മോഹൻലാലിൻറെ ബിഗ് ബജറ്റ് ചിത്രമായ ഒടിയൻ റിലീസിനായി കാത്തിരിക്കുന്ന ആരാധകർക്ക് സന്തോഷ വാർത്ത. ഈ വര്‍ഷം ഒക്ടോബർ 18 ന് ചിത്രം പ്രദർശനത്തിനെത്തുമെന്നാണ് ഏറ്റവും പുതിയ വിവരം. വിഎ ശ്രീകുമാര്‍ മേനോന്‍ സംവിധാനം ചെയ്യുന്ന ചിത്രമായ ഒടിയനുവേണ്ടി മോഹൻലാൽ ശരീരഭാരം കുറച്ചിരുന്നു.

ഒടിയനിൽ അഭിനയിക്കുന്ന പ്രകാശ് രാജിന്റെ ഡേറ്റിനെ സംബന്ധിച്ച പ്രശ്നങ്ങളാണ് ഒടിയന്റെ അവസാന ഘട്ട ഷൂട്ടിങ് ഷെഡ്യൂൾ വൈകുന്നത് എന്ന് റിപ്പോർട്ടുകൾ ഉണ്ടായിരുന്നു. ഇതേ തുടർന്നാണ് മോഹൻലാൽ അജോയ് വർമ്മ സംവിധാനം ചെയ്യുന്ന നീരാളി എന്ന സിനിമയുമായി മുന്നോട്ട് പോയത്.

എന്നാൽ എത്രയും വേഗം ഒടിയന്റെ ഷൂട്ടിങ് ആരംഭിക്കും എന്നാണ് അറിയാൻ കഴിയുന്നത്. ചിത്രീകരണം പൂര്‍ത്തിയായാലും പോസ്റ്റ് പ്രൊഡക്ഷന്‍ വര്‍ക്കുകള്‍ ഉള്ളതിനാല്‍ പൂജ അവധിയോടനുബന്ധിച്ചായിരിക്കും സിനിമ റിലീസ് ചെയ്യുന്നത്.

ബിഗ് ബജറ്റിലൊരുങ്ങുന്ന ചിത്രം നിർമ്മിക്കുന്നത് ആന്റണി പെരുമ്പാവൂരാണ്. മോഹന്‍ലാല്‍, മഞ്ജു വാര്യര്‍, പ്രകാശ് രാജ് എന്നിവര്‍ക്ക് പുറമെ സിദ്ദിഖ്, ഇന്നസെന്റ്, നരേന്‍, കൈലാഷ്, സന അല്‍താഫ്, അപ്പാനി ശരത്, നന്ദു എന്നിവരാണ് സിനിമയിലെ മറ്റ് പ്രധാന താരങ്ങൾ.