ഒമർ ലുലുവിന്റെ 'അഡാർ ലൗവ്​' സിനിമയിലെ 'മാണിക്യ മലരായ പൂവേ' എന്ന ഗാനത്തിൽ സെക്കൻഡുകൾ മാത്രം അഭിനയിച്ച പ്രിയ വാര്യർ കണ്ണിറുക്കലിലൂടെ ശ്രദ്ധിക്കപ്പെട്ടതോടെ അന്യ സം​സ്​​ഥാ​ന​ങ്ങ​ളി​ൽ നിന്നും മതവികാരം വ്രണപ്പെടുത്തിയെന്ന തരത്തിൽ പ്രിയയ്ക്കും സിനിമയിലെ അണിയറപ്രവർത്തകർക്കുമെതിരെ പരാതികൾ ഉയർന്നു വന്നിരുന്നു. ഇതിനുപിന്നാലെ മറ്റൊരു വിമർശനം കൂടി  ഉയർന്നു വന്നിരിക്കുകയാണ്. അഡാർ ലൗവിലെ പ്രിയയുടെ കണ്ണിറുക്കൽ കോപ്പിയടിച്ചതാണെന്നാണ് പുതിയ വിമർശനം. മജീദ് അബു സംവിധാനം ചെയ്യുന്ന 'കിടു' എന്ന മലയാളസിനിമയുടെ ഗാനരംഗത്തു നിന്നുമാണ് കണ്ണിറുക്കല്‍ കോപ്പിയടിച്ചതെന്നാണ്  ആരോപണമുയരുന്നത്.

ഈ ചിത്രത്തിൽ പുതുമുഖങ്ങളായ അനഘയും റംസാനുമാണ് പ്രധാനകഥാപാത്രങ്ങളെ അവതരിപ്പിക്കുന്നത്. ഇതേ സിനിമയുടെ ഒരു ഗാനരംഗത്തില്‍ അഡാർ ലൗവിലെ കണ്ണിറുക്കല്‍ രംഗത്തിന് സമാനമായൊരു രംഗം സമൂഹമാധ്യമങ്ങളിലൂടെ പ്രചരിക്കുന്നുണ്ട്. സിനിമയുടെ ഡിഐ വിഡിയോ ക്ലിപ്പ് ആണ് സമൂഹമാധ്യമങ്ങളിലൂടെ ആരോ പുറത്തിറക്കിയത്. മലപ്പുറം പശ്ചാത്തലമായ ഈ ഗാനരംഗം പാടിയിരിക്കുന്നതും 'മാണിക്യ മലരായ പൂവേ' പാടിയ വിനീത് ശ്രീനിവാസന്‍ തന്നെയാണ്. ഈ വിഡിയോ ക്ലിപ്പ് കോപ്പിയടിച്ചതാണെന്ന തരത്തിൽ പ്രചരിച്ചതോടെ സംഭവത്തിന്റെ പിന്നിലുള്ള സത്യാവസ്ഥ വെളിപ്പെടുത്തി 'കിടു' സിനിമയുടെ നിര്‍മാതാവായ സാബു പി.കെ രംഗത്തെത്തി.

''ഈ രംഗം കണ്ടിട്ട് പലരും പറയുന്നുണ്ട്. ഇവര്‍ അഡാർ ലൗവില്‍ നിന്നും കോപ്പിയടിച്ച് ചെയ്ത പാട്ട് ആണെന്ന്. ഒരിക്കലുമല്ല. അത് മനസ്സിലാക്കാന്‍ കാരണം ഞാന്‍ തന്നെ പറയാം. എന്റെ സിനിമയുടെ എഡിറ്ററും അഡാർ ലൗവിന്റെ എഡിറ്ററും ഒരാള് തന്നെയാണ്. നവംബര്‍ 25ന് പാക്ക്അപ്പ് ചെയ്ത സിനിമയാണ് കിടു. ജനുവരിയില്‍ അതിന്റെ എഡിറ്റും കഴിഞ്ഞു. അതിന് ശേഷമാണ് അഡാറ് ലൗവില്‍ ഈ എഡിറ്റര്‍ ജോയിന്‍ ചെയ്യുന്നത്. അതിന് ശേഷമാണ് ഈ രംഗം ഷൂട്ട് ചെയ്യുന്നത്. ശരിക്കും ഞങ്ങളാണ് പറയേണ്ടത് അവര്‍ കോപ്പയടിച്ചെന്ന്. നമ്മള്‍ അങ്ങനെ പറയുന്നുമില്ല. ഇതിന്റെ പുറകെ വിവാദങ്ങളുമായി പോകാനും താല്‍പര്യമില്ല. അങ്ങനെയൊരു സിനിമയുടെ ചെറിയ ഭാഗത്തിനെ ചൊല്ലി വഴക്കുണ്ടാക്കുന്നത് എന്തിനാണ്. സിനിമയുടെ ചില ഭാഗങ്ങളില്‍ സ്വാഭിവകമായും സാമ്യമുണ്ടായേക്കാം, ജീവിതം തന്നെ അങ്ങനയെല്ലേ''- സാബു പറഞ്ഞു.