പാര്വതിയെ പരസ്യമായി പരിഹസിച്ച് ബഡായി ബംഗ്ലാവ്, കൈയ്യടിച്ച് പ്രോത്സാഹിപ്പിച്ച് താരങ്ങള് - വീഡിയോ വൈറൽ
കസബയിലെ സ്ത്രീവിരുദ്ധതയ്ക്കെതിരെ പ്രതികരിച്ച നടി പാര്വതിക്കെതിരെ പരിഹാസവുമായി പലരും മുന്നോട്ട് വന്നിരുന്നു. ഇപ്പോളിതാ പാർവതിയെ പരസ്യമായി പരിഹസിച്ച് പ്രമുഖ ചാനലും രംഗത്ത് വന്നിരിക്കുകയാണ്. പ്രമുഖ ചാനലായ ഏഷ്യാനെറ്റ് സംപ്രേഷണം ചെയ്യുന്ന ബഡായ് ബംഗ്ലാവ് എന്ന പരിപാടിയിലാണ് പാർവതിയെ പരസ്യമായി പരിഹസിച്ച സംഭവം ഉണ്ടായത്. ചാനലിൽ കഴിഞ്ഞ ദിവസം അവതരിപ്പിച്ച സ്കിറ്റ് പാര്വ്വതിയേയും വിമന് ഇന് സിനിമ കലക്ടീവിനെയും പരസ്യമായി അധിക്ഷേപിക്കുന്നതാണെന്ന ആരോപണം ഉയരുന്നു.
വളരെയധികം ജനപ്രീതിയുള്ള പരിപാടിയാണ് ബഡായി ബംഗ്ലാവ്. രമേഷ് പിഷാരടി അവതാരകനായ ഈ പരിപാടിയിൽ നടനും എംഎല്എയുമായ മുകേഷും താരമാണ്. കഴിഞ്ഞ ദിവസത്തെ എപ്പിസോഡില് നടന്മാരായ സലിം കുമാറും ജയറാമും ആയിരുന്നു അതിഥികൾ. ഇതിനിടയിൽ ആണ് അവതാരകയായ ആര്യ കടന്നു വന്നത്. പരിപാടിക്കിടയിൽ ആര്യ അവതരിപ്പിച്ച സ്കിറ്റ് പാര്വതിയെ ലക്ഷ്യം വെച്ചുള്ളതായിരുന്നു.
ഓപ്പണ് ഫോറത്തില് പാര്വ്വതിയുമായി ബന്ധപ്പെട്ടു നടന്ന സമാന സന്ദര്ഭമാണ് സ്കിറ്റില് അരങ്ങേറിയത്. 'അടുത്തിടെ നിര്ഭാഗ്യവശാല് ഞാനൊരു സിനിമ കാണുകയുണ്ടായി, പക്ഷേ അതിന്റെ പേര് ഞാന് പറയുന്നില്ല, ഇപ്പോള് തന്നെ നിങ്ങള്ക്കത് മനസ്സിലായി കാണുമല്ലോ എന്നാണ് ആര്യയുടെ ഡയലോഗ്. ഓപ്പണ് ഫോറത്തില് പാര്വ്വതി ഇത് പറഞ്ഞപ്പോള് അടുത്തുണ്ടായിരുന്ന ഗീതു മോഹന്ദാസ് സിനിമയുടെ പേര് പറയ് എന്ന് നിര്ദേശിച്ചിരുന്നു. അവിടെ നിന്നായിരുന്നു ഇപ്പോൾ അരങ്ങേറുന്ന സംഭവ വികാസങ്ങളുടെയെല്ലാം തുടക്കം.
സിനിമയുടെ പേര് ഞാന് പറയണ്ടല്ലോ നിങ്ങള്ക്കറിയാമല്ലോ എന്ന് പറഞ്ഞപ്പോള് മുകേഷും പിഷാരടിയും അതിഥികളായ ജയറാമും സലിം കുമാറും 'സെ ഇറ്റ്, സേ, പറഞ്ഞോളൂ...' എന്ന് പറഞ്ഞ് ആര്യയെ പ്രോത്സാഹിപ്പിക്കുകയായിരുന്നു. അപ്പോൾ ആര്യയുടെ പ്രതികരണം 'ആ പേര് എന്നെക്കൊണ്ട് പറയിച്ച്, എന്നെ മാത്രം പെടുത്തിയിട്ട് നിങ്ങള്ക്ക് സുഖിക്കാനല്ലേ, എന്നാണ്. വീഡിയൊ സോഷ്യല് മീഡിയകളില് ചർച്ചയായിരിക്കുകയാണ്.
https://www.facebook.com/Malayalivartha