ബോബി ചെമ്മണ്ണൂരിനെയും അദ്ദേഹത്തിന്റെ മാരത്തണിനെയും ട്രോളുന്ന സീനുകളുമായാണ് സലിംകുമാര്‍ തന്റെ പുതിയ ചിത്രത്തിലെത്തുന്നത്
ബോബി ചെമ്മണ്ണൂരിനെ ആക്ഷേപഹാസ്യത്തിലൂടെ പരിഹസിക്കുകയാണ് നടന്‍ സലിംകുമാര്‍. സലിംകുമാര്‍ ആദ്യമായി സംവിധാനം ചെയ്യുന്ന വാണിജ്യസിനിമയായ ദൈവമേ കൈതൊഴാം കെ. കുമാറാകണം എന്ന ചിത്രത്തിലാണ് ബോബി ചെമ്മണ്ണൂരിനെയും അദ്ദേഹത്തിന്റെ മാരത്തണിനെയും ട്രോളുന്ന സീനുകളുള്ളത്. ജയറാം നായകനാകുന്ന ചിത്രത്തിന്റെ ട്രെയിലര്‍ പുറത്ത് വന്നതോടെയാണ് രസകരമായ മുഹൂര്‍ത്തങ്ങള്‍ പ്രക്ഷകര്‍ കണ്ടത്. കാരുണ്യപ്രവര്‍ത്തനങ്ങള്‍ക്കും മറ്റുമാണ് ബോബി ചെമ്മണ്ണൂര്‍ എന്ന വ്യവസായി മാരത്തണ്‍ നടത്തിയത്. കറുത്തജൂതന്‍, കമ്പാര്‍ട്ട്‌മെന്റ് എന്നീ ഓഫ്ബീറ്റ് സിനിമകള്‍ക്ക് ശേഷമാണ് സലിംകുമാര്‍ മുഖ്യധാരാ സിനിമയിലേക്ക് കടക്കുന്നത്.
അനുശ്രീയാണ് നായിക. ശ്രീനിവാസന്‍, നെടുമുടിവേണു, ഹരിശ്രീ അശോകന്‍, ഇന്ദ്രന്‍സ്, കുളപ്പുള്ളി ലീല, സുരഭി, കൊച്ചുപ്രേമന്‍ തുടങ്ങിയ വലിയ താരനിരയാണ് ചിത്രത്തിലുള്ളത്. അമര്‍ അക്ബര്‍ ആന്റണിക്കും കട്ടപ്പനയിലെ ഋത്വിക് റോഷനും ശേഷം യുണൈറ്റഡ് ഗ്ലോബല്‍ മീഡിയയുടെ ബാനറില്‍ ആല്‍വിന്‍ ആന്റണിയും ഡോ. സഖറിയയും ശ്രീജിത്തും നിര്‍മിക്കുന്ന ചിത്രമാണ് ദൈവമേ കൈതൊഴാം കെ. കുമാറാകണം. പേര് കൊണ്ട് ഇതിനകം ശ്രദ്ധനേടിയ ചിത്രത്തിന്റെ മോഷന്‍ പോസ്റ്റര്‍ മമ്മൂട്ടി ഫെയിസ്ബുക്കിലൂടെ കഴിഞ്ഞയാഴ്ചയാണ് പുറത്ത് വിട്ടത്. അതിന് പിന്നാലെയാണ് ട്രെയിലര്‍ എത്തിയത്. കുടുംബപശ്ചാത്തലത്തില്‍ പറയുന്ന രസകരമായ ചിത്രമാണെന്ന് സലിംകുമാര്‍ പറയുന്നു. നീണ്ട ഇടവേളയ്ക്ക് ശേഷം ജയറാം ഫാമിലിമാനായി എത്തുന്നു എന്നതാണ് ചിത്രത്തിന്റെ മറ്റൊരു പ്രത്യേകത.
https://www.facebook.com/Malayalivartha
