മലയാളികളുടെ പ്രിയപ്പെട്ട ഗപ്പി വീണ്ടും തീയേറ്ററിലേക്ക്. ജോണ്‍പോള്‍ ജോര്‍ജ് സംവിധാനം ചെയ്‌ത് 2016ല്‍ റിലീസായ ചിത്രം ബോക്‌‌‌‌സ് ഓഫീസില്‍ പരാജയപ്പെട്ടിരുന്നു. എന്നാൽ ബോക്‌‌‌‌സ് ഓഫീസിനു പുറത്ത് ചിത്രത്തിന് മികച്ച പ്രതികരണം ലഭിച്ചു. ജനുവരി 21നാണ് ചിത്രം റീ റിലീസ് ചെയ്യുന്നത്.

ടൊവിനോക്ക് പുറമേ ചേതന്‍ ആണ് ഗപ്പിയില്‍ കേന്ദ്രകഥാപാത്രത്തെ അവതരിപ്പിച്ചത്. രോഹിണി, ദിലീഷ് പോത്തന്‍, ശ്രീനിവാസന്‍, സുധീര്‍ കരമന തുടങ്ങിയവരും ചിത്രത്തില്‍ പ്രധാന വേഷങ്ങളിലെത്തി. ടൊവിനോ തന്നെയാണ് ചിത്രത്തിന്റെ റീ റിലീസ് ഫേസ്‌‌‌ബുക്ക് പേജിലൂടെ പങ്കുവെച്ചത്‌. സിനിമ നല്ലതാണെന്നും തീയറ്ററിൽ കാണാൻ സാധിക്കാത്തതിൽ വിഷമമുണ്ടെന്നും സിനിമാ പ്രേമികൾ വിഷമിച്ചിരുന്നു. അതിനു ഒരു സമാധാനമായാണ് ഗപ്പി വീണ്ടും വരുന്നത്.

ഓഗസ്റ്റ് അഞ്ചിന് തിയേറ്ററിൽ എത്തിയ ഗപ്പി പ്രേക്ഷകരുടെ അഭാവം മൂലം പെട്ടെന്ന് തിയേറ്ററിൽ നിന്ന് പോകുകയും പിന്നീട് ഡി.വി.ഡി റിലീസായപ്പോൾ അതിന്റെ വ്യാജപകർപ്പ് ടോറന്റിൽ നിന്ന് ഡൗൺലോഡ് ചെയ്ത് ലക്ഷകണക്കിന് ആളുകൾ കാണുകയും ചെയ്ത സാഹചര്യത്തിലാണ് ചിത്രം വീണ്ടും തിയേറ്ററിലെത്തുന്നത്. ഓരോ മണിക്കൂറിലും ആയിര കണക്കിന് ആളുകളാണ് ഗപ്പി അനധികൃതമായി കണ്ടുകൊണ്ടിരിക്കുന്നതെന്ന് ചിത്രത്തിന്റെ സംവിധായകനായ ജോൺപോൾ അവകാശപ്പെട്ടിരുന്നു .