'കോട്ടയം കുഞ്ഞച്ചന് രണ്ടാം ഭാഗമുണ്ടാകില്ല'; മമ്മൂട്ടിയെ തെറ്റുധരിപ്പിപ്പിച്ചാണ് ഇത്തരമൊരു പ്രഖ്യാപനം നടത്തിയത്; സിനിമയുമായി മുന്നോട്ട് പോയാൽ നിയമപരമായി നേരിടുമെന്നും നിർമ്മാതാവ് അരോമ മണി
മമ്മൂട്ടിയുടെ സൂപ്പർഹിറ്റ് ചിത്രം കോട്ടയം കുഞ്ഞച്ചന്റെ രണ്ടാം ഭാഗത്തിനെതിരെ ആദ്യ ചിത്രത്തിന്റെ അണിയറപ്രവർത്തകർ രംഗത്തെത്തി. കോട്ടയം കുഞ്ഞച്ചന്റെ രണ്ടാം ഭാഗത്തിന് പകർപ്പകാവകാശം നൽകിയില്ലെന്നും മമ്മൂട്ടിയെ തെറ്റുധരിപ്പിച്ചാണ് ഇത്തരമൊരു പ്രഖ്യാപനം നടത്തിയതെന്നും ചിത്രത്തിന്റെ ആദ്യ നിർമ്മാതാവായ അരോമ മണി പറഞ്ഞു.
സിനിമയുടെ പേരും പോസ്റ്ററും ഉൾപ്പെടുത്തി ഇനിയും മുന്നോട്ട് പോയാൽ നിയമപരമായി നേരിടുമെന്നും അരോമ മണി വ്യക്തമാക്കി. ആദ്യ സിനിമയുടെ സംവിധായകനായ ടി എസ് സുരേഷ് ബാബുവും രണ്ടാം ഭാഗത്തിനെതിരെ വിമർശനവുമായെത്തി. പുതിയ ചിത്രത്തിന്റെ സംവിധായകനോ നിർമ്മാതാവോ തന്നെ കണ്ടില്ലെന്നും കോട്ടയം കുഞ്ഞച്ചന്റെ പേര് വെച്ച് മറ്റൊരു ചിത്രം ചെയ്യാനാവില്ലെന്നും സുരേഷ് ബാബു പറഞ്ഞു.
അതേസമയം, ആദ്യ ചിത്രത്തിന്റെ നിർമ്മാതാവായ ആരോമ മണിയെ നേരിട്ട് കണ്ടതാണെന്നും സംവിധായകൻ സുരേഷ് ബാബു ഉൾപ്പെടെയുള്ള ആളുകളുമായി കഴിഞ്ഞ ഒരു മാസമായി പുതിയ ചിത്രത്തെ പറ്റി സംസാരിച്ചതാണെന്നും നിർമ്മാതാവ് വിജയ് ബാബു പറഞ്ഞു. ഒരു കഥ ലഭിച്ചപ്പോൾ അതിലെ കഥാപാത്രത്തിന്റെ മാനറിസങ്ങൾ കോട്ടയം കുഞ്ഞച്ചനുമായി സാദൃശ്യമുള്ളതായി തോന്നി. അതിനാലാണ് ഇതേ പേര് ചിത്രത്തിന് നൽകാൻ തീരുമാനിച്ചതെന്നും അദ്ദേഹം വ്യക്തമാക്കി.
കോട്ടയം കുഞ്ഞച്ചന് രണ്ടാം ഭാഗം ഉണ്ടാകില്ല. കോട്ടയം പശ്ചാത്തലമായുള്ള കഥാപാത്രമായി മമ്മൂട്ടി അവതരിപ്പിക്കുന്ന മറ്റൊരു സിനിമ ചെയ്യുമെന്നും വിജയ് ബാബു പറഞ്ഞു. ആട് രണ്ടാം ഭാഗത്തിന്റെ നൂറാം വിജയദിനാഘോഷത്തോടനുബന്ധിച്ച് നടന്ന ചടങ്ങിലാണ് മിധുൻ മാനുവൽ തോമസ് സംവിധാനം ചെയ്യുന്ന കോട്ടയം കുഞ്ഞച്ചൻ രണ്ടാം ഭാഗം മമ്മൂട്ടി പ്രഖ്യാപിച്ചത്.
https://www.facebook.com/Malayalivartha