതിയ ചിത്രം. മൂന്നു വര്‍ഷങ്ങള്‍ക്കുശേഷമാണ് സ്‌നേഹ വീണ്ടുമൊരു തമിഴ് ചിത്രത്തില്‍ അഭിനയിക്കുന്നത്. പക്ഷേ വേലെക്കാരന്‍ സ്‌നേഹയ്ക്ക് നിരാശയാണ് നല്‍കിയത്. ഒരു ഓണ്‍ലൈന്‍ മാധ്യമത്തിന് നല്‍കിയ അഭിമുഖത്തിലാണ് സ്‌നേഹ തന്റെ നിരാശ പങ്കുവച്ചത്.

വേലൈക്കാരനില്‍ നല്ലൊരു സോഷ്യല്‍ മെസേജ് ഉണ്ട്. അതിനാലാണ് ആ ചിത്രത്തില്‍ അഭിനയിച്ചത്. ചിത്രത്തിലെ കഥാപാത്രമായി മാറുക അത്ര എളുപ്പമായിരുന്നില്ല. കഥാപാത്രത്തിനായി ഭാരം കുറയ്ക്കാന്‍ സംവിധായകന്‍ ആവശ്യപ്പെട്ടു. മൂന്നു മാസം കടുത്ത ഡയറ്റിങ്ങിലൂടെയും വ്യായാമത്തിലൂടെയും 7 കിലോയോളം കുറച്ചു. പ്രസവശേഷം ഭാരം കുറയ്ക്കുന്നത് പ്രയാസമുളള കാര്യമാണ്. എന്നിട്ടും ആ സിനിമയ്ക്കുവേണ്ടി ഞാന്‍ അത് ചെയ്തു.

ഇത്രയൊക്കെ കഠിനമായി അധ്വാനിച്ചിട്ടും ചിത്രത്തില്‍ എന്റെ കഥാപാത്രത്തെ വേണ്ടത്ര രീതിയില്‍ കാണിച്ചില്ല. 18 ദിവസത്തോളം ഷൂട്ടിങ് ഉണ്ടായിരുന്നു. സിനിമയില്‍ 15 മിനിറ്റെങ്കിലും എന്റെ കഥാപാത്രം ഉണ്ടാവുമെന്ന് കരുതി. എന്നാല്‍ തിയേറ്ററിലെത്തിയപ്പോള്‍ സ്‌ക്രീനില്‍ ഞാനുണ്ടായിരുന്നത് വെറും 5 മിനിറ്റ് മാത്രം. ഞാന്‍ തടി കുറച്ചുവെന്നു ആരാധകര്‍ക്ക് മനസ്സിലാക്കാന്‍ പോലും സാധിച്ചില്ല. ഈ സിനിമയ്ക്കുവേണ്ടി ഒരുപാട് വേദനകള്‍ സഹിച്ചിട്ടുണ്ട്, ഞാന്‍ തീര്‍ത്തും നിരാശയാണ്.

മൂന്നു ദിവസത്തെ എന്റെ ഷൂട്ടിലെ രംഗങ്ങള്‍ മാത്രമാണ് സിനിമയില്‍ ഉണ്ടായിരുന്നത്. മറ്റുളള ഭാഗങ്ങളെല്ലാം അവസാനം കട്ട് ചെയ്ത് മാറ്റുകയായിരുന്നു. ഇടവേള ഇല്ലാതെ തുടര്‍ച്ചയായാണ് ഷൂട്ട് ഉണ്ടായിരുന്നത്. ഇടയ്ക്കിടയ്ക്ക് എന്റെ കോസ്റ്റ്യൂംസ് മാറ്റിക്കൊണ്ടിരുന്നു. തുടര്‍ച്ചയായുളള ഷൂട്ടില്‍ ഞാന്‍ ക്ഷിണിച്ചിരുന്നു. സിനിമയില്‍ ഒരു വീട്ടില്‍ എന്നെ പൂട്ടിയിടുന്ന രംഗമുണ്ട്. ഒരാഴ്ചയോളം എടുത്താണ് അത് ചിത്രീകരിച്ചത്. സിനിമയിലെ പ്രധാനപ്പെട്ട ഒരു കഥാപാത്രമാണ് എന്റേതെന്നാണ് പറഞ്ഞത്. പക്ഷേ എന്നെ സഹതാരമാക്കി മാറ്റി. 

സിനിമയില്‍നിന്നും എല്ലാ കാലത്തും ഇത്തരത്തിലുളള കഥാപാത്രങ്ങളുടെ ഓഫര്‍ വന്നിട്ടുണ്ട്. ആര്‍ക്കു വേണമെങ്കിലും ചെയ്യാവുന്ന ഒരു റോള്‍ ചെയ്യാന്‍ ആഗ്രഹമില്ല. സ്‌നേഹ ചെയ്താല്‍ അത് നന്നായിരിക്കും എന്നു സംവിധായകര്‍ ചിന്തിക്കുന്ന റോളുകള്‍ ചെയ്യാനാണ് താല്‍പര്യം. സിനിമയിലേക്കുളള മടങ്ങിവരവ് സിനിമയില്‍ ഒന്നും ചെയ്യാനില്ലാത്ത കഥാപാത്രമാക്കി മാറ്റുന്നത് ഒരു നടിയും സഹിക്കുമെന്ന് തോന്നുന്നില്ല. മനസ്സിനെ വേദനിപ്പിക്കുന്നതാണത് സ്‌നേഹ പറഞ്ഞു.