മമ്മൂട്ടിയും മോഹന്‍ലാലും മലയാള സിനിമയിലെ മുൻ നിര താരങ്ങളാണെങ്കിലും അവരുടെ രണ്ടുപേരുടെയും ആരാധകർ തമ്മിൽ എന്നും അടിയാണ്. എന്നാൽ ആടിയോ പിണക്കമോ താര രാജാക്കന്മാർക്കിടയിൽ ഇല്ല. എന്നും പരസ്പരമുള്ള സൗഹൃദം കാത്ത് സൂക്ഷിക്കുന്നവരാണ്  രണ്ടുപേരും. ഇത്രയേറെ മനോരഹമായ ഒരു സൗഹൃദം മറ്റൊരു ഇന്റസ്ട്രിയിലും കാണാന്‍ കഴിയില്ല.  സിനിമയ്ക്ക് പുറത്തും ഇരുവരുടെയും സൗഹൃദം മലയാളികളെ അസൂയപ്പെടുത്തിയിട്ടുണ്ട്. ആ സൗഹൃദം ദുല്‍ഖര്‍ സല്‍മാനിലും പ്രണവ് മോഹന്‍ലാലിലുമുണ്ട്.

റിപ്പബ്ലിക് ദിനത്തില്‍ പ്രണവിന്റെ ആദ്യ ചിത്രമായ ആദിയുടെ റിലീസാണ്. ഇതിനിടയിലാണ് ആദിയുടെ റിലീസിന് പ്രണവിന് ആശംസകള്‍ നേര്‍ന്ന് ദുല്‍ഖര്‍ സല്‍മാന്‍ ഫേസ്ബുക്കിലെഴുതിയത്. ദുല്‍ഖറിന്റെ വാക്കുകൾ വായിക്കാം..

പ്രിയപ്പെട്ട അപ്പു (പ്രണവ്) എന്ന് പറഞ്ഞുകൊണ്ടാണ് ദുല്‍ഖറിന്റെ ഫേസ്ബുക്ക് പോസ്റ്റ് തുടങ്ങുന്നത്. ആദിയ്ക്ക് എല്ലാ വിധ ആശംസകളും നേര്‍ന്നുകൊണ്ട് ദുല്‍ഖര്‍ പറഞ്ഞു തുടങ്ങി....

നമ്മള്‍ തമ്മില്‍ എന്നും നല്ലൊരു ബന്ധമുണ്ടായിരുന്നു. അത്, നീ കുഞ്ഞായിരുന്നപ്പോള്‍ ഞാന്‍ ആദ്യമായി നിന്നെ കണ്ടതായാലും, നിനക്ക് ഏഴ് വയസ്സുള്ളപ്പോള്‍ എന്റെ സ്‌കൂള്‍ പഠനകാലത്ത് നമ്മള്‍ സുഹൃത്തുക്കളായാതായാലും ശരി.

പ്രണവ്, നീ എനിക്കെന്നും എന്റെ കുഞ്ഞനിയനാണ്. നിന്റെ ഓരോ വളര്‍ച്ചയും ഞാന്‍ ആഘോഷിക്കുകയും അഭിനന്ദിക്കുകയും ചെയ്യും. നിന്റ െവിജയത്തിന് വേണ്ടി എന്നും പ്രാര്‍ത്ഥിക്കും.

എനിക്കറിയാം, ഈ നിമിഷം നിന്റെ അച്ഛനും അമ്മയും സഹോദരിയും എത്രത്തോളം ആകാംക്ഷയിലായിരിക്കുമെന്ന്. അവരൊട്ടും വിഷമിക്കേണ്ട. എന്തെന്നാല്‍ നീ സൂപ്പര്‍സ്റ്റാര്‍ ആവാന്‍ ജനിച്ചതാണെന്നാണ് എന്റെ വിശ്വാസം. എന്റെ എല്ലാ സ്‌നേഹവും പ്രാര്‍ത്ഥനയും- എന്ന് ദുല്‍ഖര്‍ .
എന്തായാലും ഈ കുറിപ്പ് സോഷ്യൽ മീഡിയ ഏറ്റെടുത്ത് തുടങ്ങി.