മലയാളികൾ ഏറെ കാത്തിരിക്കുന്ന സിനിമയാണ് മാധവിക്കുട്ടിയുടെ ജീവിതത്തെ ആസ്പദമാക്കി കമൽ സംവിധാനം ചെയ്യുന്ന ആമി. മഞ്ജുവാര്യർ മാധവിക്കുട്ടിയുടെ വേഷം അലങ്കരിക്കുന്ന സിനിമയിൽ വിദ്യാബാലനെയായിരുന്നു ആദ്യം പ്രതീക്ഷിച്ചിരുന്നത്. എന്നാൽ ആ വേഷം പിന്നെ മഞ്ജു വാര്യറിലേക്ക് എത്തിപ്പെടുകയായിരുന്നു.

മലയാളികളുടെ മാധവിക്കുട്ടി പറന്നു കിടക്കുന്ന നീലാകാശവും അതെ സമയം നിഗൂഢതകൾ സൂക്ഷിച്ച കടലാഴങ്ങളുമായിരുന്നു. ആ ആമി ആരുടെ കൈയിലാണ് സുരക്ഷിതമായിരിക്കുമെന്ന കാര്യത്തിൽ അവളെ അടുത്തറിയുന്നവർക്ക് ആകാംഷയാണ്. അവളുടെ പ്രണയത്തെ പലപ്പോഴും മലയാളികൾക്ക് മനസിലാക്കാൻ ബുദ്ധിമുട്ടായിരുന്നു. സദാചാരത്തിന്റെ വിരലുകൾ മലയാളി അവൾക്ക് നേരെ ചൂണ്ടിയ അവസരങ്ങൾ ഏറെ. എന്നാൽ അടുത്തറിയുന്നവർക്ക് ആമി ആമിയാണ് അവൾക്ക് പകരം വയ്ക്കാൻ മറ്റാരും ഇല്ല. അത്രത്തോളം ഭാവതീവ്രതയുള്ള വൈകാരികപ്രക്ഷുബ്ദധതയുള്ള ആമിയെ അഭിനയിച്ചു ഫലിപ്പിക്കൽ അത്ര എളുപ്പമല്ല.

എന്നാൽ ആമിയുടെ ട്രെയിലറിൽ പ്രത്യക്ഷപ്പെടുന്ന മഞ്ജുവിന് ആമിയിൽ നിന്ന് എവിടെയൊക്കെയോ അകലം വന്നതുപോലെ. പട്ടുസാരിയണിഞ്ഞെത്തുന്ന നാലപ്പാട്ടെ അധികം നിറമില്ലെന്ന് സങ്കടപ്പെട്ട മാധവികുട്ടിയുടെ മാദകത്വത്തിന്റെ നിഴൽപോലും മഞ്ജുവിൽകാണാൻ സാധിക്കുന്നില്ല.

മഞ്ജുവിനെ ആമിയാക്കിയെടുക്കാനുള്ള ശ്രമമല്ല, മഞ്ജുവിലൂടെ കഥ പറയാനുള്ള ശ്രമമാണെന്ന് കമൽ പറഞ്ഞിരുന്നുവെങ്കിലും ആമിയിൽ നിന്ന് മഞ്ജുവിലേക്കുള്ള ദൂരം ട്രെയിലറിൽ പ്രകടമാണ്. എന്തായാലും മലയാളികളുടെ പ്രിയപ്പെട്ട ആമിയെ ബിഗ് സ്‌ക്രീനിൽ കാണാനായി കാത്തിരിക്കാം.