തമിഴ് ചിത്രം പേരന്‍പ്, സ്ട്രീറ്റ് ലൈറ്റ്, അങ്കിള്‍, പരോള്‍ എന്നിവ റിലീസിന് തയ്യാറായി
ഒന്നരപ്പതിറ്റാണ്ടിലധികമായി വര്‍ഷത്തില്‍ നാലോ, അഞ്ചോ സിനിമകളില്‍ അഭിനയിച്ചിരുന്ന മമ്മൂട്ടിക്ക് ഇത്തവണ എട്ടോളം ചിത്രങ്ങള്‍. കഴിഞ്ഞ വര്‍ഷം പൂര്‍ത്തിയാക്കിയ നാല് സിനിമകള്‍ ഇക്കൊല്ലമേ തിയേറ്ററുകളിലെത്തൂ. അതാണ് എണ്ണം കൂടാന്‍ കാരണം. തമിഴ് ചിത്രം പേരന്‍പ് രണ്ട് ഷെഡ്യൂളിലായി തീര്‍ത്തതാണ്. ദേശീയ അവാര്‍ഡ് നേടിയ തങ്കമീനുകള്‍ ഉള്‍പ്പെടെയുള്ള സിനിമകളുടെ സംവിധായകന്‍ റാമാണ് പേരന്‍പ് ഒരുക്കുന്നത്. അഞ്ജലിയാണ് നായിക. സുരാജ് വെഞ്ഞാറമൂട് ആദ്യമായി തമിഴില്‍ അഭിനയിക്കുന്നു എന്ന പ്രത്യേകതയുമുണ്ട്. കൊടൈയ്ക്കാലിലും പരിസരപ്രദേശങ്ങളിലും പൂര്‍ത്തിയായ പേരന്‍പ് വര്‍ഷങ്ങള്‍ക്ക് ശേഷം മമ്മൂട്ടി ചെയ്ത തമിഴ് ചിത്രമാണ്.
സംവിധായകനും നടനുമായ ജോയ്മാത്യു തിരക്കഥയും നിര്‍മാണവും നിര്‍വഹിക്കുന്ന അങ്കിള്‍ നവാഗതനായ ഗിരീഷ് ദാമോദരന്‍ സംവിധാനം ചെയ്യുന്നു. കൃഷ്ണകുമാര്‍ മേനോന്‍ എന്നയാളും അയാളുടെ സുഹൃത്തിന്റെ മകളും തമ്മിലുള്ള ആത്മബന്ധത്തിന്റെ കഥയാണ് ചിത്രം പറയുന്നത്. ഊട്ടിയിലും കല്‍പ്പറ്റയിലുമായി പൂര്‍ത്തിയായ ചിത്രം ഈ വര്‍ഷമാദ്യം റിലീസാകും. സൗത്ത് ഇന്ത്യന്‍ ബാങ്ക് ഉള്‍പ്പെടെയുള്ള നിരവധി പരസ്യങ്ങള്‍ മമ്മൂട്ടിയ വെച്ച് ചെയ്ത ശരത് സാന്ദിത്ത് ആദ്യമായി ചെയ്യുന്ന ഫീച്ചര്‍ഫിലിമാണ് പരോള്‍. ബാംഗ്ലൂരിലും പരിസരങ്ങളിലുമായി പൂര്‍ത്തിയായ ചിത്രം താമസിക്കാതെ തിയേറ്ററുകളിലെത്തും.
വിശ്വരൂപം രണ്ട് ഉള്‍പ്പെടെ നിരവധി ചിത്രങ്ങള്‍ക്ക് ക്യാമറ ചലിപ്പിച്ച ശ്യാംദത്ത് സൈനുദ്ദീന്‍ സംവിധായകന്റെ കുപ്പായമണിയുന്ന സിനിമയാണ് സ്ട്രീറ്റ് ലൈറ്റ്. മലയാളത്തിലും തമിഴിലുമായാണ് ചിത്രം പൂര്‍ത്തിയാക്കിയത്. പ്ലേഹൗസിന്റെ ബാനറില്‍ മമ്മൂട്ടി തന്നെയാണ് ചിത്രം നിര്‍മിക്കുന്നത്. കൊച്ചിയിലും പൊള്ളാച്ചിയിലും ചെന്നൈയിലും പൂര്‍ത്തിയാക്കിയ സിനിമയില്‍ മമ്മൂട്ടി സി.ഐ ജയിംസ് എബ്രഹാം എന്ന കഥാപാത്രത്തെ അവതരിപ്പിക്കുന്നു. സൗബിന്‍ സാഹിര്‍, ധര്‍മജന്‍ ബോള്‍ഗാട്ടി എന്നിവര്‍ മറ്റ് പ്രധാനകഥാപാത്രങ്ങളെ അവതരിപ്പിക്കുന്നു. ക്രൈംത്രില്ലറായതിനാല്‍ അരാധകരടക്കം വലിയ പ്രതീക്ഷയാണ് പുലര്‍ത്തുന്നത്. ഇവയ്ക്ക് പുറമേ അബ്രഹാമിന്റെ സന്തതികള്‍ ഉള്‍പ്പെടെ നാലോളം സിനിമകള്‍ ഇക്കൊല്ലം പൂര്‍ത്തിയാക്കും.
https://www.facebook.com/Malayalivartha
