കൂടുതല്‍ സുന്ദരനായി, രഹസ്യങ്ങളുടെ കലവറ ഒളിപ്പിച്ച് ഒടിയന്‍ അണിയറയില്‍ തകര്‍ക്കുന്നു... പ്രേക്ഷകരെ വിസ്മയിപ്പിക്കും ഈ ഒടിയന്‍
മോഹന്‍ലാലിന്റെ ഒടിയന്റെ മെയ്ക്കിംഗ് വീഡിയോ തരംഗമാകുന്നു... തെങ്കാശിയില്‍ പുരോഗമിക്കുന്ന ചിത്രത്തിന്റെ ക്രൂ മെമ്പേഴ്‌സിന്റെ ഒത്തൊരുമയും അധ്വാനവും വീഡിയോയില്‍ കാണാം. മോഹന്‍ലാല്‍ കൂടുതല്‍ സുന്ദരനായി, മീശയില്ലാത്ത മോഹന്‍ലാലിനെ ഇത്രയും മനോഹരമായി മറ്റൊരു ചിത്രത്തിലും കണ്ടിട്ടില്ല. ഏറെ സമയമെടുത്താണ് ഓരോ ഷോട്ടും ചിത്രീകരിക്കുന്നത്. കൂറ്റന്‍ ലൈറ്റുകളും ക്രൈയിനുകളും ഒന്നിലധികം ക്യാമറകളും ഉപയോഗിച്ചാണ് ഷൂട്ടിംഗ്. പീറ്റര്‍ ഹെയിന്‍ ഒരുക്കുന്ന സംഘട്ടനങ്ങള്‍ക്ക് മാത്രമായി പ്രത്യേക പരിശീലനം നേടിയ ആര്‍ട്ടിസ്റ്റുകളെയാണ് അണിനിരത്തിയിരിക്കുന്നത്. പഴയ രീതിയിലുള്ള ഓലമേഞ്ഞവീടും തെരുവുകളും കാളവണ്ടിയും അങ്ങനെ ഒരു കാലഘട്ടത്തെ മുഴുവന്‍ കലാസംവിധായകന്‍ പ്രശാന്ത് മാധവവ് പുനസൃഷ്ടിച്ചിരിക്കുന്നു.
മോഹന്‍ലാലിന്റെ ഒടിയന്‍ മാണിക്യനും മഞ്ജുവാര്യരുടെ പ്രഭയും പല കാലങ്ങളിലുള്ള രൂപപരിണാമങ്ങളിലൂടെയാണ് സിനിമയില്‍ എത്തുന്നത്. വാരാണസിയില്‍ മാണിക്യന്റെ വാര്‍ദ്ധക്യത്തില്‍ നിന്ന് തുടങ്ങി പാലക്കാട്ടേ യൗവനകാലത്തേക്കാണ് കഥ പോകുന്നത്. പ്രഭയുടെ മൂന്ന് വ്യത്യസ്ത കാലഘട്ടങ്ങളെയാണ് മഞ്ജുവാര്യര്‍ അഭിനയിച്ചിരിക്കുന്നത്. മോഹന്‍ലാലിന്റെയും പ്രകാശ് രാജിന്റെയും കഥാപാത്രങ്ങള്‍ മഞ്ജുവിന്റെ പ്രഭയെ ചുറ്റിപ്പറ്റിയാണ് നില്‍ക്കുന്നത്. ഇരുപതുകളുടെ അവസാനത്തില്‍ തുടങ്ങി 35വയസ്സും പിന്നിട്ട് അന്‍പതുകളിലുള്ള രൂപഭാവും മഞ്ജു അനായാസം അവതരിപ്പിച്ചിരിക്കുന്നു.
മലയാളത്തിലെ ചെലവേറിയ ചിത്രങ്ങളുടെ പട്ടികയില്‍ ഒടിയനുണ്ടാവുമെന്ന് സംവിധായകന്‍ വിഎ ശ്രീകുമാര്‍ മേനോന്‍ പറഞ്ഞു. എന്നാല്‍ കൃത്യമായ കണക്കുകള്‍ അണിയറപ്രവര്‍ത്തകര്‍ പുറത്ത് വന്നിട്ടില്ല. ചെറിയ ഇടവേളക്ക് ശേഷമാണ് ഒടിയന്‍ ചിത്രീകരണം തെങ്കാശിയില്‍ തുടങ്ങിയത്. പാലക്കാട്, കോങ്ങാട്, ഒളപ്പമണ്ണ മന എന്നിവിടങ്ങളിലും ചിത്രീകരണം ഉണ്ടായിരുന്നു. രജനീകാന്ത് സിനിമകള്‍ ഇറങ്ങുന്ന പ്രതീതി സൃഷ്ടിച്ചായിരിക്കും ഒടിയന്‍ തിയറ്ററുകളിലേക്ക് എത്തുന്നത്. 300 തിയറ്ററുകളിലെങ്കിലും ഒടിയന്‍ എക്കിക്കാനാണ് വിതരണക്കാരായ മാക്‌സ് ലാബ് നോക്കുന്നത്. കേരളത്തില്‍ മാത്രം 604 സ്‌ക്രീനുകളാണുള്ളത്. ഇന്ത്യയിലും വിദേശത്തും ഒരുമിച്ച് റിലീസ് ചെയ്യാനാണ് ആലോചന.
മോഹന്‍ലാലിനും മഞ്ജുവാര്യര്‍ക്കും പിന്നാലെ പ്രകാശ്രാജ്, സിദ്ധിഖ്, ഇന്നസെന്റ്, നരേന്‍, കൈലാഷ്, സന അല്‍ത്താഫ്, അപ്പാനി ശരത്, നന്ദു തുടങ്ങിയ വലിയ താരനിര ചിത്രത്തിലുണ്ട്. എം.ജയചന്ദ്രനാണ് സംഗീതം നിര്‍വഹിക്കുന്നത്. വിക്രംവേദയിലൂടെ ശ്രദ്ധേയനായ സംഗീതസംവിധായകന്‍ സി.എസ് സാമാണ് പശ്ചാത്തലസംഗീതം ഒരുക്കുന്നത്.
https://www.facebook.com/Malayalivartha
