കാത്തിരിപ്പുകള്‍ക്കൊടുവില്‍ മലയാളത്തിന്റെ പ്രിയ നടൻ മോഹൻലാലിന്റെ മകൻ പ്രണവ് മോഹന്‍ലാൽ നായകനായി അരങ്ങേറ്റം നടത്തുന്ന ആദി തിയറ്ററുകളിലെത്തി. ചിത്രത്തിന്റെ ആദ്യ പകുതി നിലവാരം പുലർത്തി. മലയാള സിനിമയിൽ മുൻപും കണ്ടിരുന്ന പതിവ് പ്രമേയം തന്നെയാണ് ഈ ജീത്തു ജോസഫ് സിനിമയിലും കാണാൻ കഴിഞ്ഞത്. സംഗീതം മാത്രം സ്വപ്നം കണ്ടു നടക്കുന്ന ആദിത്യ മോഹന്‍ എന്ന കഥാപാത്രത്തെയാണ് പ്രണവ് ചിത്രത്തിൽ അവതരിപ്പിച്ചിരിക്കുന്നത്. തന്റെ സ്വപ്നവും അത് നേടിയെടുക്കാനുള്ള ഒരു ചെറുപ്പക്കാരന്റെ ഓട്ടവും അതിനിടയിൽ ജീവിതത്തിൽ അപ്രതീക്ഷിതമായി നടക്കുന്ന സംഭവ വികാസങ്ങളുമാണ് ചിത്രത്തിന്റെ പ്രമേയം. ത്രില്ലര്‍ ഗണത്തില്‍ സസ്‌പെന്‍സ് നിറഞ്ഞ ആദി പ്രണവിന്റെ ഒരു മാസ്സ് എൻട്രി തന്നെയാണ്. മലയാളത്തിലെ താര രാജാവ് മോഹൻലാലിന്റെ മകൻ എന്നത്കൊണ്ട് തന്നെ പ്രണവിന്റെ അഭിനയം എല്ലാവരും ഉറ്റുനോക്കുന്ന ഒന്നാണ്. താരരാജാവിന്റെ മകന്‍ എന്ന ലേബലിലെത്തിയ പ്രണവിന് ആരാധകരുടെ വന്‍ വരവേല്‍പ്പാണ് കിട്ടിയിരിക്കുന്നത്. മോഹൻലാലിന്റെ അഭിനയ മികവ് മകനും പുലർത്തി.

പ്രണവ് മോഹൻലാലിന്റെ അവിശ്വസനീയമായ അഭിനയ മുഹൂർത്തങ്ങളിലൂടെയാണ് സിനിമയുടെ രണ്ടാം പകുതി മുന്നേറുന്നത്. ത്രില്ലർ സിനിമ അതിന്റെ കയ്യടക്കത്തടോടെ സംവിധായകൻ കൈകാര്യം ചെയ്യുന്നു. തികച്ചും സ്വാഭാവികമായ അഭിനയം. പശ്ചാത്തല സംഗീതവും പൂർണമായ പെർഫക്ഷൻ നിലനിർത്തുന്നു, അവസാനം വരെ ആകാംഷ നിലനിർത്തുന്ന സസ്പെൻസ് ശൈലി.

മോഹൻലാൽ ആദ്യം അഭിനയിച്ച സിനിമയായ മഞ്ഞിൽ വിരിഞ്ഞ പൂക്കളിലെ ' മിഴിയോരംനനഞ്ഞൊഴുകും ' എന്ന ഗാനത്തിന്റെ റീമിക്‌സിലൂടെയാണ് പ്രണവിന്റെ ചിത്രത്തിലേക്കുള്ള എൻട്രി. പുതുതലമുറ നടന്മാർക്കിടയിൽ തന്റേതായ ഉയർന്ന താര പദവി സ്വന്തമാക്കുന്ന സിനിമയാണ് പ്രണവിന്റെ ആദി. സിനിമയിലെ മറ്റു നടന്മാരൊക്കെ തന്നെ മത്സര അഭിനയം കാഴ്ച്ചവെച്ചു. പ്രണവ് മോഹൻലാലിന്റെ പിതാവായി ചിത്രത്തിൽ അഭിനയിക്കുന്ന സിദ്ധിക്ക് ഗംഭീര അഭിനയം കാഴ്ചവച്ചു. പ്രണയം വിഷയമാകാതെ തികച്ചും വ്യത്യസ്തമായൊരു സിനിമതന്നെയാണ് ആദി.

അക്രോബാറ്റിക് സ്വഭാവമുള്ള ശാരീരികാഭ്യാസമായ പാര്‍ക്കൗര്‍ മലയാള സിനിമയിൽ ആദ്യമായി പരീക്ഷിക്കുന്നത് ആദിയിലൂടെയാണ് എന്ന പ്രത്യേകത ചിത്രത്തിനുണ്ട്. ചിത്രത്തിലെ ആക്ഷന്‍ രംഗങ്ങള്‍ മനോഹരമാക്കാന്‍ പ്രണവ് നേരത്തേ പാര്‍ക്കൗര്‍ പരിശീലനം നടത്തിയിരുന്നു. പാര്‍ക്കൗര്‍ പോലുള്ള സാഹസിക രംഗങ്ങള്‍ പോലും ഡ്യൂപ്പില്ലാതെയാണ് പ്രണവ് മോഹന്‍ലാല്‍ ചെയ്തത്. എങ്കിൽ പോലും ആക്ഷൻ സീനുകൾ പ്രണവിന്റെ കൈകളിൽ ഭദ്രമാണ്.

ഇതുവരെ ഒരു താരത്തിനും ലഭിക്കാത്ത സ്വീകരണം ആദിയ്ക്കും പ്രണവിനും കിട്ടിയിട്ടുണ്ട്. 300 തിയറ്ററുകളിലായി 1500 പ്രദര്‍ശനമാണ് ആദിയ്ക്ക് കിട്ടിയിരിക്കുന്നത്. കേരളത്തില്‍ മാത്രമം 200 തിയറ്ററുകളിലാണ് സിനിമ പ്രദര്‍ശിപ്പിക്കുന്നത്. ഒപ്പം ഫാന്‍സ് ഷോയും സിനിമയ്ക്ക് സംഘടിപ്പിച്ചിരിക്കുകയാണ്.

ജീത്തു ജോസഫ് സംവിധാനം ചെയ്ത ചിത്രം നിര്‍മ്മിക്കുന്നത് ആശീര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ്. അനിൽ ജോൺസൻ ആണ് ചിത്രത്തിന്റെ സംഗീതം നിർവഹിച്ചിരിക്കുന്നത്. സിനിമാറ്റോഗ്രാഫി സതീഷ് കുറുപ്പ് നിർവഹിച്ചിരിക്കുന്നു.

ഷറഫുദീൻ ,സണ്ണി വെയിൽ , അനുശ്രീ , ലെന , അഥിതി രവി എന്നിവരാണ് മറ്റു പ്രധാന താരങ്ങൾ.