മലയാളികളുടെ പ്രിയ സംവിധായകൻ ജീത്തു ജോസഫ് ഇനി ബോളിവുഡിലേക്ക്. കന്നി ഹിന്ദി ചത്രത്തില്‍ ഇമ്രാന്‍ ഹാഷ്മിയാണ് നായകനായി എത്തുന്നത്. ഋഷി കപൂറും ചിത്രത്തിലെ ഒരു പ്രധാന വേഷം അവതരിപ്പിക്കും. ദൃശ്യം കണ്ടിട്ടാണ് സിനിമ സംവിധാനം ചെയ്യാന്‍ ബോളിവുഡിലേക്ക് ക്ഷണം വന്നതെന്നും ജീത്തു പറഞ്ഞു.

പ്രണവ് മോഹന്‍ലാല്‍ നായക വേഷത്തിലെത്തുന്ന ആദിയുടെ റിലീസിന് ശേഷം അടുത്തതായി ഒരു ഹിന്ദി ചിത്രമൊരുക്കാനുള്ള തയ്യാറെടുപ്പിലാണ് താനെന്ന് അദ്ദേഹം അഭിമുഖത്തില് പറഞ്ഞു.ഒരു ഹോളിവുഡ് ചിത്രത്തിന്റെ റീമേക്കാണ് ചിത്രം. ചിത്രത്തിന്റെ അവകാശങ്ങള്‍ നിര്‍മാതാക്കള്‍ വാങ്ങിയ ശേഷമാണ് ജീത്തുവിനെ സമീപിക്കുന്നത്.
അതേസമയം അദ്ദേഹത്തിന്റെ പുതിയ ചിത്രം ആദി ജനുവരി 26ന് തിയേറ്ററുകളിലെത്തുകയാണ്. നേരത്തെ മികച്ച ബാലതാരത്തിനുള്ള സംസ്ഥാന അവാര്‍ഡ് കരസ്ഥമാക്കിയിട്ടുളള പ്രണവ് യാതൊരു ബുദ്ധിമുട്ടുകളുമില്ലാതെയാണ് വര്‍ഷങ്ങള്‍ക്ക് ശേഷം ക്യാമറയെ അഭിമുഖീകരിച്ചതെന്നും ആക്ഷന്‍ രംഗങ്ങള്‍ ഡ്യൂപ്പില്ലാതെ തന്നെ ചെയ്യാന്‍ തയ്യാറായെന്നും ജീത്തു നേരത്തെ വ്യക്തമാക്കിയിരുന്നു.ഒരു പ്രമുഖ ചാനലിന് നല്‍കിയ അഭിമുഖത്തില്‍ ജീത്തു ജോസഫ് തന്നെയാണ് ഇക്കാര്യം വ്യക്തമാക്കിയത്.