അരുൺ ഗോപിയുടെ ജാതകം തിരുത്തിയ ആ സംഭവം...
സംവിധായകൻ അരുൺ ഗോപിക്ക് ഇപ്പോഴും ഞ്ഞെട്ടൽ മാറിയിട്ടില്ല. പ്രണവ് മോഹൻലാൽ തന്റെ ചിത്രത്തിൽ അഭിനയിക്കാമെന്ന് പ്രണവ് സമ്മതിക്കുമെന്ന് അരുൺ കരുതിയതല്ല. പക്ഷേ അപ്രതീക്ഷിതമായി അത് സംഭവിച്ചു. അരുൺ ഗോപിയെ പോലെ ത്യാഗങ്ങൾ അനുഭവിച്ച സംവിധായകർ സിനിമയിൽ കുറവാണ്. രാമലീല എന്ന ചിത്രത്തിന്റെ ഷൂട്ടിങ്ങ് മുക്കാൽ ഭാഗമായതോടെ ദിലീപ് അകത്തായി. തികച്ചും അപ്രതീക്ഷിത സംഭവമായിരുന്നു അത്. പുതിയ സംവിധായകനായതിനാൽ ഇത്തരമൊരു പ്രതിസന്ധി എങ്ങനെ അതിജീവിക്കുമെന്ന് മനസിലായില്ല. ടോമിച്ചൽ മുളകുപാടം എന്ന നിർമ്മാതാവ് പോലും പാളി പോയ നിമിഷം.
ദിലീപ് തീർത്തും പ്രതിസന്ധിയിലായി. സിനിമയിൽ തുടർന്നു അഭിനയിക്കാനുള്ള മൂഡില്ല. ഇതിനിടയിൽ കേസ് കടുത്തു. സർക്കാരും പോലീസും ഉൾപ്പെടെ എല്ലാവരും എതിരായി. ദിലീപിന്റെ കാലം അവസാനിച്ചതായി വിധിയെഴുതപ്പെട്ടു. ദിലീപിന് സിനിമയിൽ തിരിച്ചു വരാൻ കഴിയില്ലെന്ന് സാമൂഹ്യ ജ്യോത്സ്യൻമാർ പ്രവചിച്ചിരുന്നു. അത്തരം പ്രവചനങ്ങൾ പുറത്തു വരുമ്പോൾ അരുൺ ഗോപിയുടെ മനസാണ് ഇടിഞ്ഞത്. പുലിമുരുകനിൽ കിട്ടിയതെല്ലാം രാമലീലയിൽ പോകുമെന്ന് ടോമിച്ചനെ ചൂണ്ടി മാലോകരെല്ലാം പറഞ്ഞു.
പതിയെ പതിയെ എല്ലാം ശാന്തമായി. ദിലീപിന് ജാമ്യം ലഭിച്ചു. സിനിമയിൽ പൂർത്തിയാക്കാനുണ്ടായിരുന്ന ഭാഗങ്ങൾ പൂർത്തിയായി. എന്നാൽ ചിത്രം അരുണിന് കോൺഫിഡൻസ് നൽകി. ടോമിച്ചൻ സിനിമ കണ്ട് അരുണിനോട് പറഞ്ഞു. ഇത് വിജയിക്കും. സംശയമില്ല. അപ്പോഴും അരുണിന് സംശയമുണ്ടായിരുന്നു. കേസിൽ കുരുങ്ങിയ ഒരാളുടെ സിനിമ എങ്ങനെ വിജയിക്കും എന്ന് അരുൺ ചിന്തിച്ചു.
രാമലീല റിലീസായ ദിവസം അരുണിന്റെ നെഞ്ചിലെ കല്ലിറങ്ങി. ആദ്യ ഷോയിൽ തന്നെ ചിത്രം വിജയമായി. ദിലീപ് പോലും അത്ഭുതപ്പെട്ടു. ടോമിച്ചൻ തന്റെ വാക്കുകൾ ആവർത്തിച്ചു. ദിലീപിന്റെ രണ്ടാം ജന്മമായി ചിത്രം വിശേഷിപ്പിക്കപ്പെട്ടു. അതോടെ അരുൺ ഗോപി മലയാള സിനിമയിലെ അറിയപ്പെടുന്ന സംവിധായകനായി. രണ്ടാമത്തെ ചിത്രത്തെ കുറിച്ച് ആലോചന തുടങ്ങിയപ്പോൾ അരുണിന്റെ മനസിൽ ഉണ്ടായിരുന്നത് പ്രണവാണ്. ആദിയുടെ ചിത്രീകരണം ആരംഭിച്ചിരുന്നില്ല. എന്നാലും ചിത്രത്തിന്റെ ചർച്ചകൾ ആരംഭിച്ചിരുന്നു.
ആദിയുടെ റിലീസിന് ശേഷമാണ് അരുൺ പ്രണവിനെ കണ്ടത്. കഥ വിശദമായി കേട്ടു. സമ്മതിച്ചു. പിന്നീടാണ് രണ്ടാമത്തെ ചിത്രമായി അഭിനയിക്കാമെന്ന് പറഞ്ഞത്. അതോടെ ഞ്ഞെട്ടലായി. പ്രണവ് സമ്മതം മൂളിയതിന് പിന്നാലെ നടൻ മോഹൻലാൽ വിളിച്ച് ആശംസകൾ നേർന്നു. ഇങ്ങനെയൊരു ചിത്രം ആരും കാണില്ലെന്ന അവകാശവാദമൊന്നും അരുണിനില്ല. എന്നാലും ചിത്രം വ്യത്യസ്തമാകുമെന്ന് അരുൺ പറയുന്നു. അരുൺ ഇപ്പോൾ ധ്യാനത്തിലാണ്. പ്രാർത്ഥനയിലാണ്. ചിത്രത്തെ കുറിച്ച് അരുൺ ഇപ്പോൾ ഒന്നും പറയുന്നില്ല.
താൻ അനുഭവിച്ച പ്രതിസന്ധികൾക്ക് പ്രതിഫലമായാണ് പ്രണവിന്റെ ഡേറ്റ് ലഭിച്ചതെന്ന് അരുൺ പറയുന്നു. തന്റെ സമയദോഷം എന്നു പറഞ്ഞവർ അത് മാറ്റി പറയേണ്ടി വരുമെന്ന് അരുൺ പറഞ്ഞു. വ്യത്യസ്തമായ ഒരു സിനിമയാണ് അരുണിന്റെ സ്വപ്നം.
https://www.facebook.com/Malayalivartha